1. Ov, mulong wak tufanyidin kutek ruchingej retu rawonsu mu Dizu dia Nzamb?

PAKATAU amakurump kushinshikin anch mwin kwilej Bibil uwanyishin yitinau chakwel asambisha mudimu wa chingand, akat kwiyipul ayinau anch, ‘Ov, muntu mwinou umekeshin mu kulond kwend anch witiyijin anch Bibil udi Dizu dipepidilau dia Nzamb?’ * Kudi muntu usotina kwikal mwin kulejan Want—ni kudi atushalapol awonsu a Nzamb—chakul chifanyidin kwovakan patok anch mwaning. Mulong wak? Mulong ruchingej retu mu Dizu dia Nzamb ni mu ukaliweny wetu wa kudisadil mu mudimu wa kulejan yikez kutukwash chakwel tuyikwasha antu akwau chakwel ashikena ku kumwijik Yehova ni kutambul dipandish.

2. Ov, mulong wak tufanyidin ‘kudandamen mu malejan mitwileja ni mu yom twitiyija’?

² Kambuy Paul wakasikeshina pa usey wa Dizu dia Nzamb pamufundinay Timote anch: “dandamen mu malejan miwileja ni mu yom yiwitiyija.” “Malejan” misambidinay Paul minam udi uyakin wa Bibil wasala anch Timote ateka ritiy rend mu rusangu ruwamp. Uyakin winou wikala nich chibachikin cha chilik chimwing padi etu nlel unou, ni udandamedin kutukwash kwikal nich ‘manangu mulong wa dipandish.’ (2 Tim. 3:14, 15) Yisu yivud tukat kusadinang mazu ma Paul malondwilaku mulong wa kuyilej antu akwau anch Bibil udiokil kudi Nzamb, pakwez tukutwish kutan ayinetu yiyukish yidiokila ku mazu minam madia mu 2 Timote 3:16. (Tang.) Shinshikinany amboku katat verse winou kachom pa kachom. Kusal mwamu kukez kukasikesh ruchingej retu anch malejan mawonsu ma Yehova ‘matentamin.’—Kus. 119:128.

3-5. (a) Ov, chom ik chasalau antu pateshau diskur diasalay Pita pa dichuku dia Pentekot, ni mulong wak? (b) Ov, mulong wak antu avud adinga mu Tesalonik itiyija uyakin? (c) Ov, chom ik piur pa mudimu wetu wa kulejan chikutwisha kuyishimokish antu nlel?

³ Yesu wauleja muchid wa Isarel anch: “Nikez kukutuminany aruu a Nzamb, ni in manangu, ni alej.” (Mat. 23:34) Yesu wisambina piur pa in kwilejend, alejau mutapu wa kusadin Bibil mu mudimu wa kulejan. Pa Pentekot wa muvu wa 33 C.C., muntu umwing pakach pa “alej” inay, kambuy Pita wasala diskur kurutu kwa antu avud adinga mu Yerusalem pajimbulay ma verse mavud madia mu Mifund ya Hebereu. Pateshau mutapu wasadilay Pita mazu minam “mayitapa ku michim,” in kutesh avud. Awiy akarumuka kudiokal ku yitil yau ya pasak. Piswimp tunan tusatu pakach pa antu inay akimba dilikishin dia Nzamb ni ikala in Kristu.—Mid. 2:37-41.

⁴ Mulej mukwau, kambuy Paul, walejana rusangu ruwamp kulemp ni Yerusalem. Kupwa, mu ul wa Makedonia wa mu Tesalonik, ndiy wayileja antu adinga akat kwifukwil mu synagogue. Mu machuku masatu ma kwiswedish, Paul “walondanga nau antu yom ya Mukand wa Nzamb. Wayirumburilanga ni kuyishinshik anch, Mukand wa Nzamb ulondil anch, Kristu Uzizidilau Many ukez kuman mar ma rufu, chad ukez kuvumbuk kwikal kand mwom.” Ov nich chibudikin ik? “Antu amwing [in Yuda] a pakach pau itiya mazu malonday,” ni “chisak chijim cha in Grek.”—Mid. 17:1-4.

⁵ Mutapu usadidilau atushalapol a Nzamb Bibil nlel unou ukat kuyishimokish antu avud. Kupwa kwa mwin chikumbu umwing mu Swisse kutesh mutapu watangay nambaz wetu umwing Bibil, ndiy wamwipula nambaz anch: “Ov, udi nany?” Ndiy wamwakula anch: “Am ni murund nam tudi Atuman a Yehova.” Ndiy walonda anch: “Nading nij. Ov, anany akwau pakad kwikal Atuman a Yehova ela kwez kwol kwam mulong wa kutang Bibil?”

