KURUTU yom yiney yisadika, nading nasambishin kal kusanger uyakin. Maku wading watambwil kal mikand yimwing ya Bibil, ni nayisangerang nakash. Pakampwil nakatang nakash yipich. Tatuku kakatangap anch maku anleja piur pa yom yilejangay. Pakwez, nakimbang kwijik ni nipulang yipul, chawiy twilejang ni maku anch tatuku kwamwamu. Mudi chibudikin, nakwata mupak anch niyam nifanyidin kupan mwom wam kudi Yehova. Ambatishina mu Blackpool, mwi ngand ya Angleterre, mu muvu wa 1943 pinadinga ni mivu dikum.

Kusambish kamu chisu chinicha, am ni maku twayangang mu mudimu wa kulejan chisu chin chawonsu. Twasadinang ma fonograf mulong wa kuleja nich. Mading majim majim ni malimina, mading makwet piswimp a kilo anying ni chikunku. Tong piur pam, nsand mudi am, nasalang usu wa kusend yom yiney!

Pinawanyisha mivu 14, nading nakata kal kusal mudimu wa uchibol. Maku wanleja anch nifanyidin cha kusambish kumulej  kashalapol wa akadivar (utazukinau katat anch kalam wa munyingumuku). Wanginka chiyul anch nisala usu wa kwilej mudimu kampand ukutwisha wankwash mu mudimu wam wa uchibol. Chawiy nasala mwamu. Kupwa kwa kusal mivu yaad, namwipula kand kalam mukwau wa munyingumuku piur pa mudimu wa uchibol. Wanleja anch, “Yang usala mwamu!”

Chawiy mwi ngond wa kanying muvu wa 1949, am ni maku twapana yom yetu yawonsu ni twashemunika twaya mu Middleton, piswimp ni Manchester, kwinikwa kwawiy twasambishina mudimu wa uchibol. Kupwa kwa angond anying, namutazuka mukadivar umwing chakwel tusala nend pamwing mudimu wa uchibol. Biro wa mutiy watuleja anch tushemunikina mu chikumangen chisu mu Irlam. Maku wasala mudimu wa uchibol ni nambaz umwing mu chikumangen chikwau.

Nading kwam ni mivu 17, pakwez am ni mukadivar twasalang nend mudimu wa uchibol twading ni chisend cha kutakel yikumangan mulong mu chikumangen chinech chisu mwading kwau akadivar akemp ading awanyishina yitinau. Kupwa, nashemunika naya mu Chikumangen cha Buxton, mwading kwau in kulejan akemp ni aswirikena ukwash. Kuman yom mudi yiney kwankwasha kwirijek mulong wa yisend ya machuku ma kurutu.

Mu muvu wa 1951, nizwisha formiler mulong wa kuya ku École biblique de Guiléad. Kupwa, mwi ngond wa dikum ni yaad mu muvu wa 1952, antazuka mulong wa kulond piur pa  mudimu wa usalay. Nayileja anch anlikishinaku mulong wa kusadin mu mudimu wa usalay mulong nadi nikadin kal mwin kusal mudimu wa chisu chawonsu, pakwez tribinal kitiyap yom nayileja ni anteka mu rukan mwa angond musamban. Pinading mu rukan, antazuka mulong wa kuya ku shikol ya 22 ya Gilead. Mwi ngond wa sambwad mu wa 1953, kupwa kwa kwimbudish mu rukan, nandama mu bateau utazukinau anch Georgic ni naya mu New York.

Chisu nashika, nakumangana ku Assemblée de la société du monde nouveau mu muvu wa 1953. Kupwa nasala weny ni train mulong wa kuya ku South Lansing, New York, kwinikwa kwawiy kwading shikol. Pinipa nading nichidiokidinap mu rukan, chawiy nading ni nfalang jikemp. Pinabudika mu train, nakandama mu bus mulong wa kuya mu South Lansing, pakwez nasondama nfalang 25 kudi muntu nasala nend weny mulong wa kufut.

