1, 2. Mulong wak anvaj amwing akutwish kwakam chisu chikimbinau anau kwipan kudi Yehova ni kutambul dibatish?

TUNAN twa in kwilej a Bibil akat kwipan kudi Yehova ni kutambul dibatish. Avud pakach pau adi ansand alidinau mu uyakin ni atondin njil yiwamp ya mwom. (Kuseng 1:1-3) Anch udi nvaj mwin Kristu, ukutwish kwikal ni ruchingej anch dichuku dimwing kurutu oku, mwaney ikundj ap mband niyend ukutambul dibatish.—Ilikej ni 3 Yohan 4.

² Pakwez, ukutwish kwakam. Pamwing ap wamen kal an amwing akat kutambul dibatish, pakwez mu kusut kwa machuku akat kusambish kwidjidjek anch kushakam kukwatijan ni mbil ja Nzamb kudi kuwamp kudi awiy ap bwat. Amwing alikin kal ni uyakin. Chawiy ukutwish kwakam anch ang mwaney wasambish kumusadin Yehova, ukutwish kushadish kand rukat rend radiay nich mulong wa uyakin. Mwaney ukutwish kwikal mudi in Kristu amwing a mu Efes a mu mivu chitot ya  kusambish. Yesu walonda piur pau anch: “Ey washil kal rukat rey ruwading nich pa kusambish.” (Kujingunik 2:4, TMK) Mutapu ik ukutwisha kumukwash mwaney kulam rukat rikash ni ‘kukul mulong wa dipandish’? (1 Pita 2:2) Tukutwish kwilejin ku chilakej cha Timote.

3. (a) Mutapu ik wikalay Timote mwin Kristu, ni yom ik yasalay nich yom yilejay? (b) Yom ik yisatu ya kwilej yamulejau Timote kudi Paul?

³ Kambuy Paul waya kapamp ka kusambish ku Listre mu muvu wa 47. Chisu chinicha Timote wading uchidi kal nsand ni wileja piur pa mafundish ma Yesu. Wasadina yom yilejangay, ni kupwa kwa mivu yaad wasambisha kwendangan ni Paul. Piswimp mivu 16 kupwa, Paul wamufundina Timote anch: “Pakwez ey, dandamen mu malejan miwileja ni mu yom yiwitiyija anch yidi yakin, wij kand anany akuleja yom yiney. Kudiokal ku wanikanch wey, ey wij kal Mikand Yitumbila [Mifund ya Hebereu], yawiy yikweta ukash wa kukwinkish ey manangu chakwel upandila ku ritiy mu Kristu Yesu.” (2 Timote 3:14, 15) Ijik anch Paul walonda anch Timote (1) wading wij mifund yitumbila, (2) witiyija yom yamufundishau, ni (3) wikala ni manangu mulong wa dipandish kusutin ritiy mu Yesu Kristu.

4. Yom ik wasadina mulong wa kuyifundish aney akemp? (Tal chipich cha kwisambishin.)

⁴ Chiudia nvaj mwin Kristu, ukukat anch mwaney ijika mifund yitumbila, yidia nlel unou Mifund ya Hebereu ni Mifund ya Grek ya win Kristu. Ap anch achidi kal an akemp nakash akutwish kwilej piur pa antu ni yom yidia mu Bibil. Dirijek dia Yehova diletin mabuku mavud, mabroshir ni mavideo makutwishau anvaj kusadin mulong wa kuyikwash anau. Pakach pa yom yiney, yisu yidiaku mu dizu dien? Mwaney ukwet kuswir kwa kwijik yom yidia mu Bibil chakwel akasikesha urund wend ni Yehova.

5. (a) Kulond anch “yom witiyija” chirumburikin ik? (b) Mutapu ik twija anch Timote witiyija rusangu ruwamp piur pa Yesu?

⁵ Chifanyidinap kwau ching kwimen pa kuyifundish aney piur pa antu ni piur pa yom yidia mu Bibil. Vurik anch Timote niyend “witiyija.” Mazu ma Grek masadidinay Paul marumburikin anch “kwikal nich kashinsh ka” ap “kwitiy uyakin umwing wa yom kampand.” Timote wading wij Mifund ya Hebereu “kudiokal ku wanikanch,” chinech chirumburikin anch chisu chadingay kamu mwanikanch nakash. Kupwa, ndiy wikala kand nich kashinsh anch Yesu wading Mesia. Ritiy ra Timote rakasikana, chawiy watambula dibatish ni wasala mudimu pamwing ni Paul mudi mishoner.

