Amekeshin usu wa mwiur washesha Yerusalem ni ukushesha kand mangand minam mayimp ma Satan ku Harmagedon. Kwinoku kudi kutesh kwa katat. Mulong wak chidi cha usey?

Kurutu kwa muvu wa 607 K.C.C., Yehova wamuleja Ezekiel muchishimushimu yom yikusadika mu Yerusalem kurutu asheshika. Mu chishimushimu chinech, Ezekiel wamana yom yiyimp yikushikena mu musumb winou. Kupwa wamana kand antu musamban, muntu ni muntu wading usendin ‘chom chend cha njit mu makas mend.’ Mwading kand muntu wading udjit “maswin ma ndand muwamp” ni wading ‘ukwet chom chakutekin yom ya kufund nich.’ (Ezekiel 8:6-12; 9:2, 3) Muntu winou amuleja kuya mu musumb chakwel ‘akateka chijingidij pa mpal ya muntu ni muntu ukweta ushon ni kwakam mulong wa yom yitakanena yisadilau mu musumb winou.’ Kupwa, antu musamban ading ni yom ya njit ayileja kujip antu awonsu ading mu musumb winou akad kwikal nich chijingidij. (Ezekiel 9:4-7) Yom ik tukutwisha kwilejin ku chishimushimu chinech, ni muntu wading ukweta chom chakutikin yom ya kufund nich udi nany?

Ezekiel wamana chishimushimu chinech mu muvu wa 612 K.C.C. Uprofet winou wawanyina kapamp ka kusambish kupwa kwa mivu yitan chisu chasalay anch amasalay a Babilon ashesha musumb wa Yerusalem. Mu mutapu winou, Yehova wasadina in Babilon chakwel ayipupa antu end  amubwambwila. (Jeremiy 25:9, 15-18) Ov, chikala nchik kudi in Yuda atentamina alika kusal yom yawonsu yiyimp yasadika mu musumb winou? Chakin kamu Yehova wayipandisha.

Mu chishimushimu chinech, Ezekiel kadiap ndiy wayiteka antu chijingidij ap kushesh musumb winou. Pakwez, ading angel awiy ashesha musumb wa Yerusalem kapamp kamwing. Chawiy uprofet winou utulejin yom yisadikina mwiur. Yehova uyilejin angel irijeka mulong wa kushesh antu ayimp ni kwikal ni kashinsh anch ukuyipandish antu atentamina. a

Uprofet winou ukuwanyin kand mu machuku ma kurutu. Twading kulond anch muntu wading ni chom chakutekin yom ya kufund nich umekeshin antu azizidinau many achidia panap pansh. Twading kulond kand anch antu akutambul chijingidij cha kupand anch atesh ni itiy rusangu ruwamp rituyilejina. Katat, chimeken patok anch tufanyidin kuswimp mutapu wetu wa kurumburil uprofet winou. Twileja mu mukand wa Mateu 25:31-33 anch Yesu ndiy ukurumburisha antu. Ukusal mwamu mu machuku ma kurutu pa chisu cha mar makash. Pa chisu chinicha, antu akurumburishau mudi amikoku akez kupand, ni akurumburishau mudi ampemb akez kuyishesh.

Yom ik twilejina kal ku chishimushimu cha Ezekiel? Mudi malejan matan:

1. Kurutu Yerusalem asheshika, Ezekiel, ni Yeremiy, ni Isay ayibabesha antu piur pa yom yafanyina kushiken mu musumb wau. Ading mudi in kubabesh. Nlel unou,Yehova usadidin kachisak kakemp ka antu azizidinau many mulong wa kuyifundish antu end ni kuyibabej antu akwau kurutu mar makash masambisha. Chakin kamu, antu awonsu a Nzamb adi antu a mudimu a Kristu, mulong ipanin mu mudimu wa kubabesh.—Mateu 24:45-47.

2. Ezekiel kayitekap antu akupanda yijingidij. Chilik chimwing ni antu a Nzamb nlel. Akat kulejan kwau rusangu ruwamp kudi antu akwau ni kuyibabesh piur pa yom yikusadika kurutu oku. Mudimu winou wakulejan usadikina mu mangand mawonsu, usadikin nich ukwash wa angel.—Kujingunik 14:6.

3. Antu apanda mu chisu cha Ezekiel kadingap ni yijingidij pa jimpal jau. Nlel, antu akeza kupand kakuyitekap yijingdij. Yom ik yifanyidinau antu kusal chakwel apanda ku mar makash? Anch atesh kubabesh, afanyidin kwilej kumwimburij Kristu, kwipan ayinau kudi Nzamb, ni kuyikwash akadivar a Kristu mu mudimu wa kulejan rusang ruwamp. (Mateu 25:35-40) Pa chisu cha mar makash, antu akez katekau yijingidij, akez kayitond mulong wa kupand.

4. Muntu ukweta chom chakutekin yom ya kufund nich umekeshin Yesu. Pa chisu cha mar makash, pakezay Yesu kurumburish chisak chijim mudi amikoku, ukuyitek yijingindij. Akwikal ni mutapu wa kushakam chikupu panap pansh.—Mateu 25:34, 46. b

5. Nlel antu musamban akweta yom ya njit amekeshin amasalay a mwiur atakedinau kudi Yesu. Piswimp ap akushesh michid ni uyimp wawonsu.—Ezekiel 10:2, 6, 7; Kujingunik 19:11-21.

Malejan twileja kal mu chishimushimu chinech matukwash kal twikala ni kashinsh anch Yehova kakusheshap antu atentamina pamwing ni antu ayimp. (2 Pita 2:9; 3:9) Malejan twileja kal matuvurishin kand anch mudimu wa kulejan udi wa usey nakash mu chisu chetu. Muntu mwawonsu ufanyidin kutesh kubabesh kurutu nsudien yeza!—Mateu 24:14.