1. Mutapu ik ukata kwiyov piur pa kwilej uprofet wa Bibil?

 BEN mukadivar umwing nsand ulondin anch “nikatining nakash kwilej uprofet wa Bibil”. Niyey ukat kwiyov mwamu? Ap ov, umening anch chikasikening nakash kutesh uprofet wa Bibil? Ukutwish kwiyov anch kwilej uprofet wa Bibil kuleting chisungidik. Pakwez, anch wijik mulong wak Yehova wafundikisha uprofet winou mu Dizu diend, ukukat kamu kwilej.

2. Yom ik tukwisambina mu mutu wa mulong winou?

² Mu mutu wa mulong winou tukuman mulong wak tufanyidin kwilej uprofet wa Bibil ni mutapu tukutwisha kusal mwamu. Tukwisambin kand mauprofet maad madia mu buku wa Daniel mulong wa kuman mutapu makutwisha kutukwash nlel anch twamatesh nawamp.

3. Yom ik tufanyidina kusal anch tukimbin kutesh nawamp uprofet wa Bibil?

³ Tufanyidin kwit ukwash anch tukimbin kutesh nawamp uprofet wa Bibil. Shinshikin chilakej ech. Tong bil anch uyil kwindond wakad kwijik nawamp, pakwez muntu uyila nend wij nawamp ndond yiney. Wij nawamp kwindond udanya ni kwisu uyilanya. Chakin kamu ukusangar mulong muntu winou witiyang kwez ney! Chilik chimwing, Yehova wij nawamp kwisu tudia ni kwisu tuyila. Chawiy mulong wa kutesh uprofet wa Bibil, tufanyidin nich kwikepish kumwit Yehova ukwash.​—Dan. 2:28; 2 Pita 1:19, 20.

4. Mulong wak Yehova wafundikisha uprofet mu Dizu diend? (Jeremiy 29:11)

⁴ Mud nvaj mwawonsu muwamp, Yehova usotin anch anend ikala ni machuku ma kurutu mawamp. (Tang Jeremiy 29:11.) Pakwez Yehova ushalijadin ni anvaj achika wuntu, mulong  ndiy ukutwish kutulej machuku ma kurutu pakad kwidimb. Wafundikisha uprofet mu Dizu diend chakwel twijika yinship ya usey kurutu yisadika. (Isay 46:10) Chawiy uprofet wa Bibil chid chipan cha rukat chidiokila kud Tatukwetu udia mwiur. Pakwez mutapu ik ukutwisha kwikal ni kashinsh anch yom yilondinay Bibil yikusadik chakin kamu?

5. Yom ik yikutwishau ansand kwilejin ku yom yamushikena Max?

⁵ Ansand a shikol adia Atuman ayinyingimukinamu kud ansand akwau akad kwikal Atuman ni akad kulimish yom yilondinay Bibil. Yisu yimwing yom yikatau kusal ni kulond yikutwish kuyibachik ansand Atuman kwidjidjek piur pa yitiyij yau. Shinshikin yom yamushikena mukadivar Max. Ulondin anch, “Panading ku shikol, Nasambisha kwidjidjek anch anvajam antwalang mu relijon wakin ni witiyijinay Bibil.” Yom ik yasalau anvaj end? Ulondin anch, “Angakula mu mutapu uwamp ap anch ading iyakamishin.” Anvaj a Max asadina Bibil mulong wa kwakul ku yipul yend. Max niyend wasala chom chikwau. Ulondin anch “nileja uprofet wa Bibil amwinam,” ni “Nisambina yom nileja nau ansand akwau.” Yibudikin ik yikalaku? Max ulondin anch, “Kupwa kwa yom yiney, Nikala ni kashinsh anch Bibil amupepila Kud Nzamb!”

6. Yom ik ufanyidina kusal anch widjidjekin, ni mulong wak?

⁶ Mud Max, anch wasambish kwidjidjek piur pa uyakin wa Bibil, ufanyidinap kwov usany. Pakwez chid cha usey nakash kusal chom kanang pakad kulab. Kwidjidjek kud mud ankal. Anch kayijinguninap, akutwish kushesh pakemp pakemp chom cha usey. Mulong wa kupwish kwidjidjek kukutwisha kushesh ritiy rey, ufanyidin kwiyipul anch, ‘Ov, nitiyijin kamu yom yilondinay Bibil piur pa machuku ma kurutu?’ Anch ukwetap kashinsh, komb ufanyidin kwilej uprofet wa Bibil wawanyina kal mu machuku ma kwinyim. Mutapu ik ukutwisha kusal mwamu?