6, 7. (a) Ov, mutapu ik ukutwishau antu akata kulejan ku chikumangen kusadil Bibil nawamp? (b) Ov, mulong wak kusadil nawamp Mukand wa Nzamb kudi kwa usey mu dilejan dia Bibil ku chikumbu?

⁶ Ov, mutapu ik tukutwisha kusadil Bibil nakash pitukata kulejan? Anch ukwet chisend cha kulejan mu chikumangen kudiosh ku chimet, sadil ma reference ma Bibil ma pakampwil. Pa ndond pa kulejan kusu manans majim madia mu maverse ma Bibil ap kumatang pa dipapel dichapinau ku ordinate, buril Bibil ni utanga, ni yikasikesha in ku kutesh chakwel asala chilik chimwing. Chikwau kand, itekina chisu cha kusadil ma verses mulong wa kuyikwash in kutesh chakwel aseja piswimp ni Yehova. Pa ndond pa kusadil yilakej yikash yikutwisha pamwing ap kusipishan, sadil chisu mulong wa kurumburil Dizu dia Nzamb.

⁷ Ov, chom ik tufanyidina kulam mu manangu pitukata kutakel malejan ma Bibil? Pitukata kusadil ma buku metu ma in Kristu, tufanyidin kusal usu chakwel kangal twamatik ma referens ma Bibil. Tufanyidin kumukasikesh mwin kwilej chakwel atanga ma verse majimbwilau ni kumukwash atesha kurumburik kwa maverse minam. Ov, mutapu ik? Chifanyidinap kurumburil yom yivud ni kusal anch dilejan dikala kutang kwa maverse malemp-malemp, pakwez mu kumukasikesh mwin kwilej chakwel arumburila amwinend yiteshinay. Pa ndond pa kumulej chifanyidina kwitiyij ap kusal, tukutwish kumwipul yipul yikash yikeza kumukwash chakwel ashikena mu kukwat mupak uwamp. *

8. Ov, njit ik jasalay Paul mu mujimbu wend?

⁸ Tumening yisu yivud anch mudimu wa “kukand” uding kwau wa in Kristu amakurump. Chikwau kand, amakurump akwet chisend cha ‘kuyikand antu asadila yitil.’ (1 Tim. 5:20; Tit. 1:13) Pakwez kwikand ayinetu kuding kand kwau usey. Paul wading mwin Kristu ukweta chilakej  chiwamp wadinga nich kom ka zwang. (2 Tim. 1:3) Ap mwamu, ndiy wafunda anch: “Pakwez mu mujimbu wam mudi yom yikwau yikata kurish nich yom yinikatila nich manangu mam. Ukash wa yom yiney ya yitil yidia mu mujimbu wam yikat kwinkas.” Mu kwilej mwikadil wa mazu minam, tukez kutesh nawamp kurumburik kwa njit jarishay nich kambuy Paul mulong wa kuyikel mwikadil wend wa chitil.—Tang Rom 7:21-25.

9, 10. (a) Ov, uyimp ik wadingay ni kurish nich Paul? (b) Ov, mutapu ik watwishay Paul kurish njit jadingay ni kurish pantaliken nich chitil?

⁹ Ov, uyimp ik wafanyidinay Paul kupandakan? Ap anch kaulejenap patok, ndiy wamufundina Timote anch ndiy wadinga ‘mwin masaal.’ (1 Tim. 1:13) Kurutu kwa kukarumuk kwend, ujim wa Paul wading ukash pantaliken ni in Kristu. Piur pa yovil yend pantaliken ni in kumulondul Kristu, ndiy walonda anch: “Nading ni kuyovil ujim nakash.” (Mid. 26:11) Paul wileja mutapu wa kupandakan ujim wend, mulong ndiy wafanyidina kurish nakash mulong wa kupandakan yovil ni mazu mend. (Mid. 15:36-39) Ov, chom ik chamukwasha kutwish kusal mwamu?

¹⁰ Payifundinay in Kristu adinga ku Korint, Paul wisambina pa yom yasalay chakwel ikanda amwinend. (Tang 1 Korint 9:26, 27.) Ndiy wa uyikela mwikadil wend wa kuburen kuwanyin nich yitongijok yend yiwamp ya muspiritu. Chimeken anch, ndiy wakimba manans mu chiyul cha Mifund, ni kumwit Yehova chakwel amukwasha kuyisadil, ni kusal usu wa kutwish. * Tukutwish kutan yiyukish kusutil ku chilakej chend mulong turishin chilik chimwing nich yibachikin ya kuburen kuwanyin.