Ku Shikol ya Gilead twatambula kufumb kuwamp kwatukwasha ‘kwikal yom yawonsu kudi antu a mitapu yawonsu.’ (1 Korint 9:22) Paul Bruun, Raymond Leach, ni yamam, atutuma mu Philippines, pakwez twachingela angond avud mulong wa kutambul ma visa (mikand ya kusal nich weny). Kupwa twakandama mu bateau mulong wa kuya ku Rotterdam, mu Pays-Bas. Kupwa kwa yiney twauka Karung wa Mediterane, Canal de Suez, ni Ocean Indien mulong wa kuya mwi ngand ya Malaisie ni kupwa mwi ngand ya Hong Kong. Kupwa, kwa kusal machuku 47 pa karung, twashika mu Manila mwi ngond wa dikum ni umwing machuku ma ngond 19, muvu wa 1954.

Kwinikwa, twafanyina kusal usu wa kwijidin yaku yisu, ngand yisu, ni dizu disu. Chawiy, kwinsambishin, asatu pakach petu ayituma mu chikumangen cha Quezon City, mwinimwa antu avud alondang Anglais. Kupwa kwa angond musamban, twijika kulond pakemp dizu dia Tagalog. Chisend chetu chalondulaku chafanyina kuswimp yom yiney.

Dichuku dimwing mwi ngond wa katan muvu wa 1955, pitwadiokala mu mudimu wa kulejan twashik ku chikumbu, Am ni Mukadivar Leach twatana mikand yimwing yilejena anch atutum kal mudi atulam a munyingumuku. Pinipa nading kwam ni mivu 22, pakwez mu chisend chinech chisu nafanyina kwilej mitapu yisu mulong wa ‘kwikal yom yawonsu kudi antu a mitapu yawonsu.’

Chilakej, nasala diskur diam diakusambish mudi kalam wa munyingumuku pol mu ul. Pa chisu chinicha mu Philippines, diskur dia patok adisadinang pa ndond padia antu avud! Panayangang ni kutal yikumangen mudi kalam wa munyingumuku, nasalang ma diskur mu jimpang mwading antu avud, mu sok, kurutu kwa yikumbu yijim kwimanangau antu avud, mu yiwandj ya kusengen basket, mu ma park, ni kuns kwa jinjil ja mu misumb. Mu San Pablo City, natwishap kusal diskur mu sok mulong wa ruval muvud wanaka. Chawiy nayileja akadivar ading ni yisend anch nisadina diskur dined mu Chot cha Want. Akadivar angipula anch akutwish kudifund mudi diskur dia patok ap anch disadikidinap pa ndond padia antu avud!

Yisu yawonsu nashakamang ku yikumbu ya akadivar. Ap anch yading yikemp, pakwez yading yinangin. Yisu yivud ulal wam wading wiswimp wa mitond walangau pansh. Ndond yimwing ya kowil mem yadinga pol pa chikumbu ni muntu mwawonsu ukutwish kukuman chisu wowila, chawiy nileja mutapu wa kowal nawamp. Nasalang weny mu bus ni yisu yimwing mu bateau mulong wa kuya pa matung makwau. Mu mivu yam yawonsu nasala mudimu wa chisu chawonsu nadingap ni motak.

Nileja kulond dizu dia Tagalog, ap anch nayap ku shikol ya dizu dined. Nasala mwamu pinayiteshang akadivar akat kulond mu mudimu wa kulejan ni ku yikumangan. Akadivar  akata kwinkwash kwilej, ni nayijikitisha mulong wa kushimpish michim kwau ni kurumburil kwau kwakin.

