1. Yom ik yikatinau anvaj kusal mulong wa anau?

 ANVAJ, twij anch ukatinany kuyikwash anen kumwijik Yehova ni kumukat. Pakwez tukutwishap kumuman Nzamb ku mes. Mutapu ik ukutwishanya kuyikwash anen kuman anch udiaku kamu chakin ni kumusejin piswimp?​—Jak. 4:8.

2. Mutapu ik ukutwishau anvaj kuyifundish anau piur pa mikadil ya Yehova?

² Mutapu wa usey ukutwishau anvaj kuyikwash anau kumusejin Yehova piswimp ud kusutin kwilej nau Bibil. (2 Tim. 3:14-17) Pakwez Bibil ulejen kand mutapu ukwau ukutwishau an kwilej piur pa Yehova. Mu buku wa Jinswir isambidinamu tatuku umuvurishina mwanend kudandamen kushinshikin mikadil ya Yehova yimekena mu yitang. (Jnsw. 3:19-21) Tukushinshikin mitapu yimwing mukutwishau anvaj kusadin yitang mulong wa kuyikwash anau kwilej piur pa Yehova.

3. Mutapu ik ukutwishau anvaj kuyikwash anau?

³ Bibil ulondin piur pa Nzamb anch: “[Mikadil] yend yakad kumekan ku mes . . . yamekana patok mu yom yatangay.” (Rom 1:20) Anvaj, chakin kamu ukatiningan kuya mu kwendangan pamwing ni anen mulong wa kwipuwangej. Sadinany chisu chinech mulong wa kuyikwash anen kuman kukwatijan kudia pakach pa “yom yatangay” Nzamb ni mikadil yend. Mulong wa kusal mwamu, el tumanany yom yikutwishau anvaj kwilejin ku chilakej cha Yesu.

4. Mutapu ik wasadinay Yesu Yitang mulong wa kuyifundish in kwilejend? (Luka 12:24, 27-30)

⁴ Tal mutapu wasadinay Yesu yitang mulong wa kufundish. Dichuku dimwing, Yesu wayileja in kwilejend kutal ankwaj ni yisalamb ya mu masuku. (Tang Luka 12:24, 27-30.) Yesu wafanyina kwend kujimbul nnam win mwawonsu ap kajil win mwawonsu. Pakwez watonda kusadin chilakej cha kajil ni yisalamb yading yijau in kwilejend nawamp. In kwilejend ading ni mutapu wa kuman mutapu usutangenau ankwaj mwiur ni mutapu ubikitina yisalamb mu masuku. Tukutwish kutong anch Yesu wading ukat kwilik chikas ku yom yiney pading palondinay. Yom ik yasalay kupwa kwa kujimbul yilakej yiney? Wayifundisha in kwilejend dilejan dia usey nakash piur pa mutapu utubangidiningay Yehova ni udingay mwin kupan: Yehova ukuyidish ni kuyidjik atushalapol end ashinshamena mud mutapu ukatay kuyidish ankwaj ni kuyidjik yisalamb ya mu masuku.

5. Yilakej ya yitang ik yikutwishau anvaj kusadin mulong wa kuyifundish anau piur pa Yehova?

⁵ Anvaj, mutapu ik ukutwishanya kwimburij chilakej cha Yesu chisu uyifundishinanya anen? Chilakej, ukutwish kumulej mwaney chitang chimwing ukatining nakash, mud mutond ap nnam ukatining nakash. Kupwa, sal usu wa kumurumburil yom twilejina piur pa Yehova kusutin chitang chinech. Ni mwipula mwaney nnam ik ap mutond ik ukatiningay nakash. Anch wasadin chitang chijay mwaney nawamp, ukutwish kuta matu nakash paumurumburidina piur pa mikadil ya Yehova.

