Bibil upanin yiyul yiwamp ni ya ukwash ap anch kadiap buku wa chimwingang. Yiyul yiney yikutwish kumukwash muntu urishina ni milong ya ukash wa mu manangu. Shinshikin yilakej yimwing.

“Antu akash kakuswirinangap mwingang, ching kusu antu ayedila.”​—MATEU 9:12.

Bibil umekeshin patok anch tukutwish kwikal ni kuswir kwa kukimb ukwash wa chimwingang. Antu avud akweta milong ya ukash wa mu manangu atanin kal ukwash mu kwilej nsangu jakin jisambidina milong yau ni kusutil kuya kuyiman a dokter.

“Masengan ma mujimbu makwet usey.”​—1 TIMOTE 4:8.

Kusal yom kanang mulong wa kuwapish ukash wey wa mujimbu, kukutwish kukwash kand kuwapish ukash wey wa mu manangu. Pakach pa yom ukutwisha kusal pad kwijidish mujimbu chisu ni chisu, kudia nawamp ni kulal nakash.

“Muchim wa musangar udi mwon uwamp, pakwez muchim wa runeng ukat kuumish mafup.”​—JINSWIR 17:22.

Kutang maverse ma Bibil makasikeshina ni kwitekin mipak yiwamp ukutwisha kuwanyish kukutwish kukukwash kwikal ni musangar. Anch washinshikin pa yom yiwamp mu mwom ni witiyij anch yom yikuwap kwau mu machuku ma kurutu  kukutwish kukukwash kurish ni milong yey ya ukash wa mu manangu.

“In kwitudish akwet manangu.”​—JINSWIR 11:2.

Ukutwish kuman anch ukutwishap kusal chom chin chawonsu ukatina kusal amwiney, chawiy chid cha usey kwitiy ukwash wa antu akwau. Arund ni antu a mu dijuku akatina kukukwash kakutwishap kwijik yom yifanyidinau kukusadin. Chawiy chid cha usey kuyijikish yom yifanyidinau kukusadin mulong wa kukukwash. Kangal wachingej anch akusadin yom yivud nakash, ni ufanyidin kuyijikitish chisu chawonsu mulong wa ukwash wau.

“Nadingap niyovila nawamp ku mujimbu, chawiy naya kumanijan ni dokter. Watwisha kwinlej nawamp mayej mam. Chinech chankwasha kamu kwijik nawamp chom chading chimeshina mar ni kwilej milad kushalijan ya chimwingang nafanyina kusadin mulong wa kubangin ukash wam wa mujimbu.”​—Nicole a uyidina mayej ma mu manangu.

“Najingunina anch kutang Bibil chisu chawonsu pamwing ni mukajam, kwankwasha kusambish dichuku din diwonsu ni yitongijok yiwamp. Ni yisu yivud pinarishang ni mayej mam, kwading maverse mamwing mankasikeshang.”​—Peter, uyedina mayey ma kuziy mu manangu.

“Chankasikenang kuyilej antu akwau piur pa mayej mam mulong novang usany. Pakwez kwading murund wantesha nawamp ni wasala usu wa kwitek pa ndond yam. Wankwasha kamu kwiyov nawamp ni kwijik anch nadingap kwam amwinam.”​—Ji-yoo, urishina ni milong yimukangeshina kushinshikin uvud wa yom yidilay.

“Bibil wankwashin kwikal wisikena, kwiswedish mu chilik chiwanyidina ni kulik kusal mudimu nakash. Manangu madia mu Bibil mankwashin kurish ni yovil yiyimp.”​—Timothy, urishina ni yitongijok yiyimp.