Mutapu Ulejenay Sakatang Kushilamu Kwend Kwa Rukat
Kudiosh kamu kwayitanginau antu, Sakatang wetu wambambang nau antu kusutil angel ni kusutil aprofet. Chikwau kand, ndiy wakata anch uruu wend ni yiyukish yend yashilayimu ayifunda. Nzamb utukanin anch tukutwish kwikal nich musangar mu machuku ma kurutu. Chawiy, nlel unou kwisu ukutwisha kutan yom yashilayimu Nzamb?
Uruu winou utulejinay Nzamb tukutwish kuutan mu Mifund Yitumbila. (2 Timote 3:16) Mutapu ik wasadinay Nzamb aprofet mulong afunda uruu wend? (2 Pita 1:21) Nzamb wateka yitongijok yend mu manangu ma in kufund chakwel antu inay afunda yitongijok yend. Chilik chimwing kand ni nlel, anch mwant wa mudimu wamwit sekreter wend chakwel amufundina uruu, chakin kamu uruu winou ukufunday udi wayen wa mwant wa mudimu. Chawiy chimwing kand, ap anch Nzamb wasadina antu mulong afunda uruu wend, pakwez ndiy udia chakin Mwin Mifund Yitumbila.
DIZU DIA NZAMB ADIPALANGESHIN NDOND JIVUD
Uruu wa Nzamb udi wa usey nakash, chawiy chikatinay Nzamb anch antu awonsu autanga ni autesha kurumburik kwau. Nlel unou ‘rusangu rend ruwamp rushichinga chikupu’ arupalengeshin ku “michid yawonsu ni jindim jawonsu.” (Kujingunik 14:6) Kusutil ku yiyukish ya Nzamb, Mifund Yitumbila yidiaku ya kabuj ap mu chikunku mu mazu 3000 ni kusut, mifund yiney yidiaku mu mazu mavud nakash kusutamu mikand yin yawonsu.