Atakelau Kudi Mwiku wa Nzamb mu Chitot Chakusambish cha Mivu ni Nlel Unou
Atakelau Kudi Mwiku wa Nzamb mu Chitot Chakusambish cha Mivu ni Nlel Unou
“Yiyukish yiney ya kusal nich akat kuyipan yawonsu kudi [M]mwiku [U]utumbila umwing.”—1 KOR. 12:11.
1. Manans ik tukeza kushinshikin mu dilejan dined?
PENTEKOT. Didi dizu dimwing divurishina chinship chisangareshina mud ik! (Mid. 2:1-4) Kwez kwa mwiku utumbila pa chisu chinicha mu chitot cha kusambish cha mivu kwamekesha kuswimp kwa usey mu yisal ya Nzamb pantaliken ni atushalapol end. Mu mutu wa mulong wa kusambish, twashinshikina mitapu yimwing mwadingay mwiku wa Nzamb kuyitwishish antu ashinshamena a pasak chakwel asala mudimu ukash ni yisend yikwau. Pakwez kushalijan ik kudiaku pakach pa mutapu wasala mwiku wa Nzamb mu chirung cha kurutu kwa in Kristu ni mutapu wasala mu chitot chakusambish cha mivu? Ni mutapu ik utambwilau in Kristu nlel ukwash wa chisal cha mwiku utumbila wa Nzamb? Tushinshikinany amboku pa chinech.
‘Tal Bil Mwilomb wa Yehova!’
2. Mutapu ik wamanay Mariy usu wa mwiku utumbila?
2 Mariy wadinga mu kapalikany kajim ka piur mu Yerusalem peza mwiku utumbila wakanau. (Mid. 1:13, 14) Pakwez, mu chirung cha mivu makum masatu ni kusut kushik pa chinship chinech, ndiy wamana usu wa mwiku wa Yehova mu mitapu yishimokishina. Yehova wasenda mwom wa Mwanend kudiokal mwiur kuulet pa mangand, ndiy wasal anch mariy ikala nich madikaj padingay uchidi mujik. Ndiy wimisha ku ukash wa “mwiku utumbila.”—Mat. 1:20.
3, 4. Ov, mwikadil ik wamekeshay Mariy, ni mutapu ik tukutwisha kumwilikej?
3 Ov, mulong wak amuyukisha Mariy chakwel atambula chisend chinech chijim? Kupwa kwa mwangel kurumburil rusot ra Yehova piur pend, Mariy walonda anch: “Am nidi mwilomb wa [Yehova]. Chifanyidin yom yawonsu yisadika kudi am mudi muwalondanga.” (Luka 1:38) Mu kulond yom mutapu winou, Mariy wamekesha mwikadil wa muchim washinshikinay Nzamb kurutu. Kwakul kwend kapamp kamwing kumekeshin anch ndiy wading tayad chakwel itiya rusot rend pa mulong winou. Kalangwishap chipul ap chimwing piur pa mutapu ela amutej nend kuman madikaj mend ap chinech chela kwikal ni usu pa urund wend ni mbay nend wamutonda mulong wa uruw. Pisambinay piur pend amwinend mud mwilomb mwin kwikepish, Mariy wamekesha anch ndiy wamuchingejina Yehova nich muchim wend wawonsu mudi Mwant wend.
4 Ov, wovap kal yisu yimwing anch ukwachikin nakash nich yikokujol ap yisend mu mudimu wa Nzamb? Chiwapidil kudi muntu ni muntu pakach petu kwiyipul amwinend anch, ‘Ov, nichingejidin rawonsu mudiay Yehova chakwel kusal yom kulondulijan nich rusot rend? Ov, nimekeshin chakin kamu chitongijok cha kwipan kwa kwisotil?’ Ikal nich kashinsh anch Nzamb ukat kupan mwiku wend kudi antu amuchingejin nich muchim wau wawonsu ni itiyijina rusot rend rijim.—Mid 5:32.