6. Yom ik tukutwisha kwilejin ku chilakej cha makwend a Christopher?

⁶ Ov, anvaj afanyidin kamu ching kukimb nnam ap mutond wa pakampwil mulong wa kuyifundish nich anau piur pa Yehova? Bwat kwau. Yesu kalondolap yom yivud mulong wa kurumburil mutapu udilingau ankwaj ni mutapu upamining yisalamb. Ap anch mwaney ukatining kwilej yom yivud piur pa yom yatangay Yehova, yisu yimwing chitin kwau kulond yom yikemp ap kwipul ka chipul mulong wa kumulej mwaney dilejan ukimbina kumufundish. Pavurikinay padingay mwanikanch, mukadivar Christopher ulondin anch: “Maku walondang kwend yom yikemp mulong wa kutukwash kudiosh malejan ku yitang. Chilakej, anch tud piswimp ni mukandu watwelang anch: ‘Talany mikandu kujimb ni kuwap! Ov, umenanyap anch Yehova ud Nzamb ushimokishena nakash?’ Ap anch tud ku karung, watwelang anch: ‘Talany mutapu mambek mezina ni usu! Ov, umenanyap anch Nzamb ud mwin dikand?’” Christopher ulondin anch: “Mazu minam makemp matutongishang nakash.”

7. Mutapu ik ukutwisha kuyifumb aney kutongijokin pa yitang?

⁷ Payilau aney mu kupam, ukutwish kuyifumb kutongijokin chikurikina pa yitang ni kwilejinaku mikadil ya Yehova. Ukutwish kujimbul chitang chimwing cha Nzamb ni kupwa wamwipul mwaney anch: “Chitang chinech chikufundishin ik piur pa Yehova?” Yom yikukulejau yikutwish kukushimokish.​—Mat. 21:16.

8. Anvaj in Isarel ading ni mutapu wa kusal yom ik chisu chendangau “mwi njil” nau anau?

⁸ Anvaj in Isarel ayileja kuyifundish anau yijil ya Yehova pendinau nau “mwi njil.” (Kuv. 11:19) Mwi ngand ya Isarel mwading jinjil jisutidina mu masuku. Chawiy, kwading mutapu wa kuman annam kushalijan, atujil, ni yisalamb. Pendangau anvaj in Isarel nau anau mu jinjil jinej, ading ni mutapu wa kuyifundish piur pa Yehova. Niyen anvaj  ukwetan pamwing ap mitapu mud yiney ya kusadin yitang mulong wa kuyifudish anen. Shinshikin mutapu watwishau anvaj amwing kusal mwamu.

9. Chilakej cha Punitha ni Katya chikufundishin ik?

⁹ Punitha, maku umwing ushicha mu musumb ujim mwi ngand ya Inde ulondin anch: “Chisu tukata kuya kuyital anamakwetu ading ku makunku, tukat kusadinang chisu chinech mulong wa kuyifundish anetu piur pa yitang yisangareshina ya Yehova. Nimen anch anam akat kushinshikinang nawamp yitang anch kadiap mu musumb mudia motak yivud ni mu jinjil mudia antu avud.” Anvaj, ijikany anch anen kakez kavuramenap yisu yiwamp ukata kusutishany nau pamwing ku jindond jiwamp. Nambaz Katya wa mu Moldavi ulondin anch: “Yom yiwamp nakash ya kuwanikanch wam nivurikining yid yisu yiwamp nasutisha nau anvajam mu masuku. Niyijikitishin nakash anvajam mulong wa kwinfundish kudiosh ku wanikanch wam kwikal ni chaku cha kwiman ni kushinshikin yom yatangay Yehova mulong wa kumwijik kusutin yitang.”

10. Yom ik yikutwishau anvaj kusal anch kakwetap mutapu wa kubudik pol pa musumb? (Tal mushet “ Ukwash Mulong wa Anvaj.”)

