Ukutwish Kwikal Nich Musangar Kwikalap Nchik Kunenganan

OV, KANDIKAL akunenganeshangap? Ap Tatukwetu wa mwiur, Yehova Nzamb, wova kusansan pamunenganeshau. Chilakej, ndiy wayikola in Isarel kuyidiosh mu uswik mu Idjibit ni wayiyukisha nakash. Pakwez, Bibil ulondil anch: “Amutenta Nzamb wau kapamp ni kapamp, amupaka Utumbila wa Isarel.” (Kuseng 78:41) Chikalap nchik mwamu, Yehova uding chisu chawonsu ‘Nzamb wa musangar.’—1 Timote 1:11.

Chakin kamu, kudi yom yivud yikata kutunenganesh. Mutapu ik tukutwisha kwichidij chakwel kangal yitupwisha musangar wetu? Chom ik tukutwisha kwilejin ku mutapu wasalay Yehova Nzamb pamunenganeshau?

Yom Yikata Kutunenganesh

Dizu dia Nzamb dilondil anch, “chisu cha mar” chikat kutushiken etu awonsu. (Mulej 9:11) Yom yawonsu yakad kuchingejin, chisum, chak, ap mayej yikutwish kulet mar makash—ni kutunenganesh. Bibil ulondil kand anch: “Ruchingej ra kulab labe rikat kuyedish muchim.” (Jinswir 13:12) Impu twovilinga ya kusot kuman chom chiwamp yitusangareshining, pakwez anch kichisadikinap, tukutwish kwov kuziy ni runeng. Chilakej, Duncan, * wadinga ni kuchingejin anch ukez kikal mishoner, wamana anch kupwa kwa kusutish mivu yivud mu mudimu wa umishoner, ndiy ni mukajend imika mudimu achirik kwol kwau. Ndiy ulondil anch: “Kapamp ka kusambish mu mwom wam, niyova anch nikwetap kand ruchingej. Kinadingap kand ni rutong. Kwikil chom chinamana kand chikweta usey.” Kusansan kwa runeng kukutwish kushal chisu chilemp, mudi muchadinga ku mutambu wa Claire. Urumburil anch: “Nadinga ni divumu dia angond sambwad panamushadisha mwanam, mulong divumu diandokala. Pasutil kal mivu, pakwez djat ni ilel unou, pinimeninga nsangarum wasal lel chikunku pa chimet, nikat kwitongin amwinam, ‘Chawiy chimbu chelay kwikal nich mwanam.’”

 Chikutwish kwikal kand chisansena anch muntu kanang wakunenganesh, mudi anch kutondiu kwa uruw anch kwafa, uruw wafa kal, mwan watombuk, murund wakad kushinshaman, ap mbay wakad kujikitish. Mulong tushich mukach mwa antu akad kuwanyin ni mu machuku makash, mitapu ya kulet runeng yidiaku yivud.

Kurumbuk kwetu ayinetu kukutwish kwatunenganesh. Chilakej, anch twadubul ku ekzamen, twakangany kutan mudimu, ap twakangany kukatishiu ni muntu kanang, tukwiyov mudi tudi a chamwamu. Tukutwish kand twiyovil ayinetu runeng anch muntu utukatilinga wakangany kuya kurutu muspiritu. Mariy ulondin anch: “Changadim wam wading umeken anch uyil kurutu nakash. Niyova anch nadinga chilakej chiwamp kudi ndiy. Pakwez pamulikay Yehova Nzamb ni yijil ya dijuku dietu, niyova anch nakangany kal yawonsu. Kutwish kwawonsu kunatwisha mu yom yikwau mu mwom kwatwishap kwilikan nich. Naziya nakash.”

Mutapu ik tukutwisha kura nich runeng riner? Chakwel anch tutana chakul, tushinshikinany chilakej chashay Yehova piur pa kura nich runeng.

