Nzamb watanga mujimbu wa muntu nich ukaliweny wa kwiyok ayinau. Anch muntu wijip chitat, wipusol ap wipamp muy, “mujimbu ukat kusal yom yishimwokishena mulong chitat chijim ap chikemp chiya.” (Johns Hopkins Medicine) Mujimbu ukat kusal chom kampand kapamp kamwing mulong wa kukatwish mash, kujimbish mijir ya mash, kuyerish chitat ni kukasikesh mbij.

TONG BIL: Anch Sakatang warijeka mijimbu yetu chakwel yoka yitat, ov, tukutwishap kwikal nich kashinsh mu kushilamu kwend kwa kutukwash kwok kusansan kwa mu muchim? Nfund a kuseng wafunda anch: “Ukat kwok abukukina mu muchim, ukat kukas yitat yau.” (Kuseng 147:3, TMK) Pakwez anch umen mar mu manangu mulong wa yishiken yikur ap ya katat, mutapu ik ukutwisha kwikal nich kashinsh anch Yehova ukukas yitat yey​—katat ni mu machuku ma kurutu?

Nzamb ushidinamu anch: “Kangal wovany wom, mulong nidi nen. Kangal wazalany, mulong nidi Nzamb wen. Nikukukasikeshany, ni kukukwashany kand.” (Isay 41:10) Muntu wija anch Yehova umubangidin ukwet chisambu mu manangu ni usu wa kurish nich milong kushalijan. Kambuy Paul watazuka kuninet kwa mukach anch “chisambu cha Nzamb chisutila ronganyin rawonsu.” Paul wawejinaku kand anch: ‘Mulong wa yom yawonsu nikwet usu kusutil ndiy ukata kwingikish ukash.’​—Filip 4:4-7, 9, 13.

Mifund yitukwashin kukasikesh ritiy mu kushilamu kwa Yehova mulong wa machuku ma kurutu ma antu. Chilakej, Kujingunik 21:4, 5 (twajimbulang ku paj mukwau) utulejin yom yikusalay ni mulong wak tukutwish kumuchingejin ndiy anch ukusal mwamu:

• “Ndiy ukez [kakusol] mansoj mawonsu” ku mes ma antu. Yehova ukupwish mar metu mawonsu ni yakamish, ap minan yimekena anch yidiap kwau ya usey kudi antu akwau.

• “Ndiy ushicha pa ditand” mwiur mwa uyaj, Mwant Mwin Dikand Diawonsu ukwet usu pa yitang yawonsu ni ulabu wa kupwish mar ni kutwinkish ukwash tuswiridina.

• Yehova utwinkin kashinsh anch kushilamu kwend kudi ‘kushinshamena ni kwakin.’ Chamekesh anch dijin dien ni kalimish kend yimekeshin anch ukuwanyish kushilamu kwend.

“‘Ndiy ukez kayikusol mansoj mawonsu ku mes mau. Kukez kikalap kand rufu, ap madil, ap kwishikokin, ap kusansan, mulong yom yikur kiyamekanap kand. Chad ndiy ushicha pa ditand walonda anch: ‘Katat nikat kusal yom yawonsu [kwikal] yisu!’ Wangela kand anch: ‘Fund mazu minam, mulong madi makin, mafanyidina kumachingej.’”​—Kujingunik 21:4, 5.

Mangand mawonsu ni Bibil yilejen wuntu ni mikadil ya Tatukwetu wa mwiur. Mulong yom yatangau yitubachikin kumwijik Nzamb mudi murund wa piswimp, Bibil utwitin kamu patok anch: “Sejany piswimp kudi Nzamb, chad niyend ukusej piswimp ni yenen.” (Jakobu 4:8) Midimu 17:27 ulondin anch: “Kadiap kulemp ni muntu mwawonsu.”

Anch witekin chisu cha kumwijik Nzamb, ukwikal kamu nich kashinsh anch ukat ‘kukubangin ey.’ (1 Pita 5:7) Yiyukish ik yidiaku mu kwikal nich ruchingej mudi riner mudiay Yehova?

Tal yom yamushikena Toru, wa mu Japon. Amulila kudi maku mwin Kristu, pakwez wiyandjika mu Chisak cha in chisum cha mu Japon chitazukinau anch yakuza. Ulondin anch: “Nitiyija anch Nzamb winkisin ni namana anch rufu ra antu ading piswimp ni yam, pakampwil antu nading nikatina nakash, rading dipup kudi am.” Toru witiyin anch mulong wa antu ayimp ni akad manangu ading amunyingumukina, wikala “muntu ukweta muchim uyimp ni wakad riy.” Piur pa yom yading yikimbinay kusal, uvurikin anch “nasota kufa chisu nading nsand kupwa kwa kujip muntu wading wijikena nakash kwinsutamu am ni chinech chakimba kusal anch nijikana nakash.”

Pakwez, chisu chilejay Toru Bibil pamwing ni mukajend, Hannah, Toru waswimpa nakash mu mwom wend ni mikadil. Hannah ulondin anch: “Namana ni mes mam mutapu waswimpay nfumwam”. Katat, Toru ulondin nich kashinsh anch: “Kudi kamu Nzamb ukata kumubangin muntu ni muntu pakach petu.  Kakatinangap anch muntu ap umwing afa ni uswapel kuyilikishin antu akata kukarumuk ku kurumbuk kwau. Ukat kutesh yom yitwakad kutwish kumulejamu muntu ap umwing ni yom yakad muntu mukwau kwijik. Piswimp ap, Yehova ukupwish milong yawonsu, mar ni kusansan kukash. Ap nlel, ukat kutukwash mu mitapu yakad kuchingejin. Utukatin ni ukat kutukwash chisu tuziyina.”​—Kuseng 136:23.

Mudi mumekeshina yom yamushikena Toru, kwijik anch Nzamb ukutwish​—ni piswimp ap​—ukupwish milong yawonsu ni kukusul mansoj mawonsu kutwinkishin ruchingej rakin mulong wa machuku ma kurutu ni kutukwashin kwikal ni mashakamin mawamp katat. Mwaning, ap mu mangand mizwila sens ni mar, ukutwish kutaninamu mu kubangin kwa rukat ra Nzamb.