Pita Amukwasha Kudi Mwiku Utumbila
5. Mu jinjil ik jamanay Pita kusal kwa mwiku utumbila kurutu kwa Pentekot wa mu muvu wa 33 C.C.?
5 Mudi Mariy, kambuy Pita wamana amwinend usu usadila wa mwiku utumbila wa Nzamb chakusambish pa Pentekot wa mu muvu wa 33 C.C. Yesu wamwinkisha ndiy ni atwimbuy akwau ulabu wa kuyopat ayilembil. (Mar. 3:14-16) Ap anch Bibil kalejenap yom yivud kachom ni kachom, chimeken pamwing ap anch Pita wasadila ulabu winou. Usu wa Nzamb wamekana kand patok pa chisu chamulejau Pita kudi Yesu anch endila pa mem ma karung wa Galalia chakwel amulondula pa mem, ni Pita wasala mwamu. (Tang Mateu 14:25-29.) Chimeken patok anch, Pita wachingejina mwiku utumbila chakwel yimukwasha kuwanyish yisal yijim nakash. Kupwa, mwiku winou wafanyidina kusal padi Pita ni padi ambay nend in kwilej mu mitapu yisu.
6. Kusutil kudi mwiku wa Nzamb, ov, chom ik chatwishay Pita kusal pa chisu ni kwinyim kwa Pentekot wa mu muvu wa 33 C.C.?
6 Pa Musambu wa Pentekot wa mu muvu wa 33 C.C., Pita ni akwau atambula ukaliweny wamushena wa kulond mu jindim ja angez eza ku Yerusalem. Kupwa, Pita watakela ni kuyilej antu ading akumangena. (Mid. 2:14-36) Mwaning, pakusambish ikundj winou wading usadila yom pakad kutong ap mwin wom kupwa wikala nich usu wa kupan uman pakad wom kwikalap nchik ubaj ni kuyizengol. (Mid. 4:18-20, 31) Ndiy watambula ronganyin kusutil ku kurumburil kudiokila kudi Nzamb. (Mid. 5:8, 9) Ni amwinkisha ap kand usu wa kuyivumbul afu.—Mid. 9:40.
7. Ov, malejan ik ma Yesu movikena patok Pita kwov nawamp ching kusu kupwa kwa kumuzizil many nich mwiku utumbila?
7 Ap kurutu kwa Pentekot, Pita watesha kurumburik kwa uyakin uvud walejanay Yesu. (Mat. 16:16, 17; Yoh. 6:68) Pakwez kwading mikadil yimwing ya malejan ma Yesu yashala yakad kwoviken kudi ndiy kurutu kwa Pentekot. Chilakej, Pita kajinguninap anch Kristu ukuvumbuk mudi chitang cha muspiritu pa dichuku dia kasatu; ap Pita kateshap anch Want ukwikal mwiur. (Yoh. 20:6-10; Mid. 1:6) Pita kadingap nich chitongijok cha kwel anch antu akez kwikal yitang ya muspiritu ni kuyikel mu Want wa mwiur. Amwinend watambula dibatish nich mwiku utumbila ni kutambul ruchingej ra mwiur, ndiy wafanyidina kamu kujingunin kurumburik kwa malejan ma Yesu pa manans minam.
8. Awonsu azizidilau many ni “amikok akwau” akwet ronganyin ik?
8 Yom yakanganyau in kwilej a Yesu kutesh pakusambish ayitesha kupwa kwa kuyizizil many nich mwiku utumbila. Nich chibachikin cha mwiku utumbila, in kufund Mifund ya Grek ya in Kristu ayifunda —mulong wa ukwash wetu—mikadil yamushena mud ik ya rutong ra Yehova. (Efes 3:8-11, 18) Nlel unou, antu azizidilau many ni “amikoku akwau” adil pamwing yom ya muspiritu, ilejin ni kwitiy uyakin winou umwing. (Yoh. 10:16) Ov, utambwil nich usey uyakin ni kutesh kwa Dizu dia Nzamb ku kukwashinau kudi mwiku utumbila?