Asin pa Mutapu wa Kukupwish

Yehova Nzamb wayitenchikina nawamp ambay aad a uruw a kusambish, pakwez ikala akad kujikitish ni atombuka. (Disambishil shapitre wa 2 ni wa 3) Kupwa mwanau Kain wasambisha kukudish ngikadil yiyimp. Wadiburila dibabesh dia Yehova, Kain wamujipa mwanchend win kamu. (Disambishil 4:1-8) Ov, ukutwish kutongin runeng rovay Yehova?

Ov, mulong wak runeng riner ramupwishap Nzamb musangar wend? Mulong ndiy watenchika kwizwish divu ni antu awanyidina ni wadandamena kusal chakwel awanyish rutong riner. (Yohan 5:17) Pa chinech, ndiy watenchika mulambu wa difut ni Want wend. (Mateu 6:9, 10; Rome 5:18, 19) Yehova Nzamb katalap ching kusu pa mulong, pakwez watala kand pa mutapu wa kuupwish.

Dizu dia Nzamb ditukasikeshin tutala pa yom yiwamp pa ndond pa yikutwisha kusadik ap pa yitwadia tufanyidina kusal. Dilondil anch: “Chawiy anamakwam, yom yawonsu yidia yakin, yom yilimishilau, yom yitentamina, yom yitokila, yom yikatilau, anch kudi yom ya kashinsh ni kuwap, yom yiwanyidina ni yifanyidina kulimish, tondany pa yom yiney.”—Filipoi 4:8.

Mutapu Uwamp wa Kuman Runeng

Kukutwish kushiken yom yikutwisha kuswimp nakash mwom wetu. Chilakej, tukutwish twaburen mudimu pakad kuchingejin, pakad mbay a uruw, ap pakad yisend yitwadinga nich pasak. Tukutwish twashadish ukash wa mujimbu wetu, chikumbu chetu, ap arund netu. Mutapu ik tukutwisha kura nich yikarumok yiney?

Antu amwing amana kal kwitekin bil yom ya usey kukwashining nakash. Duncan, wajimbulangau kwiur oku, ulondil anch: “Am ni mukajam pitwajingunina anch kitukutwishap kand kuchirikin ku mwom utwadinga nich pasak, twanenganana nakash. Chakin, twitekina yom yaad ya usey: kumulam Maku ni anch chitwishikin, kudandamen nich mujikit wa chisu chawonsu. Pa chisu cha kukwat mipak, twayishinshikina usu uyikwikala nich pa yom ya usey. Kwinoku kwaswapesha yom.”

Avud etu akat kupandikesh mutambu uyimp wa mwikadil pitukata kunenganan. Chilakej, usu wetu mu kumulil mwan, kuwanyish yitinau chakwel kutan mudimu, ap kulejan rusangu ruwamp mu chingand cha wingendj kukutwish kwalet yibudikin yitwadia tuchingejina. Tukutwish twatong anch, ‘Nakangany kal.’ Pakwez, mudi mwasambisha runeng ra antu kwamekeshap  anch Nzamb wakangany kal, kitukangenyap mulong anch usu utwasambisha nich utwishinap bwat.—Kuvurik Yijil 32:4, 5.

Chituswapedil kusal nich kusansan ku muchim pakatau antu kutunenganesh. Yehova kakatap kusalang mwamu. Mwant David wanenganana pasalay masandj ni kupwa wamujipeshisha ikundj wa mband winiwa. Pakwez, Yehova watala ukinakin wa kukarumuk kwa David ni wadandamena kumusadil David mudi kashalapol wend. Chawiy chimwing, Mwant Yehoshafat ushinshamena warumbuka pasukay manswik ni akankuny a Nzamb. Muprofet wa Yehova walonda anch: “Mulong wa chom chinech [Yehova] wakujimedil kal. Anch wakuswejinap nchik, ey wasala kal yom yiwamp.” (2 Jinsangu 19:2, 3) Yehova wading wij anch kurumbuk kumwing kwamwikadisha Yehoshafat mwin matung. Chilik chimwing, tukutwish kwiyep kushadish arund anch niyetu kiturumbukinap parumbukinau. Arund atunenganeshina akutwish ikal achikwet ngikadil yiwamp.—Kolosay 3:13.