6. Mutapu ik ukutwishanya kuyikwash anen chakwel akasikesha ritiy rau mu Dizu dia Nzamb?

⁶ Mutapu ik ukutwishanya kuyikwash anen chakwel akasikesha ritiy rau mudi mwasalay Timote, chakwel niyau ‘itiyija’? Chakusambish, shimpishany muchim. Chitin chisu mulong wa kukasikesh ritiy. Chirumburikinap anch ang en witiyijan chom, anen niyau  akuchitiyij kapamp kamwing. Mwan ni mwan ukwet kuswir kwa kusadin ‘usu wa manangu’ mend mulong wa kukasikesh ritiy mu Bibil. (Tang Rom 12:1.) Chiudia nvaj, ukutwish kusal yom yivud chakwel uyikwasha aney kukasikesh ritiy rau, pakampwil chisu chikwipwilau yipul. El tumanany yom tukutwisha kwilejin ku chilakej cha takukwam umwing.

7, 8. (a) Mutapu ik wamekeshay tatuku umwing mwin Kristu kushimpish muchim chisu chamufundishangay mwanend changadim? (b) Chisu ik ufanyidina kushimpish muchim mulong wa mwaney?

⁷ Thomas, wadinga ni mwanend changadim ukweta mivu 11, ulondin anch yisu yimwing wangipulang yipul mudi ey: “Ov, Yehova wasadina dikarumuk chakwel mwom udandamena kwikalaku panap pa divu?” ap “mulong wak tukatap kwiyandjik mu yisak ya antu, pakampwil mudi kusal vot, chakwel tusal usu wa kuwapish yom?” Yisu yimwing, walikang kumulej mwanend yom ya kwitiyij. Thomas wijika anch yom yikutwisha kusal anch muntu itiyija uyakin chidiap kumulej yom yijim nakash, pakwez tudi kwau tuyom tukemp tuvud tuletina uman.

⁸ Thomas wij kand anch uswirikedin kushimpish muchim chakwel amufundisha mwanend changadim. Mu win yakin, in Kristu awonsu afanyidin kushimpish muchim. (Kolosay 3:12) Thomas wij anch chifanyidin pasuta chisu ni ufanyidin kwambamb nakash ni mwanend changadim chakwel amukwasha kukasikesh kashinsh kend. Ufanyidin kand kutongijok ni mwanend pa yom yilejinay mu Bibil. Thomas ulondin anch: “Chisu tukata kwilej yom ya usey, am ni mukajam tukat kusal usu pakampwil wa kwijik anch mwanetu changadim witiyijin yom yilejiningay ni anch uyovil kamu kurumburik. Anch ukwet yipul ya kwipul, chidi chom chiwamp nakash. Chakin kamu, nikat kwiyakamish anch witiy yom kanang pakad kwipul yipul.”

9. Mutapu ik ukutwishanya kuyikwash anen kwitiyij mu Dizu dia Nzamb?

⁹ Anch anvaj afundish nich kushimpish muchim, mu kusut kwa chisu anau akusambish kutesh “kujimb . . . , ni kulep, ni kulep kwa kuya piur, ni kulep kwa kukurik pansh” kwa ritiy. (Efes 3:18) Tukutwish kuyifundish kukwatijan ni mivu yikwetau ni ronganyin rau. Padandamedina kukasikan ritiy rau mu yom yilejinau, chikutwish kuyiswapel kulondin piur pa yitiyij yau kudi antu akwau, pamwing kand nau arund nau a ku shikol. (1 Pita 3:15) Chilakej, ov, mwaney ukutwish kusadin Bibil chakwel arumburila yom yikata kushikenang anch muntu wafa? Uteshin nawamp yom yirumburilay Bibil? * (Tal mazu ma kwinshin.) Vurikany anch ufanyidin kwikal ushimpishina muchim mulong wa kumukwash mwaney kukasikesh ritiy mu  Dizu dia Nzamb, pakwez chidi cha usey kusal mwamu.—Kuvurik Yijil 6:6, 7.