¹⁰ Yom ik ukutwisha kusal anch ukwetap mutapu wa kwendangan? Amol, ushicha niyend mwi ngand ya Inde ulondin anch: “Kwi ndond tushicha, anvajam akat kusal mudimu mu asaa avud, ni chitin nfalang jivud mulong wa kwendangan mu masuku. Pakwez, ukutwish kuman yitang ya Yehova ni kuyisadin mulong wa kuyirumburil aney piur pa mikadil yend, anch waya mu kwendangan mu park ap anch ud kwiur kwa chikumbu cha etaj.” Anch washinshikin nawamp, ap kwol kwey ukutwish kuman yitang yivud ukutwisha kuyilej aney. (Kus. 104:24) Ukutwish pamwing ap kuman atujil, atupopu, mitond, ni yom yikwau kand. Karina, wa mu Alemany ulondin anch: “Maku  ukatining nakash yisalamb, chawiy panading mwanikanch, anch tuyil nend wangisikinang yisalamb yiwamp.” Anvaj, kud mavideo ni mikand yivud yibudishinau kud dirijek yisambidina piur pa yitang ukutwishana kand kusadin mulong wa kuyifundish nich anen. Inge, chikalap nchik ndond ushicha, ukutwish kuyikwash aney kushinshikin yitang ya Nzamb. El katat twisambinany mikadil yimwing ya Yehova ukutwisha kuyifundish aney.

11. Mutapu ik ukutwishau anvaj kuyikwash anau kujingunin rukat ra Yehova?

¹¹ Mulong wa kuyikwash aney kuman rukat ra Yehova, ukutwish chilakej kwisambin mutapu ukatau annam avud kuyibangin anau nich rukat. (Mat. 23:37) Ukutwish kand kujimbul yitang kushalijan tukata kusanger nakash. Karina twajimbulang kwiur oku ulondin anch: “Patwayangang mu kwimanijan ni maku, wankasikeshang kwiman ni kutal mutapu chisalamb ni chisalamb chishalijadina ni chikwau ni mutapu ufun way umekeshina rukat ra Yehova. Djat ni nlel, nikat kudandamen kushinshikin yisalamb​—kushalijan kway, mutapu wayisalau, ni ulombu way. Yikat kudandamen kwinvurish anch Yehova utukatin nakash.”

12. Mutapu ik ukutwishau anvaj kuyikwash anau kujingunin manangu ma Nzamb? (Kuseng 139:14) (Tal kand chipich.)

¹² Yikwasha aney kujingunin manangu ma Nzamb. Yehova ukwet manangu nakash kutusutamu etu. (Rom 11:33) Chilakej, ukutwish kumurumburil mwaney mutapu ukata mem kutwik ni kusal madj, ni mutapu madj minam makata kushemunok pakad kusal usu ap ukemp. (Job 38:36, 37) Ukutwish kand kumulej piur pa mutapu ushimokishena watangau mujimbu wa muntu. (Tang Kuseng 139:14.) Shinshikin mutapu tatuku umwing utazukinau anch Vladimir wasalay mwamu. Ulondin anch: “Dichuku dimwing, mwanetu wawa ni nking ni wijipa chitat. Kupwa kwa machuku makemp, chitat chinech chaya. Am ni mukajam twamurumburila mwanetu anch Yehova watanga mujimbu wetu nich ukaliweny wa kwiyok awinau. Kupwa twamuleja anch ukutwishap kuman ukaliweny winou mu yom yisadinau antu. Chilakej, anch motak wasal aksidan, ukutwishap kwirijek awinau. Yom yiney yamukwasha mwanetu kujingunin manangu ma Yehova.”

13. Mutapu ik ukutwishau anvaj kuyikwash anau kujingunin usu wa Nzamb? (Isay 40:26)

¹³ Yehova utwitin kutal mes mwiur ni kutongijokin pa usu wend ushimokishena uyilamina atutumbu awonsu mu rinzwizu. (Tang Isay 40:26.) Ukutwish kuyikasikesh aney kutal mwiur ni kutongijokin pa yom yimenau. Nambaz Tingting wa mu Tayiwan, uvurikin padingay mwanikanch anch: “Dichuku dimwing twalala ni maku mu masuku ni twamana atutumbu nawamp, mulong kwadingap kasu ka mu misumb yijim kakata kutukangesh kuyiman nawamp. Pa chirung chinicha nading niyakamishin nakash mulong wa yibachikin yiyimp ya arunam ni niyipula anch nikutwish kudandamen kumusadin Yehova nich kushinshaman. Maku wankasikesha kutongijokin pa usu wasadinay Yehova mulong wa kutang atutumbu inay awonsu ni wanvurisha anch ukutwish kand kusadin usu wend mulong wa kwinkwash kushal ushinshamena. Kupwa kwa kushinshikin yitang mu weny winou twasala, yambachika kwilej kumwijik nawamp Yehova, ni yankasikesha kudandamen kumusadin.”