11. Ov, mutapu ik tukutwisha ‘kwipak ayinetu’ chakwel twikala nich kashinsh anch tukat kwendil chakin kamu mu uyakin?

¹¹ Tufanyidinap kulikidil uyimp mu difukwil dietu. Pakwez, tufanyidin kudandamen ‘kwipak’ ayinetu chakwel twikala nich kashinsh anch tukat kwendil chakin kamu mu uyakin. (2 Kor. 13:5) Pitutangina ma verse mudi Kolosay 3:5-10, tukutwish kwiyipul ayinetu anch: ‘Ov, nisadil usu mulong wa kujip yibachikin yam ya kusal chitil bil anch mwikadil wam udi uyimp? Pinikata kutal ku Internet, anch asambish kumekesh yom yiyimp ov, nikat kufung mashin bil anch nisotining kukimbijol mu ma site Web mayimp?’ Kusadil chiyul cha Dizu dia Nzamb mu mutapu winou wa pakampwil kukez kutukwash “kuchish ku mes ni kubabal.”—1 Tes. 5:6-8.

12, 13. (a) Ov, rutong retu rifanyidin kwikal risu pitukata “kutenchik yom,” ni mutapu ik tukutwisha kulondul chilakej cha Yesu pitusadila mwamu? (b) Ov, mazu ma mutapu ik makad ni ndond mu “kutenchik yom” ni antu akwau?

¹² Dizu dia Grek diakarumunau anch “kupup nich” dirumburikin “kusal uwamp, kutenchik yom chakwel yikala yiwamp, ap yitentamina.” Kupwa, tufanyidin kutenchik yom ni antu akad kututesh nawamp ap kurumburik kwa yisal yetu. Chilakej, antakel a relijon wa in Yuda ading akat kwinan anch mulong wak Yesu wading muwamp kudi “in kulambwish yitad nau akayitil.” Yesu wayakula anch: “Antu akash kakuswirinangap mwingang, ching kusu antu ayedila. Yangany, ukilejany kurumburik kwa mazu ma Mukand wa Nzamb ulondila anch: ‘Am, Nzamb, nikatil antu akweta riy kupandakanamu yakupesh yau annam.’” (Mat. 9:11-13) Ndiy wayileja antu awonsu nawamp nich kushimpish muchim dizu dia Nzamb. Chawiy lel, in kwitudish ashikena ku kumwijik Yehova mudi “Nzamb wa ranaken ni mwin riy, wakad kwovang ujim swa, wizwila sens nich rukat ni uyakin.” (Kub. 34:6) Mulong Mwan a Nzamb wasala usu wa ‘kutenchik yom,’ antu avud itiyija rusangu ruwamp.

¹³ Chilakej cha Yesu chitulejin mutapu tufanyidin kuyikwash antu akwau. Muntu wovila kuyip ukutwish kulond nich dizu dikash anch, ‘Nisotil kutenchik yom ni ey.’ Pakwez  kusal mwamu, ridiap rutong ra yom yilejenau mu 2 Timote 3:16. “Mazu mawonsu” matwinkishinap mbil ya kuyilond antu akwau nayimp. Mudi “mpak ya musamun,” mazu mayimp makat kuyovish antu akwau nayimp ni makatap kuletang yiyukish ap yimwing.—Jinsw. 12:18.

14-16. (a) Ov, mutapu ik ukutwishau amakurump ‘kutenchik yom’ mu mutapu wakwel anch ayikwasha antu akwau kupwish milong yau? (b) Ov, mulong wak ‘kutenchik yom’ kwambatan nich Bibil kudi kwa usey mu kuyilil an?

¹⁴ Ov, mutapu ik tukutwisha kusadil kushimpish muchim ni uwamp mu “kutenchik yom”? Tongin bil anch ambay a uruw amwipul mukurump mwin Kristu chakwel ayikwasha kupwish kupwitijan kwau. Chom ik chifanyidinay mukurump kusal? Pakad kwikal ku mutapu umwing ap ukwau, ndiy ukutwish kutongijokin nau pa yany ya Bibil, ap kusadil malejan madia mu shapitre wa 3 wa buku Le secret du bonheur familial. Pakatay mukurump kwisamb nau, ikundj ni mband ukutwish kuman chiyul ik chifanyidin muntu ni muntu kusadil. Mu kusut kwa machuku, mukurump ukusot kuyipul piur pa mutapu ushichau mu dijuku ni kupan ukwash uswiridinau.

 ¹⁵ Ov, mutapu ik ukutwishau anvaj ‘kutenchik yom’ chakwel ayikasikesha anau muspiritu? Tongin bil anch usotin kumukwash mwaney mband ukweta mivu dikum chakwel ipuka arund ayimp. Chakusambish, ufanyidin kushinshikin mutapu yidia yom. Kupwa, anch kudi chom chiyimp, ukutwish kwambamb nend panrend, ni kusadil pamwing ap manans madia mu buku Les jeunes s’interrogent — Réponses pratiques, Volume 2. Mu machuku malondwilaku, ukutwish kusadil chisu chikwau chakwel kwambamb nend. Ukutwish kand kuman yitongijok yend pakatay kwipan mu mudimu wa chingand ap kwipan mu kwipuwangesh pamwing ni dijuku. Anch wamekesh uwamp ni kushimpish muchim, mwaney mband ukez kuman anch umukatin. Ni ukez kusal usu wa kusadil chiyul chey ni kwipuk kusal yom yiyimp mu mwom wend.

