YITADINA ANSAND
12: Kwitekin Mipak
KURUMBURIK
Kwitekin mupak chidiap kwau chilat ap kusot anch chom kanang chisadika. Mipak yiwamp yitin kwitenchik, kuswimp, ni cha usey nakash, kusal usu nakash.
Kuding mipak ya mu chisu chikemp (ya kuwanyish mu machuku kanang ap mwi mbing kanang), ya mu chisu kanang (ya kuwanyish mu angond kanang), ni ya chisu chilemp (ya kuwanyish mu muvu umwing ap ni kusut). Muntu ukutwish kuwanyish mipak ya mu chisu chilemp anch wawanyish bil mipak ya mu chisu chikemp ni ya mu chisu kanang.
MULONG WAK CHID CHA USEY
Kuwanyish mipak kukutwish kukasikesh kashinsh key, urund wey ni antu akwau ni kuvudish musangar wey.
Kwichingejin: Anch witekin mipak yikemp ni wasal usu wa kuyiwanyish, mwamu ukutwish kwikal nich ruchingej ra kwitekin kand yijim nakash. Ukwikal kand nich usu wa kurish nich yakamish ya dichuku ni dichuku, mud yibachikin ya arund ney.
Urund: Antu akatining kwikal pamwing nau antu itekidina mipak yisikena—kwawiy kulond anch antu ija yom yisotinau ni asadina usu mulong wa kuyiwanyish. Chikwau kand, mutapu umwing uwamp wa kukasikesh urund ud wa kusal pamwing ni muntu ukweta niyend mipak mud yeyey.
Musangar: Anch witekin mupak kanang ni wauwanyish, chinech chikat kukuletin musangar nakash.
“Nikatining kwitekin mipak. Yikat kwinkwash kwikal ukwatikena ni kwikal ni chom kanang mu manangu cha kusal. Ni anch wawanyish mupak wey, chikat kulet musangar nakash wa kutal kwinyim ni kulond anch: ‘Ah, nawanyishang kamu mupak wam! Nasal kal yom yinalonda.’”—Christopher.
MBIL YA BIBIL: “Anch wamuchingel ruvul ni rinkind anch awanyina bil, ukutwishap kukun ap kwangul chom.”—Mulej 11:4.
YOM UKUTWISHA KUSAL
Londul manans madia kwinshin oku ni wanyish mipak yey.
Jingunin mipak usotina kwitekin. Fund list kanang wa mipak ni yilonga kukwatijan ni usey wau—tond bil mipak ukatina kuwanyish pa ndond ya kusambish, ya kaad, ya kasatu ni kudandamen kand.
Itenchika. Mulong wa mupak win wawonsu, sal bil mwamu:
Fund machuku ma ngond usotina kuuwanyish.
Fund yom yitina mulong wa kuuwanyish.
Tong piur pa yikangesh ni mutapu wa kuyipandakan.
Sal chom kanang mulong wa kuwanyish mupak. Kangal kuchingel anch uwanyisha bil yom yawonsu chad lel usala kukwatijan ni mupak wey. Iyipula anch: ‘Chom ik cha kusambish bil nifanyidina kusal mulong wa kuwanyish mupak wam?’ Kupwa sal chad chom kanang mulong wa kuwanyish mupak. Shinshikin mutapu uyila kurutu kupwa kwa kusal chom kanang.
MBIL YA BIBIL: “Yitongijok ya mwin mushiku ya kusal yom, yishikin ku kupit.”—Jinswir 21:5.