14. Mutapu ik ukutwishau anvaj kusadin yitang mulong wa kuyikwash anau kuman anch Yehova ud Nzamb wa musangar?

¹⁴ Yitang yimekeshin anch Yehova ud Nzamb wa musangar ni ukatin anch niyetu twikal ni musangar. In siyans ajingunin kal anch annam avud akat kusenganang, ap ansh ni atujil. (Job 40:20) Ov, wayimenap kal aney akat kusip patadinau mutapu usengenau annam? Pamwing ap amana kan a kamesh kakat kusengan ni kadundu ap twan a kabu tukat kusengan. Anch wayiman kand aney akat kusip patadinau mutapu usengenau annam, yivurisha anch Nzamb tusadidina ud Nzamb wa musangar.​—1 Tim. 1:11.

15. Yom ik yikutwisha kuyikwash anvaj kujingunin yom yitonginau anau? (Jinswir 20:5) (Tal kand chipich.)

¹⁵ Yisu yimwing, chikutwish kuyikasiken anvaj kwijik milong yirishinau nich anau. Anch chid mwamu, ukutwish kuswiriken kwijik yom yitonginau aney. (Tang Jinswir 20:5.) Chiyiswapedining anvaj amwing kusal mwamu chisu chisangaredinau yitang pamwing  ni anau. Mulong wak? Diyingishin dimwing did anch mu yisu mud yiney, kwikiling kampuw nakash kud anvaj ni kud an. Masahiko, tatuku umwing wa mu Tayiwan ulejen diyingishin dikwau. Ulondin anch: “Pitukata kusutish chisu pamwing nau an mu kwendangan ku mikandu ap ku chikum cha kawit—akat kwiyovang nawamp nakash. Chawiy chikat kutuswapel kwisamb nau ni kujingunin yom yitonginau.” Katya twisambinang ulondin anch: “Anch twabudik ku shikol, maku wantwalang mu park muwamp. Mu chisu chinech tudia mu chisambu, chanswapelang kumulej yom yawonsu yasutang ku shikol ni yading yingakamishina.”

16. Mutapu ik ukutwisha majuku kwipuwangej ni kusangar pasangaredinau yitang ya Yehova?

¹⁶ Yitang ya Yehova yikutwish kand kukwash majuku kwipuwangej ni kusangar pamwing, ni chinech chikutwish kukasikesh uumwing pakach pau. Bibil ulondin anch “kudi chisu chikwau cha kusip” ni “kudi chisu chikwau cha kuja maj.” (Mul. 3:1, 4) Kusutin yitang yend, Yehova watwinkishin kal jindond jiwamp nakash mu tukutwisha kwipuwangejin. Majuku mavud makatining kusutish chisu pamwing mu masuku, ku mikandu, ap ku kawit. An avud akatining kusengan mu park, kutal annam, ap kwisay ku kawit, ku dijiy dijim, ap kand ku karung. Tukwet mitapu yivud ya kwipuwangej nich yitang ya Yehova!

17. Mulong wak anvaj afanyidin kuyikwash anau kusanger yitang ya Nzamb?

¹⁷ Mwi ngand yisu ya Nzamb, anvaj ni an akusanger yitang ya Yehova kusutamu katat. Pinipa, tukuyovap kand annam wom; niyau kakutwovap kand wom. (Isay 11:6-9) Tukusanger yitang ya Yehova chikupu ni chikupu. (Kus. 22:27) Pakwez en anvaj, kangal wachingelany anch ching chisu chinicha chashik chakwel lel chad usambishany kuyikwash anen kusanger yitang. Anch wasadinany yitang mulong wa kuyikwash anen kumwijik Yehova, akutwish kwiyov mud mwiyovay Mwant David walonda piur pa Yehova anch: “Kwikil kand midimu yidia mud yeyey.”​—Kus. 86:8.