Mu kusut kwa machuku, nafanyina kwirijek nawamp mulong wa yisend yisu. Mu muvu wa 1956, chisu chezay Mukadivar Nathan Knorr, twading ni chitentam cha ngand. Anginkisha chisend cha kwambamb nau in kupalangesh nsangu asu. Nadingap nija chom pa yom yiney, pakwez akwetu ankwasha chakwel nijika. Piswimp ni kupwa kwa muvu umwing twading kand ni chitentam cha ngand, ni am nasala mudi ntakel wa chitentam. Mukadivar Frederick Franz wadiokala ku biro mujim wa mangand mawonsu, ni nilejina yom yivud kudi ndiy. Pasalay diskur dia patok, wadjala barong Tagalog, disun dilejena yishankur ya kudjal kwa in Philippines. Chinech chayisangaresha nakash akadivar a mwinimwa ni anfundisha kwikal muntu wipanina ku mashakamin ma antu.

Naswirikena kwirijek nakash chisu nikala kalam wa distrik. Mu machuku minima, twamekesha filim ulondina anch Le bonheur de la société du Monde Nouveau. Twamulejanang chisu chawonsu pol pa ndond pading antu avud, pa chisu chinicha atupwapu atusumolang. Chitokish cha projekter chawiy chayiletishang ni alamatang ku projekter. Chitang mudimu nakash pa kukuswol projekter kupwa kwa kumusadin! Chadingap chiswapela kutenchik yom yiney, pakwez chading cha musangar kuman antu akat kwez kwilej piur pa dirijek dia Yehova dia mu mangand mawonsu.

 Amimpel in Katolik mu jindond jimwing ayibachikang antakel a chipolitik chakwel kangal atwitiy kusal yitentam. Chawiy, mulong wa kuyikangesh antu kutesh yikulonday mwin kusal diskur, abulang mpwambu anch tukwet diskur dia kusal kwi ndond yidia piswimp ni egliz wau. Chikalap nchik yom yiney yawonsu, antu adandamena kwilej uyakin, ni antu avud mu ma teritwar minima amwifukwidin katat Yehova.

Mu muvu wa 1959, antuma kusadin ku biro wa mutiy. Nilejina yom yivud ku yom namana. Kusut kwa chisu, anleja kuya kutal jingand jikwau mudi ntimesh wa biro mujim wa pa mangand mawonsu. Weny umwing nasala, twijikijana ni Janet Dumond, mishoner umwing wa mu Thaïlande. Twafundijadinang mikand chisu chawonsu, ni kupwa twatijana. Etu awonsu pamwing twamusadina Yehova nich musangar mu mivu 51.

Twasangerang kuyital antu a Yehova mu jingand 33. Nijikitishin nakash mulong chisend cham chakusambish chankwasha kwilej mutapu wa kushakam nau antu akweta yaku ni yishankur kushalijan! Kwendangan kwinoku kwankwasha kwijik anch Yehova uyikatin antu a mitapu yin yawonsu.—Midimu 10:34, 35.

Am ni Janet tukwet musangar wa kusal pamwing nau akadivar a mu Philippines, ni tudandamedin kusadin ku biro wa mutiy mu musumb wa Quezon City. Katat uvud wa in kulejan wavul kal tupamp dikum kusutamu uvud wanatana pinasambisha kusadin mwinimwa kwasut kal mivu 60. Kusut kwa mivu yawonsu yiney, nichidandamedin kwirijek mulong wa kusal yom yawonsu yikwingitay Yehova kusal. Chilakej, mulong wa kuswimp kusadikina katat mu dirijek nikwet kand kuswir kwa kwirijek nakash.

Twasala yawonsu tukutwisha mulong wa kulondul wintakel wa Yehova, ni kusal mwamu kwatuletina musangar mu mashakamin metu. Twasala kand usu mulong wa kwirijek nawamp chakwel tuyisadina akadivar netu nawamp. Chawiy, anch Yehova wachikatish, tukwatin kamu mupak wa kudandamen ‘kwikal yom yawonsu kudi antu a mitapu yawonsu.’