Antu amwing atongining anch Dizu dia Nzamb adiswimpa. Pakwez, muprofet Isay walonda anch Dizu dia Nzamb “dishich chikupu.” (Isay 40:8) Mutapu ik tukutwisha kwikal nich kashinsh anch yakushilamu ya Nzamb ayilama kamu nawamp?

Nzamb ukwet usu wa kulam Dizu diend ni kudichidij chakwel kangal adiyipisha. Pakur, chisu chafundau mivungur, in kufund mivungur yiney achinda kamu nawamp dimuny ni dimuny dia yom yafundau mulong wa kwikal nich kashinsh anch kwikil chom ap chimwing chawejinawaku, chaswimpau ap chadioshau. Pakwez, mulong wa kuburen kuwanyin, in kufund amwing a mivungur yiney awejinaku tuyilim tukemp mu kufund.

Kudi tunan twa ma kopi ma maniskri ma pakur ma Mifund Yitumbila. Chawiy, anch kopi umwing wamekesh kaulim kamwing, chifanyidin kwilakej kopi winou ni makopi makwau mulong wa kutan uyakin.—Chakwel wileja yom yivud, tal mutu wa mulong “La Bible a-t-elle été modifiée ou falsifiée ?” udia pa kapend ka jw.org.

El tushinshikinany bil chilakej cha ma maniskri ma pakur matazukinau anch Mivungur ya mu Karung wa Mungu, yajinguninau kudiau in bédouins mu mandam madia piswimp ni Karung wa Mungu mu muvu wa 1947. Mu mifund yiney ya pakur mudi chikunku cha Mifund Yitumbila yafundau pasutin kal mivu tunan twaad. In kwilej yom yivud piur pa Bibil afanikesha ma maniskri minam ma pakur nakash ni Mifund Yitumbila tukweta nlel unou. Yom ik yatanau?

In kukimbijol atana anch yom yidia mu Dizu dia Nzamb tukweta nlel unou yimekeshin patok nich kashinsh uruu wa mifund ya kusambish. * Kusutil ku kushinshikin nawamp ma maniskri ma pakur nakash, ikala nich kashinsh anch yom tutangina nlel mu Mifund Yitumbila yidi chakin kamu uruu wa kusambish wa Nzamb. Tukutwish kwikal nich kashinsh anch Nzamb wachidija nawamp Mifund yend Yitumbila tukweta nlel unou chakwel yikala kamu yakin.

Chawiy, tukutwish kutang Dizu dia Nzamb nich kashinsh kawonsu anch yom yidiamu yidi kamu yakin. Katat, el amboku chad tushinshikinany yom tukutwisha kwilejin kusutil aprofet a Nzamb.