Anch ukimbin kumwijik muntu kanang nawamp, chiding cha usey kwijik bil yom yasalay kal ni milong yapandakanay kal. Chilik chimwing kand, anch ukimbin kumwijik Nzamb nawamp, ufanyidin kwilej piur pa yom yasalay kal. Piusadina mwamu, ukutwish kushimwok piukujingunina yom yasalay kal pasak mulong wa kutaninamu kwetu nlel ni mu machuku ma kurutu.

Yehova Nzamb udi Sakatang Mujim ni “kudiokal patangay Nzamb ngand, [mikadil] yend yakad kumekan ku mes, charumburik anch, ukash wend wa chikupu ni wiNzamb wend, yamekana patok mu yom yatangay.” (Rom 1:20) ‘Yehova watanga divu nich usu wend. Watanga kand ngand ku manangu mend, chad watangurila maur.’ (Jeremiy 10:12) Kusutil ku yitang yend yishimokishina yatangay kutukwashin twijika anch komb Nzamb utubangidining.

Shinshikin mutapu watangay Yehova mwom wetu mu mutapu wa pakampwil kusutil ku kuyitang antu “mu chifu chend.” (Disambishil 1:27) Chinech chirumburikin anch wasala anch chituswapela kumekesh mu mitapu kanang mikadil yend yishimokeshina. Watutanga nich mikadil ya mu spiritu ap ukaliweny wa kutesh yitongijok yend ni kuyikwat nich usey. Anch twashakam kukwatijan nich mikadil yiney, tukwikal ni musangar wakin ni mwom uwamp. Chikwau kand, watwinkisha mutapu wa kukudish urund wetu wa piswimp ni ndiy.

Pitukata kushinshikin yom yatangay Nzamb yidia pa divu, twiyoviling kamu anch ukat kutubangin. Paul walonda anch Nzamb “wimekesha ku yom yiwamp yasalay. Ndiy ukat [kutunakishin] ruvul, ni [kutwinkish] chirung cha kwangul, ukat [kutwinkish] yakudia, ni kwizwish michim [yetu] nich musangar.” (Midimu 14:17) Nzamb utwinkishining yom yivud nakash kusutamu kwau ching yom tukweta nich kuswir mulong wa mwom wetu. Ndiy watwinkisha yakudia yivud yidia yiwamp nakash ni yishalijadina chakwel tusangera mwom. Pakwez kudi yom yivud nakash yimekeshina anch Nzamb ukat kutubangin.

 Yehova watanga divu chakwel antu ashakamap chikupu. Bibil ulondin anch: “Divu wadipana kudi an a antu,” ni ‘ndiy kaditangap kwikal ndond yamwamu, pakwez waditanga chakwel antu ashakamap.’ (Kuseng 115:16, TMK; Isay 45:18) Anany akushakama pa divu ni mu machuku minch? ‘In kutentam awonsu akez kaswan divu, akez kashakamap chikupu.’​—Kuseng 37:29.

Chakin kamu, Yehova wamutanga ikundj ni mband wa kusambish, Adam ni Ev ni wayiteka mu paradis pa divu mulong wa ‘kudidim, ni mulong wa kudilam.’ (Disambishil 2:8, 15) Nzamb wayinkisha yisend yaad yisangareshina, wayileja anch: “Valijanany, . . . vulijanany izwishany ngand ni kuyiziyish.” (Disambishil 1:28) Chawiy Adam ni Ev ading ni ruchingej ra kushakam chikupu pa divu. Cha ushon chidi anch awiy amubwambwila Nzamb ni mulong wa diyingishin dined, awiy ashadisha ruchingej rau ra kwikal pakach pa ‘in kutentam’ akeza ‘kuswan divu.’ Pakwez, mudi tukumana, yisal yau yaswimpap chitongijok chadingay nich Yehova mulong wa divu. Chakusambish, el tushinshikinany yom yimwing yasadinay kal Nzamb.

Bibil wijiken kand anch udi Dizu dia Nzamb. Mulong wak Yehova watwinkisha Bibil? Chakusambish chidi mulong twileja piur pend. (Jinswir 2:1-5) Chidi chakin anch Bibil kakwilingap ku yipul yin yawonsu tukata kwiyipul piur pa Nzamb—ni kwikil kand buku ap umwing ukutwisha kwakul ku yipul yin yawonsu. (Mulej 3:11) Pakwez, yom yawonsu yidia mu Bibil yitukwashining chakwel tumwijika Nzamb. Twaman kal mutapu udingay Nzamb ni mutapu ukatay kuyibangin antu. Twilej kal antu a mutapu ik akatiningay ni akisiningay Nzamb. (Kuseng 15:1-5) Twilej kal chitongijok chend piur pa mutapu wa kumwifukwil, yom yikatiningay ni piur pa yom yatangay. Bibil utulejin patok mikadil ya Yehova kusutil yom yalonday ni yasalay Mwanend Yesu Kristu.​—Yohan 14:9.

Diyingishin dikwau diasala anch Yehova atwinkisha Dizu diend Bibil didi anch twijika mutapu wa kwikal ni mashakamin masangareshina, ni kwijik chitongijok cha mwom. Kusutil Bibil, Yehova utulejin mutapu wa kwikal ni dijuku disangareshina, mutapu wa kusanger yom tukweta ni mutapu wa kurish nich yakamish. Ni mudi mwarumburilangau mu gazet winou, Bibil ukwet yakul ku yipul ya usey ya mwom mudi: Mulong wak kudi mar nakash mwamu? Machuku ma kurutu makwikal mutapu ik? Bibil ulejen kand yom yasalay kal Nzamb mulong wa kuwanyish chitongijok chend chadingay nich kwinsambishil.

