YITONGIJOK piur pa mwom ni rufu yiding yivud ni yishalijadining. Antu amwing akat kutong anch kupwa kwa kufa akwikal kand aom, pamwing ap mu mutapu ukwau ap mwi ndond yikwau. Akwau akat kutong anch akuvadik kand kapamp kakwau mulong wa kwikalaku kand. Pakwez akwau niyau atongin anch rufu rawiy nsudiel ra yom yawonsu.

Niyey ukutwish kwikal ni chitongijok chey piur pa mulong winou, kukwatijadin ni mutapu wakulilau ap yinshakur ya kwol kwen. Mulong yitongijok piur pa yom yikata kushiken kupwa kwa rufu yishalijadin nakash, ov, kudi muntu ap ndond kampand tukutwisha kutan yakul yakin ni ya kuchingejin ku chipul chinech chikash?

Kudiosh mivu yivud, antakel a ma relijon akat kufundish anch muntu ukweting mupim wakad kufang. Malejan minam amafundishining mu ma relijon mavud ma pakur—mudi in Kristu, Hindu, in Yuda, a Mizilima ni akwau—akat kwitiyij anch mupim wa muntu ukufangap palondiningau anch ang muntu wafa, mupim ukudandamen kwikalaku, ni ukuya kushakam mwi ngand ya mu spiritu. Ku mutambu ukwau, in Buda itiyijining anch muntu ukat kuvadik tupamp tuvud, kulondwish usu ni ukash wa mujimbu ukwetay ukutwisha kumukwash chad aya mwi ngand yiwamp yitazukinau anch Nirvana.

Jinsangu piur pa mafundish minam jimekeshin anch antu avud mu mangand mawonsu itiyijining anch rufu razwuriling njil ya mwom ya kuya kushakam mwi ngand yikwau. Avud amening anch rufu riding chom cha usey mulong wa kuswimp mwom, ni anch ang muntu wafa riding rusot ra Nzamb. Pakwez yom ik yilondinay Bibil piur pa mulong winou? Tang amboku mutu wa mulong ulondwilaku ou. Chakul chikutwish kukushimokish.