Paul “Wizula ni Mwiku Utumbila”
9. Ov, chom ik chatwishay Paul kusal kusutil mwiku wa mwiku utumbila?
9 Kupwa kwa Pentekot wa mu muvu wa 33 C.C., muntu mukwau watambula chipan cha mwiku utumbila wa Nzamb. Wadinga Saul, wezau kwijikan mudi Paul. Mwiku wasala mudiay mu mutapu tutanidinamu nlel unou. Kambuy Paul amupepila kudi mwiku chakwel afunda mikand 14 ya Bibil. Ni muchadinga kamu chakin kudi Pita, mwiku wa Nzamb wamutwishisha Paul kutesh ni kufund nawamp piur pa ruchingej ra mwom wakad kufang ni mijimbu yakad kuvund mwiur. Nich mwiku utumbila, Paul wokana, wayopata ayilembil, ni ap kand wavumbula muntu wafila kal! Pakwez, ulabu watambulay kusutil ku mwiku utumbila wading nich rutong ra usey nakash, rutong rumwing rikatau atushalapol awonsu a Nzamb kusal nlel, pakwel pakad chilay.
10. Ov mwiku utumbila wikala nich usu ik pa ukaliweny wa kulond wa Paul?
10 Paul, “wizula ni mwiku utumbila,” walejana nich mushiku piur pa muntu umwing mwin kusal yiyimp. Chinech chading nich yibudikin padi ntakel wa kusambish wa ditung dia Shipre watesha mambamb mawonsu! Nyikel wa ditung mwinou witiya uyakin, “mulong washimwoka nakash ku malejan ma Nsalejetu [Yehova].” (Mid. 13:8-12) Chakin kamu, Paul wijika nawamp usey wa mwiku utumbila wa Nzamb pa chisu chafanyidinay kulejan uyakin. (Mat. 10:20) Kupwa, ndiy wakasikesha chikumangen chakwel cha Efes chakwel chilembila mulong wendendiy chakwel amwenkisha ‘ukaliweny wa kulond.’—Efes 6:18-20.
11. Ov, mutapu ik wamutakelau Paul kudi mwiku wa Nzamb?
11 Mwiku utumbila kiwamukwashap ching kusu Paul kulond pakwez, yisu yimwing, wamulikisha kuya kulejan mu mal mamwing. Payay mu weny wend wa umishoner, Paul amutakela kudi mwiku wa Nzamb. (Mid. 13:2; tang Midimu 16:6-10.) Yehova udandamedin kutakel mudimu wa kulejan kusutil ku mwiku wend. Mudi Paul, atushalapol in kuziyil a Yehova asadin usu wa kulejan uyakin pakad wom ni nich mushiku. Ap anch umutakel wa Nzamb umekenap nlel mudi pa chirung cha Paul, tukutwish kwikal nich kashinsh anch Yehova ukat kusadil mwiku wend utumbila chakwel ikala nich kashinsh anch antu a kashinsh akez kutesh uyakin.—Yoh. 6:44.
“Midimu Yishalijadin”
12-14. Ov mwiku wa Nzamb ukat kusal piur pa atushalapol end awonsu mu mutapu umwing? Rumburil.
12 Ov, jinsangu ja chiyukish cha Yehova piur pa chikumangen cha azizidilau many cha mu mivu chitot ya kusambish chiyikashikeshin nakash atushalapol ipanina kudi Nzamb nlel unou? Mwaning! Tek mu manangu mazu mapepidilau nich mwiku wa Nzamb ma Paul mafundinay chikumangen cha Korint piur pa chipan chamushena cha mwiku mu chirung chend anch: “Yiyukish ya kusal nich yishalijadin, pakwez ukata kuyipan udi umwing. Mitapu ya kumusadil Nsalejetu yishalijadin, pakwez Nsalejetu tukata kusadil udi umwing. Midimu yishalijadin, pakwez Nzamb ukata kuyipan midimu yawonsu kudi antu udi umwing.” (1 Kor. 12:4-6, 11) Mwaning, mwiku utumbila ukutwish kusal mu mitapu kushalijan piur pa atushalapol kushalijan a Nzamb mulong wa rutong kanang. Chakin kamu, mwiku utumbila udiaku mulong wa in Kristu a “chisak chikemp” ni “amikoku akwau” end. (Luka 12:32; Yoh. 10:16) Pakwez kakatap kusal chisu chawonsu mu mutapu umwing piur pa chid ni chid cha chikumangen.