7. Chilakej ik chatushilay Daniel piur pa mutapu wa kwilej uprofet? (Daniel 12:10)

⁷ Daniel watushila etu awonsu chilakej chiwamp piur pa mutapu wa kwilej uprofet. Daniel wileja uprofet ni mayingishin mawamp nakash. Wading usotin kwijik uyakin. Wading kand muntu wikepishina. Wading wij nawamp anch Yehova ndiy ukutwisha kumukwash kutesh uprofet anch wamuziyin ni washal piswimp ni ndiy. (Dan. 2:27, 28; tang Daniel 12:10.) Wamekesha anch wading muntu wikepishina kusutil kuchingejin mu ukwash wa Yehova. (Dan. 2:18) Daniel wilejang kand chikurikina. Wakimbijola yakul mu mifund ya Bibil yadingaku pa chisu chinicha. (Jer. 25:11, 12; Dan. 9:2) Mutapu ik ukutwisha kumwimburij Daniel?

8. Mulong wak antu amwing akat kulik kwitiy anch uprofet wa Bibil ukat kuwanyin, pakwez yom ik tufanyidina kusal?

⁸ Mayingishin ik makubachikina kwilej uprofet wa Bibil? Ov, ukat kwilej uprofet wa Bibil  mulong usotin kamu kwijik uyakin? Anch mwawiy, Yehova ukukukwash. (Yohan 4:23, 24; 14:16, 17) Pakwez, antu akwau akat kwilej Bibil mulong wa mayingishin makwau. Antu amwing akat kwilej mulong wa kwikal ni kashinsh anch Bibil kadiokilap kud Nzamb . Akat kutong anch, ang Bibil kadiokilap kud Nzamb mwamu akutwish kwau kwitondinap ayinau yom yidia yiwamp ni yiyimp. Pakwez, tufanyidin kwilej Bibil ni mayingishin mawamp. Chikwau kand, kud mwikadil wa usey nakash tufanyidina kukudish mulong wa kutesh uprofet wa Bibil.

9. Mwikadil ik wa usey tufanyidina kukudish mulong wa kutesh uprofet wa Bibil? Rumburil.

⁹ Ikal wikepishina. Yehova ukanin kuyikwash antu ikepishina. (Jakobu 4:6) Chawiy tufanyidin kumwit ukwash mu malembil mulong wa kutesh uprofet wa Bibil. Tufanyidin kand kwitiyin ukwash udiokila kud Kashapol ushinshamena ni kubabal usadidinay Yehova mulong wa kutwinkish yakudia ya mu spiritu pa chisu chiwanyidina. (Luka 12:42) Yehova kadiap Nzamb wa kanvundangesh, chawiy choviken patok mulong wak usadidin musul umwing mulong wa kutukwash kutesh uyakin udia mu Dizu diend.​—1 Kor. 14:33; Efes. 4:4-6.

10. Yom ik wilejidina ku yom yamushikena Ester?

¹⁰ Ileja chikurikina. Sambish ni kwilej uprofet ukusangareshina ni kimbijol mulong wa kuutesh nawamp. Mwawiy mwasalay nambaz Ester. Wading ukatin kwilej uprofet piur pa Mesia. Ulondin anch “Pinading ni mivu 15, Nasambisha kukimbijol mulong wa kwikal ni kashinsh anch uprofet winou aufunda kurutu kwa Yesu kwez.” Yom yilejay kusutil kutang mivungur ya mu Karung wa Mungu yamwinkisha kashinsh. Ulondin anch “pakach pa mivungur yiney yimwing ayifunda kurutu kwa Kristu, chawiy uprofet wadingamu wading ufanyidin kudiokal kwa Nzamb.” Ester witiyidin anch “Natangang yom yiney tupamp tuvud mulong wa kuyitesh nawamp.” Pakwez ukwet musangar mulong wa usu wasalay. Kupwa kwa kwilej chikurikina mauprofet ma Bibil mavud , ulondin anch, “Natwisha kwimenap amwinam anch yom yilondinay Bibil yid yakin!”