10. Yom ik yifanyidina kwikal ya usey mu mafundish men?

¹⁰ Chakin, yilakej yen yidi kand ya usey nakash mulong wa kuyikwash anen kukasikesh ritiy rau. Stephanie, maku ukweta an ayangadim asatu ulondin anch: “Kudiosh anam achidi akemp, nading kwiyipulang anch, ‘Nikat kuyilej anam mulong wak am nikwet kashinsh anch Yehova udiaku, piur pa rukat rend ni piur pa jinjil jend jintentamina? Anam amening kamu patok anch am nimukatin kamu Yehova?’ Nikutwishap kuchingejin anch anam itiyija chom kanang anch am nichitiyijinap.”

11, 12. Manangu chom ik, ni mutapu ik twija anch kwikal ni manangu chidiap kwau ching kulondwish mivu yikwetay muntu?

¹¹ Twilejin anch Timote wading ni (1)  ronganyin ra Mifund ni (2)  wading nich kashinsh mulong wa yom yitiyijay. Pakwez chom ik chakimbay Paul kulond palonday anch mifund yitumbila yikutwish kusal anch Timote ikal ni “manangu mulong wa dipandish”?

¹² Buku Étude perspicace des Écritures, Volim 2, urumburil anch mu Bibil, manangu udi “ukaliweny wa kusadin nawamp ronganyin ni kutesh yom nawamp mulong wa kupwish milong, kwipuk ap kubabeshan mulong wa ubaj, kuwanyish mipak kanang, ap kuyiyul antu akwau mulong wa kusal yom yiney. Chinyim cha manangu udi usup.” Bibil urumburil anch “usup aukasidil mu muchim wa mwanikanch.” (Jinswir 22:15) Chawiy manangu chidi chinyim cha usup, manangu chidi chijingidij cha kuswa. Muntu ukat kuswa mu spiritu mulong umwovil Yehova wom ni umuziyidin, kadiap kwau mulong uyil kwikal ni mivu yivud.—Tang Kuseng 111:10.

13. Mutapu ik ukutwishau ansand kumekesh anch akwet manangu mulong wa dipandish?

¹³ Ansand aswila kal mu spiritu kadiap antu akatau ‘kusendolau kudi mambek, ap akupwepolau kudi rinkind kuya mutambu ni mutambu’ mu kukat kwau ayinau ap mulong wa yibachikin ya ansand akwau. (Efes 4:14) Pakwez, ‘usu wau wa kutond aufumbin kal mulong wa kwauril kuwap ni kuyip.’ (Hebereu 5:14) Chawiy akat kukwat mipak ya manangu, ap anch anvajau ap antu akwau apamina kal kayimenap. (Filip 2:12) Manangu ma mutapu winou madi ma usey nakash mulong wa dipandish. (Tang Jinswir 24:14.) Mutapu ik ukutwishanya kuyikwash anen kukudish manangu mudi minam? Ufanyidinany kwikal nich kashinsh anch ij yom ukwatinanya nich usey. Kusutin yom ulondinanya ni usadinanya, anen akuman anch usadinany usu wa kushakam kukwatijan ni mbil ja Yehova.—Rom 2:21-23.

14, 15. (a) Yom ik yifanyidinay kutongin nsand ukimbina kutambul dibatish? (b) Mutapu ik ukutwishanya kuyikwash anen kutongijokin pa yiyukish yidiokiling ku kuziyin yijil ya Nzamb?

¹⁴ Chawiy, mulong wa kuyikwash anen chakwel akasikesh ritiy, chitinap kwau kuyilej  yom yidia yiwamp ni yidia yiyimp. Uswirikedinany kand kuyikwash atongijokina pa yipul mudi yiney: ‘Mulong wak Bibil ujidikin yom yimekena anch yisangareshin? Mutapu ik nikutwisha kwikal nich kashinsh anch mbil ja Bibil jiding ching jiwamp kudi am?’—Isay 48:17, 18.

