UBAJ: Chikalap nchik mutapu uyimp wamusadinau Bibil pakwez kamujiyishap. Chikwau kand, in kufundiril amwing ni in kukarumun apakisha kuswimp uruu wa Bibil. Yisu yimwing, asala usu chakwel ateka yishankur yau pa ndond pa kulondul malejan ma mu Bibil. Shinshikin yilakej yimwing:

• Ndond ya difukwil: Pakach pa mivu yitot yinying ni mivu yitot yaad yakusambish K.C.C., in kufund mikand yitan yitazukinau anch Pentateuch awejinaku mazu mu mukand wa Kubudik 20:17 malondina anch: “Ku mukandu wa Gerizim. Kwawiy ukutungana chintamb cha kupeshin.” In Samariy achingejina anch Mifund yawiy yading kukasikesh anch chifanyidin kutung tempel wau ku “Mukandu wa Gerizim.”

• Malejan ma usatu : Kusut kwa 300 kupwa kwa kufund Bibil, Mwin kufund wa malejan ma usatu wawejaku mu mukand wa 1 Yohan 5:7 mazu malondina anch “mwiur, Tatuku, Dizu, ni Spiritu: ni yawonsu yisatu yidi kwau chom chimwing.” Mazu minam madingap mu mifund yakusambish. Mwin kwilej wa Bibil Bruce Metzger walonda anch: “Kurutu kwa Mivu yitot musamban,” mazu minam “amatana nakash mu mamaniskri ma mu Latin wa Pakur ni mu Latin usadidinau katat.”

• Dijin ditumbila: Piyepangau in Yuda kujimbul majin ma antakel au, chawiy in kukarumun avud a Bibil akwata mupak wa kudiosh dijin ditumbila mu Mifund. Aswinkesha dijin dined nich maz mudi “Nzamb” ap “Nsalejetu,” maz minam amasadidin mu Bibil kadiap ching mulong wa Sakatang pakwez amasadidin kand mulong wa antu, amasadidin kand mulong wa difukwil dia makasu ap kand mulong wa Djabul.—Yohan 10:34, 35; 1 Korint 8:5, 6; 2 Korint 4:4. a

MUTAPU WAKANGANYAU KUJIYISH BIBIL: Ap anch kapamp kakusambish in kufudiril Bibil amwing arumbuka ap kuyidimb, pakwez avud pakach pau ading ni manangu nakash ni ashinshikina nawamp  mifund. Pakach pa mivu yitot musamban ni mivu kanan C.C., in Masoret afundirila Mifund ya Hebereu, Mifund yijikena mudi ya in Masoret. Yom yau yafundau ni mamuny malejen patok anch mwadingap yilim. Padingau kutan yilim mu mifund yiney asadinang mazu mamwing ma kwinshin mulong wa kurumburil uyakin. In Masoret alika kuswimp maverse ma mu Bibil. Mulej Moshe Goshen-Gottstein wafunda anch: “Kuyipish yom yafundau kal,” “kudi awiy kwading mudi kujipan.”

Cha kaad, ma maniskri mavud nlel unou mayikwashin in kwilej a Bibil kurijek jindond jafundau nayimp. Chilakej, antakel a chirelijon afundisha mu yitot ya mivu anch dikarumun diau dia Bibil wa mu Latin diading dikwet ma verse makin. Chikwau kand, mu mukand wa 1 Yohan 5:7, awejinamu mazu ma makasu mitwisambinang kwinsambishin kwa mutu wa mulong winou. Chawiy lel ma Bibil makarumwinau katat mudi Czech makwetap mazu mawejinau minam. Pakwez patanau ma maniskri makwau yom ik yikwau yajinguninau mu maniskri minam? Bruce Metzger wafunda anch: “Verse udia mu mukand [wa 1 Yohan 5:7] kadingap kwend mu maniskri mawonsu ma pakur mudi (Syriac, Coptic, Armenian, Ethiopic, Arabic, Slavonic), kudioshaku ching dikarumun dia Latin.” Mudi chibudikin, achirikina dikarumun dia Roi Jacques ni ma Bibil makwau adiosha yom ya makasu yafundau.

Ma maniskri ma pakur mamekeshinap patok anch uruu wa Bibil aulama? Chisu chatanau Mivungur ya mu Karung wa Mungu mu muvu wa 1947, in kwilej amwing afanikesha Mifund ya Hebereu ya in Masoret ni yatanau mu mivungur ya Bibil yafundau mu mivu kanan ya kusambish. Mwin kufund umwing wa mu chisak cha in kufund arijeka Mivungur ya mu Karung wa Mungu walonda anch muvungur umwing “wamekesha kamu patok uyakin wa mifund ya Bibil yasala kal tunan twa mivu yafundirilau kudi in Yuda yamekeshin anch ading ashinshamena ni adimukina.”

Bibiliyotek Chester Beatty udia mu Dublin, mwi ngand ya Irlande, bibiliyotek ukwet ma buku mavud mafundau pa mishij wading umekeshina Mifund ya in Grek ya in Kristu, mudi kand ma maniskri ma pakur malabina kal ma mivu yitot yaad C.C.—kupwa kwa mivu 100 papwishau kufund Bibil. “Ap anch Mishij yiney yamekesha jinsangu ja yom yarumburilau,” Ndinguril umwing utazukinau anch Anchor Bible ulondin anch, “kufund kwa maverse madia mu Bibil kumekeshin mutapu uwanyidina jinsangu jafundau.”

CHIBUDIKIN: Ap anch ayipisha maverse ma mu Bibil, yom yafundau pakur ni ma maniskri mavud ma Bibil amawapisha. Mwin kwilej wa Bibil Frederic Kenyon wafunda anch: “Kwikil buku ap umwing wa pakur wamekesha uman uvud wa kusambish wa patok piur pa mifund mudi yiney,” Mifund ya Grek ya in Kristu “ni kwikil mwin kwilej ap umwing ukutwisha kutadik anch mifund yiney yidiap yakin.” Pa mulong utadina Mifund ya Hebereu, mwin kwilej William Henry Green walonda anch: “Tukutwish kulond nich kashinsh anch kwikil buku ap umwing wa pasak walamau kamu nawamp.”