11. Mutapu ik tukata kutaninamu ayinetu mukwikal ni kashinsh anch yom yilondinay Bibil yid yakin?

¹¹ Anch twaman mutapu wawanyidina kal mauprofet mamwing madia mu Dizu dia Nzamb, tukat kwikal ni ruchingej rikash mudiay Yehova ni mu mutapu ututakedilay. Chikwau kand, mauprofet madia mu Bibil makat kutukwash kulam ruchingej rakin mulong wa machuku ma kurutu chikalap nchik yikokujol turishina nich katat. Twisambinanyaku mu uwiswimp mauprofet maad mafunday Daniel mawanyidina katat. Anch twamatesh nawamp makutukwash kutwat mipak yiwamp.

12. Chidjatin cha “utad ujal ni kam” yirumburikin ik? (Daniel 2:41-43)

¹² Tang Daniel 2:41-43. Mu chilat chamurumburilau Mwant Nebukadinesar kud Daniel, chirumbidij cha chidjatin chamanay  mwant ading achisadin ni “utad ujal ni kam.” Anch twafanakesh uprofet winou ni makwau kand madia mu buku wa Daniel ni mu Kujingunik, tukutwish kulond anch chidjatil chinech chirumburishin kubombakan kwa angleter ni Amerik, asadina dikand dia pa mangand mawonsu nlel. Mu kushinshikin nawamp dikand dined dia pa mangand mawonsu, Daniel ulondin anch “chikunku chimwing cha want chikez kwikal nich usu, pakwez chikunku chikwau chikez kwikal chiziyila.” Mulong wak kukwikal chikunku chiziyila? Mulong antu a mu want winou “kakutwishap kubombakan nich kam.” b

13. Anch twatesh kal nawamp uprofet winou, uyakin ik wa usey tukutwisha kwikal nich?

¹³ Twilejin uyakin wa usey nakash kusutil chirumbidij cha chidjatil chilejenay Daniel. Chakusambish, dikand dia pa mangand mawonsu dia Angleter ni Amerik diamekeshina kal usu wau mu mitapu yimwing. Chilakej, dikand dined diasala mudimu ujim pa chisu cha njit ja I ni ja II jasadika pa mangand mawonsu. Pakwez, dikand dined dia pa mangand mawansu diamekesha kuziy ni dikudandamen kuziy mulong wa kupwitamijan kudia pakach pa an angand. Chakaad, dikand dined dawiy diyikedila dia nsudien djat ni pakwezina Want wa Nzamb ukushesha mant mawonsu ma antu. Ap anch michid yikwau yikutwish kubwambwil ku Dikand dia pa mangand mawonsu dia Angleter ni Amerik, pakwez kakutwishap kudiswinkan. Twij mwamu mulong “diyal” dimekeshina Want wa Nzamb dikupuchol chidjatin, chikunku cha chirumbidij chimekeshina kubombakan kwa angleter ni Amerik.​—Dan. 2:34, 35, 44, 45.

14. Kutesh nawamp uprofet winsambidina piur pa yidjatin ya utad ujal ni kam, yikutukwash mutapu ik kukwat mipak ya manangu?

¹⁴ Ov, wikal kal ni kashinsh anch uprofet wisambidina piur pa yidjatil ya utad ujal ni kam yid yakin? Anch mwawiy, chinech chikutwish kwikal ni usu mu mashakamin mey. Mulong wijik kal anch mangand minam makusheshik piswimp ap ukutwishap kwipan nakash mu kukimb mapit ma kumujimbu. (Luka 12:16-21; 1 Yohan 2:15-17) Kwijik uprofet winou kukutwish kukukwash kuman usey wa mudimu wa kulejan. (Mat. 6:33; 28:18-20) Kupwa kwa kwilej uprofet winou, chid cha usey kwiyipul anch, ‘Mipak nikwatina yimekeshin anch nitiyijin anch piswimp ap Want wa Nzamb ukushesh maguvernema mawonsu ma antu?’