Runeng rikutwish kwikal rikash kwiyep kurutu kwa kupandakan. Tukutwish twakwachik nich runeng pakad ayinetu kusal chitil. Pakwez, tukutwish kwiyov nawamp anch twasal mutapu uwamp ni kuya kurutu.  Panengananay nakash Mwant David piur pend amwinend, wafunda anch: “Mafup mam mauma, nading ni kukimuk muten wawonsu . . . , Ni Ey [Yehova] wanjimangeshil kal milong ya yitil yam.” (Kuseng 32:3-5) Anch twajingunin anch kitwasalangap yadiay Nzamb ni kutuchingejin ing twasalang, tufanyidin kumwit Nzamb atulikishin ni tukarumuna jinjil jetu ni tukwata mupak wa kulondul kamu chiyul cha Nzamb mu machuku ma kurutu.—1 Yohan 2:1, 2.

Irijeka Katat Mulong wa Kura Nich Kunenganan

Pakad kwidjidjek, etu awonsu tukura nich kurutu oku runeng kanang. Chom ik tufanyidina kusal chakwel twirijeka? Yirumburil ya Bruno yidi ya usey nakash, mwin Kristu umwing ipal wara nich runeng rikash rakarumuna mwom wend. Ulondil anch: “Ku mutambu wam, chom chijim cha kurish nich runeng chadinga chinech, nadandamena kusal yinadinga kusal pasak mulong wa kukasikesh mwom wam wa muspiritu. Nileja mulong wak Nzamb ulikidin ditenchik dined dia chisu didandamena. Nasutisha mivu mulong wa kukasikesh urund wam ni Yehova. Nasangara nakash pa kuchisal mwamu. Rongoj ra kwijik anch ndiy wadinga pamwing nam rankwasha nijijamana pantaliken nich kuziy kunadinga novila.”

Mudi mutuchingedina machuku ma kurutu, tufanyidin kwikal nich kashinsh pa chom kanang: ap anch twinenganeshap ayinetu ap atunenganesha kudi akwetu, Nzamb kakezap kutunenganesh. Chakin, Nzamb ulondil anch, dijin diend Yehova, dirumburikin anch “AM NIDI MUDI NIDIA.” (Kubudik 3:14) Chom chinech chitwinkishin kashinsh anch ukez kwikal chawonsu chisotilay kwikal chakwel awanyish yakushilamu yend. Ndiy wakana kal anch kusutil ku Want wend, rusot rend rikez kusadik “pansh mudi mwiur.” Chawiy chafundinay kambuy Paul anch: “Mulong nij anch, ap rufu, ap kupand, ap angel, ap in kuziyish . . . ap yom ya piur, ap ya kwishin, ap yom yikwau yitangilau yikutwishap kutwauril etu ku rukat ra Nzamb ridia mu Yesu Kristu.”—Mateu 6:10; Rome 8:38, 39.

Tukutwish nich kashinsh kuchingejin machuku ma kurutu makeza kuwanyin yakushilamu ya Nzamb yalonday kusutil kudiay profet Isay: “Am nikat kutang mangand masu ni maur masu. Yom yawonsu ya pakur akez kayivuramen.” (Isay 65:17) Ruchingej ramushena mudi ik ridia kurutu oku pakeza kwikal yom yawonsu yinenganeshina ya pasak!

[Mazu madia kwishin kwa paj]

[Tablo wa jinsangu udia pa paj wa 13]

Kitukangenyap mulong anch usu utwasambisha nich utwishinap bwat

[Tablo wa jinsangu udia pa paj wa 14]

Dizu dia Nzamb ditukasikeshin tutala pa yom yiwamp pa ndond pa yikutwisha kusadik

[Chipich chidia pa paj wa 15]Nzamb udi mwin musangar, chikalap nchik kurumburik kwa antu, mulong rutong rend rikuwanyin chakin kamu

[Chipich chidia pa paj wa 16]

Kwitekinang bil pa ndond ya kusambish yom ya muspiritu kukwashining mu kura nich runeng