13 Chilakej, amakurump akat kuyitond kudi mwiku utumbila. (Mid. 20:28) Pakwez kadiap muntu uzizidilau many ni mwiku utumbila mwawonsu usadila mudi ntakel mu chikumangen. Ov, chom ik tukutwisha kulond pa chinech? Tukulond kusu anch mwiku wa Nzamb ukat kusal mu mitapu kushalijan piur pa yid ya chikumangen.
14 Mwiku uyinkishin azizidilau many mwiku wa kwikal “an a uswan,” ap chitongijok cha kwikal mwan, wawiy mwiku wasadilay Yehova pamuvumbulay Mwanend kapokal kudiokal ku rufu ni kwikal nich mwom wakad kufang mwiur. (Tang Rom 8:11, 15.) Wawiy mwiku wasadilay Yehova mulong wa kutang mangand mawonsu. (Dis. 1:1-3) Kusutil ku mwiku winou utumbila, Yehova wamukwasha Besalel chakwel atwisha kusal mudimu wa pakampwil mu dizang, wamwinkisha Samson usu wa kuwanyish yisal yitina usu wa pa kampwil, ni wamutwishisha Pita kwend piur pa mem. Chawiy lel, kangal twikal nich kanrumbangesh pakach pa kwikal nich mwiku wa Nzamb ni kwikal uzizidilau many nich mwiku wa Nzamb, mu kwikal uzizidilau many udi kwau mudimu wa pakampwil wa mwiku. Kuzizil many nich mwiku kwimedin pa kutond kwa Nzamb.
15. Ov, dibatish nich mwiku utumbila dikudandamen chikupu? Rumburil.
15 Usu wa kusadish utumbila wa Nzamb wasala kal mu mitapu kushalijan piur pa atushalapol end ashishamena, mulong wading chisu chawonsu ni atushalapol end ashinshamena, mwaning, mu tunan twa mivu kurutu kwa kusambish kuzizil kwa mwiku utumbila. Pa Pentekot wa mu muvu wa 33 C.C., kusal kwinoku kusu kwasambisha, pakwez kwelap kudandamen chikupu. Kubatish nich mwiku kukez kupwa, pakwez mwiku utumbila ukez kudandamen kusal padiau antu a Nzamb chakwel adandamena kusal rusot rend chikupu.
16. Yom ik yisadinau nlel unou atushalapol a Yehova kusutil ku mwiku wend?
16 Ov, chom ik chisadikina pakampwil nlel unou pa divu kusutil ku mwiku utumbila wa Yehova? Kujingunik 22:17 wakwil anch: “Mwiku Utumbila ni Ngachik alondil anch: ‘Ez!’ Chifanyidin muntu mwawonsu uteshina yom yiney, niyend alond kand anch: ‘Ez!’ Muntu mwawonsu wovila impu eza. Chifanyidin muntu mwawonsu ukatila mem ma mwom eza, amatambul mamwamu wakad kuland” chakwel kwitiy mem ma mwom. In Kristu azizidilau many nich mwiku utumbila atakedil mu kusal mwamu. Pakwez, amikoku akwau inungin kudi awiy mu kupan diladikij dined. Yisak yawonsu yaad yisadil mu kwovijan nich mwiku utumbila wawiy umwing mu kuwanyish mudimu winou. Antu adia mu yisak yiney yawonsu yaad amekesha chijingidij cha kwipan kwau kusutil ku kutambul dibatish ‘mu dijin dia Tatuku, ni dia Mwan, ni dia mwiku utumbila.’ (Mat. 28:19) Ni awonsu pakach pau aziyil ku chisal cha mwiku wa Nzamb mu mwom wau, ni ku ulikidil chakwel ubudisha dibuj diend mud awiy. (Gal. 5:22, 23) Mudi azizidilau many, amikoku akwau akat kutwishish mwiku wa Nzamb kuyikwash. Nich ukwash wa mwiku wa Nzamb, asadin usu wau wawonsu chakwel alondula yijil ya Yehova ya kwishitul.—2 Kor. 7:1; Kuj. 7:9, 14.