¹⁵ Anch mwanen ukatin kutambul dibatish, mukwashany kand mulong atonga nawamp piur pa yisend yidiokila ku kutambul dibatish. Mutapu ik wiyovilay piur pa yisend yiney? Kutaninamu ik kudiaku? Yakamish ik yidiamu? Mulong wak kutaninamu kudi kwa usey nakash kusutamu yakamish? (Marko 10:29, 30) Chidi cha usey nakash kutongijokin pa yom yiney nawamp kurutu kwa kutambul dibatish. Mukwashany mwanen kutongijokin pa yiyukish ya kuziyin ni pa yibudikin yiyimp ya kubwambwil. Chawiy, ukukat nakash kwitiyij anch kulondul mbil ja Bibil chisu chawonsu kudi kuwamp kudi ndiy.—Kuvurik Yijil 30:19, 20.

16. Yom ik yikutwishau anvaj kusal anch anau atambwila kal dibatish asambish kuziy mu ritiy?

¹⁶ Yom ik ukutwishanya kusal anch anen asambish kwidjidjek piur pa uyakin kupwa kwa kutambul dibatish? Chilakej, mwaney ikundj ap changadim ukutwish kwikal upwitinau ku yom yidia mu mangand. Ap  mwanen ukusambish kwidjidjek anch kulondul mbil ja Bibil kudi kuwamp mu mwom wend ap bwat. (Kuseng 73:1-3, 12, 13) Mutapu ukusalanya ukutwish kusal anch adandamena kumusadin Yehova ap bwat. Kangal kutend ni mwanen piur pa yom yiney, ap anch uchidi kal mukemp ap anch wabarik kal usand. Pakwez, ikalany nich kashinsh anch wij anch umukatinany ni ukatinany kumukwash.

17, 18. Anch nsand widjidjekin, mutapu ik ukutwishau anvajend kumukwash?

¹⁷ Nsand utambwila dibatish wipanin kamu kudi Yehova. Mwamu washilamu kal kumukat ni kumusadin ndiy kusutamu yom yawonsu. (Tang Marko 12:30.) Yehova ukat kuman anch kwipan kwinoku kudi kwa usey nakash, niyetu mwawiy tufanyidina kuman kwipan kwinoku. (Mulej 5:4, 5) Muvurisha mwaney chom chinech. Pakwez chakusambish, tang ni ileja yom yiletinau kudi dirijek dia Yehova mulong wa kuyikwash anvaj. Kupwa, mu mutapu uwamp ni pa chisu chiwanyidina, muleja mwaney anch mupak wa kwipan amwinend kudi Yehova ni kutambul dibatish udi wa usey nakash, pakwez ukumuletin yiyukish yivud.

¹⁸ Chilakej, ukutwish kutan yiyul yiwamp mu apendis ulondina anch “Les parents s’interrogent,” pa nyim pa buku “Les jeunes s’interrogent. Réponses pratiques,” Volim 1. Uyiyudin anvaj anch kafanyidinap kutong swa swa anch anau alik kal uyakin, pakwez afanyidin kujingunin mulong ik uyishikijina kusal mwamu. Mulong winou ukutwish kwikal yibachikin ya akwau ap kwiyov anch adi ayinau. Ap mwan ukutwish kwiyov anch akwau asadin yom yivud mu mudimu wa Yehova kusutamu ndiy. Apendis urumburil kand anch milong yiney yimekeshinap anch mwaney kakatinap yitiyij yey. Yikutwish kwikal yibudikin ya milong yimwing yirishinay nich. Apendis upanin kand yiyul piur pa mutapu ukutwishau anvaj kuyikwash anau idjidjekina piur pa uyakin.

19. Mutapu ik ukutwishau anvaj kuyikwash anau kwikal ni ‘manangu mulong wa dipandish’?

¹⁹ Chiudia nvaj, ukwet chisend cha usey nakash cha ‘kuyikand ni kuyibabesh nich malejan ma Yehova.’ (Efes 6:4) Mudi mutwileja kal, chinech chirumburikin anch ufanyidin kuyifundish aney yom yilondinay Bibil ni kuyikwash ikala kamu nich kashinsh ka yom yilejinau. Anch ritiy rau rakasikan, akwikal chad abachikinau kwipan ayinau kudi Yehova ni kumwinkish yom yau yiwamp. El Dizu dia Yehova, spiritu wend ni usu wen yiyikwasha anen mulong wa kwikal ni ‘manangu mulong wa dipandish.’