15. Nlel nany udia “mwant kwiyand” ni “mwant wa kurul”? (Daniel 11:40)

¹⁵ Tang Daniel 11:40. Daniel shapitre 11 wisambidin piur pa antu, ap usu wa chipolitik, arishijadina mulong wa kuyikel mangand. Kusutil ku kwisikesh uprofet winou ni makwau kand madia mu Bibil, tukutwish kulond anch “mwant wa kwiyand” ud Risi ni jingand jimunungina chikas pakwez “mwant wa kurul did Dikand dia pamangand mawonsu dia Amerik ni angleter. c

16. Yikokujol ik yirishinau nich antu ayikedilau kud “mwant ya kwiyand”?

¹⁶ Antu a Nzamb ayikedilau kud “mwant wa kwiyand” ayizengodin kud mwant winou. Atuman amwing ayibudodin ni kuyitekol mu rukan mulong wa ritiy rau. Pa ndond pa kuyovish akadivar wom, yisalijok ya “mwant wa kwiyand” yakasikeshin ritiy rau. Mulong wak?  Mulong akadivar netu ij anch kuyizengol antu a Nzamb kuwanishin uprofet wa Daniel. d (Dan. 11:41) Kwijik mwamu kukutwish kand kutukwash kulam richingej retu rikash ni kushal ashinshamena kud Yehova.

17. Yikokujol ik yirishinau nich antu ayikedilau kud “mwant wa kurul”?

¹⁷ Pakur, “mwant wa kurul” wayirishikisha antu a Yehova. Chilakej mu mivu kanan ni yitot chidivu, akivar avud ayiteka mu rukan mulong alika kwiyandjik mu milong ya mangand, an amwing au Atuman ayopata ku mashikol mulong wa diyingishin dawiy dimwing. Mu mivu yakwinyim ey, Atuman a Yehova adia mu winyikel wa mwant winou ayirishikishin nakash mulong ading amekeshin kushinshaman kwau ku Want wa Nzamb. Chilakej, pa chisu cha mavot, mwin Kristu wafanyina kwikal ni yovil ya kukwash chisak chimwing cha politik ap kunung chikas kud muntu ukimbinau kuvot. Ap anch kakutwishap kwend kuvot; pakwez mu muchim ni mu manangu,  ukutwish kwikal ku mutambu kanang. Chid kamu cha usey nakash kulik kwiyandjik mu milong ya chipolitik kadiap ching mu yisal pakwez kand mu yitongijok ni mu yovil yetu!​—Yohan 15:18, 19; 18:36.

18. Mutapu ik tukata kusal piur pa kupwitamijan kudia pakach pa “mwant wa kurul” nau antu amurishikishina?

¹⁸ Antu akad kwikal nich ritiy mu uprofet wa Bibil akutwish kwiyakamish nakash chisu chimenau “mwant wa kwiyand” “ukat kurish” ni “mwant wa kurul.” (Dan. 11:40.) Ant inay awonsu aad akwet mat ni mabwombu makutwisha kushesh mwom ya antu awonsu pa divu. Pakwez twij anch Yehova kakuyilikap asala mwamu. (Isay 45:18) Chawiy pa ndond pa kwov wom, kupwitamijan kudia pakach pa “mwant wa kurul” ni “mwant wa kwiyand” kukasikeshin ritiy retu. Ni yitwinkishin kashinsh anch disudien dia mangand did piswimp.

19. Yom ik tufanyidina kwijik piur uprofet udia mu Bibil?

¹⁹ Twijap mutapu ukuwanyina uprofet wa Bibil. Ap muprofet Daniel kateshap kurumburik kwa yom yawonsu yafunday. (Dan. 12:8, 9) Pakwez ap anch tuteshinap kamu nawamp mutapu ukuwanyina uprofet, chawiy chirumburikinap anch ukuwanyinap. Chakin kamu, tukutwish kwikal ni kashinsh anch Yehova ukutukwash kutesh nawamp yom tuswirikedina kwijik pa chisu chiwanyidina, mud mwasalay pasak.​—Amos 3:7.

20. Uprofet ik wa Bibil ushimokishena tukumana ni mes chisu ukuwanyina, ni yom ik tufanyidina kudandamen kusal?

²⁰ Pakulondau anch “Tukwet chisambu ni kwikang”. (1 Tes. 5:3) Piswimp ap antakel chipolitik a pa mangand mawonsu akweta dikand akumurishikish relijon wa makasu ni kumushesh. (Kuj. 17:16, 17) Kupwa akuyirishikish antu a Nzamb. (Ezek. 38:18, 19) Yinship yiney yikushikij kapamp kamwing kwi njit ja Armagedon. (Kuj. 16:14, 16) Tukutwish kwikal ni kashinsh anch yinship yiney yikushik kamu piswimp ap. Mujlong twaman kal yom yiney yawonsu, tudandamenany amboku kumujikitish Tatukwetu udia mwiur kusutil kwilej kamu nawamp mazu ma uprofet udia mu Bibil ni kuyikwash antu akwau niyau kusal mwamu.