MALEMBIL minam amatazuka anch malembil makatau kuchirikin kudi antu avud pa malembil mawonsu ma in Kristu. Chikalap chakin ap bwat, malembil ma nsampwil ma Yesu​—matazukinau chisu chimwing anch Malembil ma Nsalejetu ap ma Tatukwetu​—kakatap kumatesh chakin kamu nawamp kudi antu avud. Tutikit twa antu tukat kumachirikin mazu minam pakad kumatesh dichuku ni dichuku, pamwing ap dichuku dia kabuj. Pakwez Yesu kachingejinap anch akez kusadil malembil minam mu mutapu winou. Ov, mutapu ik twija mwamu?

Kurutu kwa kulejan malembil minam, Yesu walonda anch: “Piukulembilanya, kangal walondany mazu mavud.” (Mateu 6:7) Ov, Yesu walejana yom yakad ndiy kufundish kusutil ku kutenchik mazu makezau kulam mu manangu ni kumachirikin? Bwat kwau! Pakwez, Yesu watufundisha yitufanyidina kulembil, ni watuleja patok yitufanyidina kutek pa ndond ya kusambish mu manangu metu pitukata kulembil. Shinshikinany nawamp piur pa yom yalonday. Malembil minam amafundin mu Mateu 6:9-13.

Chawiy lel, Yesu wayivurisha in kumulondul end anch malembil mawonsu chifanyidin kumalembil kudi Tatukwend, Yehova. Pakwez, ov, wij mulong wak dijin dia Nzamb didi dia usey nakash ni mulong wak chifanyidina kuditumbish?

Kudiosh kwinsambishin kwa rusangu ra muntu, dijin ditumbila dia Nzamb adidimbena makasu. Satan mukankuny wa Nzamb, wamwela Yehova anch ukwet makasu, udi Ntakel wa choy wakad kwikal nich kutentam kwakin pakatay kuyitakel yitang Yend. (Disambishil 3:1-6) Antu avud inunga kudi Satan kusutil ku kulejan anch Nzamb kasadinap chom, udi mwin chisum, ni ulamina rukuny ap kutadik anch Kadiap Sakatang wa yom yawonsu. Antu akwau asambisha kupompat dijin diend adinad, ni kudiosh dijin dia Yehova mu ma Bibil madingau ni kukarumun ni ajidik kudisadil.

Bibil ulejen anch rusot ra Nzamb rikez kudiosh kuburen kutentam kwinoku kwawonsu. (Ezekiel 39:7) Mu kusal mwamu, ndiy ukez kuwanyish maswir mey ni kupwish milong yey? Ov, mutapu ik yikeza kusadik? Mazu malondwilaku madia mu malembil ma Yesu makwil ku chipul chinech:

Nlel unou, kudi kanvundangesh kakash pakach pa alej a ma relijon piur pa Want wa Nzamb. Pakwez in kumutesh Yesu ading ij anch aprofet a Nzamb abwaka pasak anch Mesia, mwin Kuyikwol antu watondau kudi Nzamb, ukez kutakel mu Want ukeza kaswimp mangand. (Isay 9:6, 7;  Daniel 2:44) Ukwez kutumbish dijin dia Nzamb kusutil ku kumekesh patok makasu ma Satan ni kumudiosh Satan ni midimu yend yawonsu. Want wa Nzamb ukez kupwish njit, mayej, nzal​—ni rufu. (Kuseng 46:9; 72:12-16; Isay 25:8; 33:24) Piukata kulembil anch Want wa Nzamb weza, ukat kulembil chakwel ya kushilamu yawonsu yiney yikala yakin.

Mazu ma Yesu mamekeshin anch rusot ra Nzamb rikez kusadik chakin kamu pansh mudi mwiur, mudingay Nzamb. Kwikil chom chatwisha kukangesh kusalik kwa rusot ra Nzamb mwiur; parishay Mwan a Nzamb njit ni Satan ni ayilembil end, ni kuyidjibul pansh. (Kujingunik 12:9-12) Chom chinech cha kasatu cha mu malembil ma nsampwil, mudi yom yaad ya kusambish, yitukwashin kudandamen kushinshikin pa yom ya usey nakash​—kangal pa rusot retu, pakwez pa rusot ra Nzamb. Rusot rend rawiy rikeza kuyiletin yitang yawonsu yom yiwamp nakash. Chawiy lel, ap Yesu muntu uwanyidina wamuleja Tatukwend anch: “Kangal chikala mudi munisotila am, pakwez chikala mudi muusotila ey.”​—Luka 22:42.

Yesu walejana kand anch tufanyidinap kwit ching yom yetu ayinetu mu malembil. Chiyipinap kumulembil Nzamb mulong wa maswir metu ma pichuku-pichuku. Pakwez, kusal mwamu, kutuvurishin anch Yehova ndiy kusu ukata “kupan kudi antu awonsu mwom, ni mwiku, ni yom yikwau yawonsu.” (Midimu 17:25) Bibil ulejen anch ndiy udi tatuku wa rukat ukat kusanger kuwanyish maswir ma anend. Pakwez, mudi tatuku muwamp, ndiy kakezap kwitiyij malembil makad kwikal ma ukwash ku mutambu wau.

Ov, ukwet chakin kamu mulong ni Nzamb? Ov, uswiridin dilikishin diend? Nlel unou, antu avud kameningap kand ukash ni uyimp wa chitil. Pakwez Bibil utulejin anch chitil chawiy chikata kulet mar makash, mulong chawiy chikata kuletang rufu kudi antu. Mulong twavadika mu chitil, tusadining chitil chisu chawonsu, chawiy lel ruchingej retu ra mwom wa chikupu mu machuku ma kurutu rimedin pa dilikishin dia Nzamb. (Rom 3:23; 5:12; 6:23) Chidi cha musangar, mulong Bibil ulondin anch: “Nsalejam, ey udi muwamp ukat kulikishin.”​—Kuseng 86:5.

Ov, umenap mutapu uswiridina swaa, pakad kulab, diking dia Nzamb? Antu avud alikin kwitiyij anch “Sakudimban,” Satan, udingaku. Pakwez Yesu walejana anch Satan udingaku, ni wamutazuka anch “mwin kutakel wa mangand minam.” (Yohan 12:​1; 16:11) Satan wayipisha mangand minam madia mwishin mwa wintakel wend, ni usotin nakash kukudimb niyey, chakwel akukangesha kukasikesh urund wey wa piswimp ni Tatukwey, Yehova. (1 Pita 5:8) Pakwez, Yehova ukwet usu kumupandakanamu Satan ni usangaredin kuyilam antu awonsu amukatina Ndiy.

Kuchirikin kwinoku mu wiswimp kwa yom yijim yidia mu malembil ma nsampul ma Yesu kukutwishap kulejan yom yawonsu yitukutwisha kwit mu malembil. Vurik anch, 1 Yohan 5:14 utulejin piur pa Nzamb anch: “Anch twamwit chom, chad tumwit mudi mudia rusot rend, ndiy ukututesh.” Chawiy lel kangal wakam anch milong yey yidi kwau yakad usey chakwel umuleja Nzamb mu malembil.​—1 Pita 5:7.

Ov, chidi nchik piur pa chisu ni ndond ya kulembil? Ov, kwisu ni ndond ik tufanyidina kulembil?