Kudi mitapu yikwau yivud yimekeshina anch Bibil udi buku wa pakampwil ni anch muntu wamufundikisha udi ching Nzamb. Amufunda mu mivu 1600 ni kusut kudi antu piswimp 40, ni wisambidin pa mutu wa mulong umwing mulong Nzamb ndiy Wamufundikisha. (2 Timote 3:16) Chinyim ni mabuku makwau ma pasak, Bibil amulama kamu mu kusut kwa mivu, mudi yimekena kamu patok kusutin tunan twa ma maniskri ma pakur ma Bibil. Bibil udandamedin kwikalaku chikalap nchik usu wasalau mulong wa kumujiyish, kukangesh kumukarumun, kumwangan ap kumutang. Nlel unou, Bibil udi buku upalangeshinau ni ukarumwinau nakash. Kwikalaku kwa Bibil kumekeshin patok anch ‘dizu dia Nzamb wetu dishich chikupu.’​—Isay 40:8.

Chikwau kand, chitongijok cha Nzamb chidi cha pakampwil mulong chitukwashin kwijik anch Nzamb utukanin anch ukusal yom kanang mulong wetwetu. Mudi mwalejanangau kwinsambishin, Nzamb wakata anch antu ashakama chikupu pa divu. Pakwez, pamubwambwilau Nzamb kudi Adam kusutil kusal chitil, Adam washadisha ruchingej radingay nich ra mwom wa chikupu kadiap ching kudi ndiy amwinend pakwez ni kudi anend afanyina kuvadik. “Chawiy mudi chitil chandama mu mangand [kusutil] muntu umwing, ni rufu randama mulong wa chitil, chawiy rufu rashika kudi antu awonsu mulong antu awonsu asala chitil.” (Rom 5:12, TMK) Mulong Adam wamubwambwila Nzamb kusutil kusal chitil, chamekana mudi anch chitongijok cha Nzamb mulong wa divu chakimbap kuwanyin. Mutapu ik wasalay Yehova?

Yom yasalay Yehova yading yikwatijadin ni mikadil yend. Wamufisha nich Adam ni Ev kusutin ku yisal yau, pakwez rukat rend rawiy ramubachika chakwel atenchika yom yikwau yikusalay mu machuku ma kurutu mulong wa an a Adam afanyina kuvadik. Kusutin manangu mend, Yehova wakwata mupak wa kupwish mulong winou ni kapamp kamwing walejana mutapu wafanyinay kupwish mulong winou. (Disambishil 3:15) Mutapu wa kudiosh chitil ni rufu wading wa kumupan Mwan a Nzamb, Yesu Kristu. Yom yiney yading yitin ik?

 Mulong wa kuyikwol antu ku yibudikin yiyimp ya kubwambwil kwa Adam, Yehova wamutuma Yesu pa divu mulong wa kuyifundish antu mutapu wa kwikal mwi njil ya mwom wa chikupu ni “kupan kand mwom wend mulong wa kuyikwol antu avud.” * (Mateu 20:28; Yohan 14:6) Yesu ndiy wafanyina kupan difut mulong wading muntu uwanyidina mudi mwadingay Adam. Pakwez chinyim ni Adam, Yesu waziyina kamu djat ni ku rufu. Ap anch Yesu kadingap kawanyidina kufa, pakwez wafa ni Yehova wamuvumbula mulong wa mwom mwiur. Yesu watwisha kusal yom yakanganyay Adam kusal​—kuyinkish antu aziyidina ruchingej ra mwom wa chikupu. “Mwamu kand, antu avud ikala in yitil mulong wa kubwambul kwa muntu umwing, chawiy chimwing kand, antu avud akez kwikal atentamina mulong wa kuziyil kwa muntu umwing.” (Rom 5:19) Kusutil chakupesh cha difut cha Yesu, Nzamb ukuwanyish kushilamu kwend chakwel antu ashakama chikupu pa divu.

Twilej kal yom yivud piur pa Yehova kusutil mutapu wasalay mulong wa kupwish milong yaletay Adam kusutil kubwambwil kwend. Twaman kal anch kwikil chom ap chimwing chikutwisha kumukangesh Yehova kuwanyish chitongijok chend chadingay nich kwinsambishin; mulong dizu diend didandamedining ‘kuwanyin.’ (Isay 55:11) Twilej kal kand mutapu utukatiningay Yehova nakash. “Talany mutapu watulejay Nzamb rukat rend, ndiy wamutuma Mwanend kapwokal mu mangand chakwel etu tutambul mwom wa chikupu kudi ndiy. Kurumburik kwa rukat rakin kwawiy oku, kiyet[wap] twamukata Nzamb, pakwez ndiy watukata etu, chad wamutuma Mwanend kwikal yakupesh ya kulikishin yitil yetu yawonsu.”​—1 Yohan 4:9, 10.

Nzamb “kamuchidijap Mwanend kapwokal, pakwez wamupana mulong wa kutufil etu,” chawiy tukwet kashinsh anch Nzamb ‘ukutwinkish yom yawonsu’ yakanay. (Rom 8:32) Yom ik yakanay Nzamb anch ukutusadin? Tang pa paj ulondwilaku ou.