Dandamen Kwit Mwiku Utumbila
17. Ov, mutapu ik tukutwisha kupan uman anch tukwet mwiku wa Nzamb?
17 Chawiy lel, ap anch ruchingej rey rakwinkishau kudi Nzamb ridi ra kwikal nich mwom wa chikupu mwiur ap pa divu, Yehova ukutwish kukwinkish “ukash upandakena ukash wawonsu” mulong weyey kulam kushinshaman kwey ni kutambul difut diey. (2 Kor. 4:7) Kudandamen kulejan rusangu ruwamp ra Want kukutwish kumekan mudi usup. Pakwez vurik anch “Wayukany kwen pakukusaalolanyau masaal mulong wa dijin dia Kristu, mulong [M]mwiku wa uyaj, ndiy [M]mwiku wa Nzamb ushich mu en.”—1 Pita. 4:14.
18, 19. Ov, mutapu ik ukezay Yehova kukukwash kusutil ku mwiku wend utumbila, ni chom ik usotina kusal kulondulijan nich chinech?
18 Mwiku utumbila wa Nzamb udi chipan chipaninay Nzamb pakad kufut kudi antu aukimbina chakin kamu. Ukutwish kukasikesh ukaliweny wey ni rusot rey ra kusal usu mu mudimu wend. “Nzamb ukat kusal machuku mawonsu mu en chakwel wikalany nich rusot, wikalany kand nich usu wa kusal mudi mudia kutenchik kwend.” Chipan cha usey cha mwiku utumbila, kuwejaku nich rusot retu ra kudandamen chinungina pamwing ni usu tusadina nakash wa kudandamen ‘kulejan rusangu ra mwom’ kukez kutukwash “kuwanyish dipandish [dietu].”—Fil. 2:12, 13, 16.
19 Chawiy lel piuchingejina rawonsu mu mwiku utumbila, ipana nich muchim wey wawonsu chakwel uwanyisha yisend yawonsu, ikal nich ukaliweny mu yom yikwinkishinau kusal. (Jak. 1:5) Ndiy ukez kukwinkish yiuswiridina chakwel utesha Dizu diend, urisha nich milong ya mwom, ni ulejana rusangu ruwamp. “Itany mu kulembil, Nzamb ukez kukwinkishany. Surubany, ukez kutanany. Kokalany ku chis, akez kukwanzurilany.” Ni pa chinech padi kand ni kutambul mwiku utumbila. (Luka 11:9, 13) Chakin kamu, dandamen kumwit Yehova chakwel utwisha kwikal mudi antu ashinshamena—a pasak ni a pa chirung cha katat—atakelau kudi mwiku utumbila wa Nzamb.
Ov, Ukutwish Kurumburil?
• Mudi Mariy, mwikadil ik tukutwisha kumekesh ukeza kutuletin yiyukish?
• Mu mutapu ik wamutakelau Paul kudi mwiku wa Nzamb?
• Mutapu ik uyitakedilau atushalapol a Nzamb nlel unou kudi mwiku wa Nzamb?
[Yipul ya Dilejan]
[Chipich chidia pa paj wa 26]
Mwiku wa Nzamb wamutwishisha Paul kupandakan chibachikin cha mwiku uyimp
[Chipich chidia pa paj wa 28]
Nlel unou, mwiku utumbila udiaku mulong wa kuyikwash in Kristu, chikalap nchik richingej rau