OV, MALEMBIL makutwish kutukwash? Bibil ulejen anch mwaning, malembil ma atushalapol a Nzamb madi chakin kamu ma ukwash kud awiy. (Luka 22:40; Jakob 5:13) Pakwez, kulembil kukutwish kutukwash nakash muspiritu, mu yovil, ap ku mujimbu. Ov, mutapu ik?

Chilakej, anch ukwet mwan utambwila chipan. Ov, ukez kumulej anch chiwapidil kujikitish? Ap ukez kamulej mutapu wa kumujikitish? Pitumekeshina yovil yakin mu mazu, tukat kuyishinshikin ni kuyikasikesh. Ov, chidi chilik chimwing anch chifanyidin kwisamb ni Nzamb? Mwaning! Tal yilakej yilondwila.

Malembil ma kujikitish. Pitukata kumujikitish Tatukwetu mulong wa yom yiwamp yikata kutushiken, tukat kushinshikinang pa yiyukish yetu. Mudi chibudikin, tukutwish kuman anch tufanyidin kujikitish nakash, kwikal nich musangar upandikena, ni kwikasikesh nakash.​—Filip 4:6.

Chilakej: Yesu wajikitisha piur pa mutapu wateshay ni kwakul Tatukwend kwa ku malembil mend.​—Yohan 11:41.

Malembil mulong wa dilikishin. Pitumwitina Nzamb dilikishin, tukasikeshin kom ketu, kujimbish kukarumuk kwetu, ni ronganyin retu piur pa ukash wa chitil. Tukutwish kand kupandakan yovil ya kwifish nich.

Chilakej: David walembila mulong wa kumekesh kukarumuk ni runeng.​—Kuseng 51.

Malembil piur pa Umutakel ni Manangu. Mulong wa kumwit Yehova chakwel atutakela ap atwinkisha manangu tuswiridina kukwat mipak yiwamp yikutwisha kutukwash twikala antu ikepishina chakin kamu. Yikutwish kutuvurish anch tukwet mipak ni kukasikesh ruchingej retu mudi Tatukwetu wa mwiur.​—Jinswir 3:5, 6.

Chilakej: Salomon wita nich kwitudish umutakel ni manangu mulong wa kuyitakel in Isarel.​—1 Ant 3:5-12.

Malembil mulong wa mar. Anch twapan muchim wetu wawonsu kudi Nzamb pitumena mar mu yovil, muchim wetu ukez kutambul dikasikesh ni tukez kumuchingejin Yehova pa ndond ya kwichingejin ayinetu.​—Kuseng 62:8.

Chilakej: Mwant Asa walembila parishay nich akankuny akash.​—2 Jinsangu 14:11.

Kulembil mulong wa kuwap kwa antu akwau aswiridina ukwash. Malembil minam matukwashin kwipuk choy ni kukudish ranaken ni riy.

Chilakej: Yesu walembila mulong wa in kwilej end.​—Yohan 17:9-17.

Malembil ma kushiman. Pitukata kumushiman Yehova mulong wa midimu ni ngikadil yend yamushena, kalimish ketu ni kusanger kwetu piur pend kukez kukul. Malembil minam makutwish kand kutukwash twikal piswimp ni Nzamb wetu ni Tatukwetu.

Chilakej: David wamushimana Nzamb nich chirungul mulong wa chitangil chend.​—Kuseng 8.

Chiyukish chikwau chidiokila ku malembil chidi “chisambu cha Nzamb chisutila ronganyin ra antu.” (Filip 4:7) Kwikal zoong mu mangand minam ma mar chidi chiyukish chimwing chikasikena kwikal nich. Chikutwish ap kwikal ni yiyukish ya ku mujimbu. (Jinswir 14:30) Ov, yiney yikutwish kutushiken mulong wa usu wetu ayinetu? Ov, kudi chom chimwing cha usey nakash chitufanyidina kusal??