Ov, Anany Alejena Rusangu Ruwamp?

“ . . . ez arulejan bil ku mangand mawonsu.”​—MATEU 24:14.

RUSANGU ruwamp arilejen mu mangand mawonsu kudi Atuman a Yehova. Awiy asadin mwamu mu mitapu kushalijan. Njil yimwing yidi kusutil . . .

Dizu Dialonday. Mudi Yesu ni in kwilejend, Atuman a Yehova ayiling kudi antu nich rusangu ruwamp. (Luka 8:1; 10:1) Kakatap kuchingejin anch antu ayilondula bil. Atuman a Yehova​—mu uvud wa ma miliyon sambwad ni kusut—​akat kwipan mu kulejan uman piur pa Want wa Nzamb. Akat kulejan ku chikumbu ni chikumbu, mu balibal, kusutil ku matelefon ni mitapu yikwau. Mu muvu wasutinap, Atuman asadil piswimp biliyon umwing ni chikunku wa asaa mu mujikit winou.

Kakatap kuyilej antu akwau ching kusu piur pa Want wa Nzamb pakwez ayilejin kand piur pa ‘yom yawonsu yayilejau kudi [Yesu].’ (Mateu 28:20) Atakela uvud wa malejan ma Bibil ku chikumbu kusut mamiliyon chinan pakad kufut.

Atuman akat kulejan mu mangand mawonsu​—mu jingand 236. Ayilejin antu a jindond kushalijan. Alejen mu jingand ni mu musumb, mu matikit ma Amazone ni ma mu Sibérie, mwi mpay mwa Afrique ni ku mikandu ya Himalaya. Kayifutinap mulong wa mudimu wau; akat kusadil nfalang jau ayinau ni kusadil chisu chau, mulong a yibachikin kudi rukat ra Nzamb ni ra a mutej nau. Akat kwijikish kand rusangu ruwamp kusutil . . .

Mikand Yichapinau. Gazet winou, ukweta mutu wa mulong Chinong cha Kalam chilejen Want wa Yehova, amupalangeshin katat mu jindim 185 ni amupalangeshin mu ma kopi uvud wa mamiliyon 42 pa nimero ni nimero. Gazet mukwau upalangeshinau nend pamwing udi Réveillez-vous ! ulejen ni ndiy malejan ma Want, amupalangeshin mu jindim 83 ni nimero ni nimero amupalangeshin ma kopi piswimp ni ma miliyon 40 pa uvud.

Ma buku, ma broshir, ma trakt, ma CD/​MP3, ni ma DVD makat kurumburil malejan ma Bibil mu jindim 540. Atuman afunda ni kupalangesh ma biliyon 20 ma mikand yiney mu mivu yitan yasutina, uvud wa mikand yisatu pa muntu kudi antu awonsu adia pa divu!

Atuman a Yehova achapin kand ap kuchapish dichap dia dikarumun kushalijan dia Bibil. Les Saintes Écritures​—Traduction du monde nouveau​—amukarumuna, kumuchap ni kumupalangesh kudi Atuman—​katat udiaku mwawonsu ap chikunku mu jindim 96. Apana ma kopi ma miliyon 166 ni kusut. Atuma alejen kand rusangu ruwamp ra Want . . .

Ku Yikumangan ya win Kristu. Yikumangan ya rubing ni rubing ya ku Chot cha Want yidiap ching kusu ya midimu ya chirelijon; yikweting  rutong ra kufundish. Akat kupan ma diskur piur pa mitu ya milong yimedina pa Bibil, ni kwilej Bibil kusutil ku Chinong cha Kalam ni mikand yikwau. Ku yikumangan yiney, Atuman ilejin kand mutapu wa kwikal in kulejan afanyidina a rusangu ruwamp.

Atuman akat kwilej yom yiney yimwing mu yikumangen 107000 mu mangand mawonsu pa divu, chawiy chisadina anch ikala mu umwing. Yikumangan yiney yikat kusadikang patok. Kakatap kusutish dilong dia kutekin milambu. Chakin kamu, yiney yawonsu yikutwish kwikal yakad usey anch Atuman akangany kusadil yom yikatau kulejan. Pakwez, apakishin kumekesh rusangu ruwamp . . .

Kusutil Chilakej cha Muntu Ipend. Ikasikeshin kupan chilakej chiwamp cha mwikadil wa in Kristu, ni kusal usu wau wawonsu wa kuyisadil antu akwau mudi musotilau ayisadila niyau. (Mateu 7:12) Ap anch adi akad kuwanyin ni yisu yimwing akat kurumbuk, asotin nich muchim umwing kuyisadin antu awonsu nich rukat kadiap ching kusu mu kulejan rusangu ruwamp pakwez kusutil ku kuyikwash mu mitapu yikwau anch chitwishikin.

Atuman a Yehova kakatap kupakish kuyikarumun antu a mangand mawonsu kusutil malejan mau. Mu chilik kanang, pakeza kusadik mudimu winou mudi musotilay Yehova, disudiel dikez kwez, mud mwasambelay Yesu kulejan. Ov, chinech chikurumburik ik mulong wa divu ni antu adiap?

[Chipich chidia pa paj wa 7]

Rusangu ruwamp arilejen mu mangand mawonsu kudi Atuman a Yehova