 ¹⁶ Mu mutapu winou uwamp ni wa kushimpish muchim, tukutwish kuyikasikesh antu akamina piur pa ukash wau wa ku mujimbu, aziyina mulong ashadisha mudimu wau, ap mulong kateshinap nawamp kurumburik kwa malejan mamwing ma Bibil. Kusadil Dizu dia Nzamb mulong wa ‘kutenchik yom’ kwaleta yiyukish yijim kudi antu a Yehova.

17. Ov, mulong wak tufanyidin kwitiy dipup nich kujikitish?

¹⁷ “Pakat kutukandau chikat kumekan anch chidi chisu cha runeng, kichidiap chisu cha musangar.” Ni kupwa, “kukand kwinoku kukez kubudish kutentam ni chisambu mu mom yetu.” (Heb. 12:11) In Kristu avud amakurump itiyijining anch kukand kwatambulau kudi anvajau akaritiy kwayikwasha. Ni kwitiy kukand kudiokila kudi Yehova, ni kwapanau kudi amakurump in Kristu, kutulamin mwi njil ya mwom.—Jinsw. 4:13.

18, 19. (a) Mulong wak chiyul chidia mu Jinswir 18:13 chidi cha usey nakash mu “kuyilej antu mu kutentam”? (b) Pakatau kumekesh amakurump kushimpish muchim ni rukat mu kuyisadil asadila chitil, ov, chibudikin ik chidingaku chisu chivud?

¹⁸ Kupan dipup diwamp kwitin kwikal nich ukaliweny. Yehova wayileja in Kristu anch afanyidin kulejan “mu kutentam.” (2 Tim. 3:16) Chawiy lel, tufanyidin kusadil yany ya Bibil chakwel yitutakela. Chany chimwing chidi mu Jinswir 18:13: “Anch muntu wakul wakad kal kutesh, udi usup wend ni usany.” Chawiy lel, anch amakurump asotin kwambamb ni muntu wafishau nich anch wasala chitil chimwing chikash, afanyidin kushinshikin nawamp nakash mulong chakwel kwijik yom yawonsu. (Kuv. 13:14) Chawiy lel, akutwish kulejan “mu kutentam.”

¹⁹ Chikwau kand, Dizu dia Nzamb diyilejin amakurump in Kristu anch afanyidin ‘kushimpish muchim’ pakatau kuyikand antu akwau. (Tang 2 Timote 2:24-26.) Chakin, muntu ukutwish kumukwatish Yehova usany ni kuyisal nayimp antu akad mulong. Pakwez, mukurump wovila ujim pakatay kumuyul muntu wa mutapu winou kakutwishap kumukwash. Pakwez, anch amakurump ashiken ku kwimburij ‘kudimuk kwa Nzamb,’ akutwish kusal anch muntu washadikina akarumuka.—Rom 2:4.

20. Ov, yany ik yifanyidinau anvaj kusadil pakatau kuyikand anau?

²⁰ Mu kuyilil anau mu ‘kuyikand ni kuyibabesh nich malejan ma win Kristu,’ anvaj afanyidin kusadil yany ya Bibil. (Efes 6:4) Tatuku ufanyidin kwipuk kumukand mwanend mulong wateshin ku mutambu umwing piur pa chaku cha mwanend. Ujim ukash ufanyidinap kwikal mu dijuku dia in Kristu. “Mulong Nsalejetu [Yehova] wizwil nich kuwap ni riy,” ni antu akweta chisend cha kuyikand ansand afanyidin kwikasikesh chakwel amekesha niyawiy mikadil yiney ya rukat.—Jak. 5:11.

21, 22. Ov, mazu ik madia mu Kuseng 119:97-104 malejena nawamp yovil yey piur pa Dizu dia Yehova?

²¹ Muntu umwing utentamina wamekesha chisu chimwing mulong wak wading ukatishin chijil cha Yehova. (Tang Kuseng 119:97-104.) Mu kwilej chijil chinech, ndiy wikal nich manangu, chovu, ni nteshil. Kulam chiyul chinech kwamukwasha chakwel ipuka njil yiyimp yela kuyovish antu akwau nayimp. Kudi ndiy kwilej Bibil kwading kuwamp ni kusangareshina. Ndiy wakwata mupak wa kumuziyil Nzamb mulong yany yend yamuletina yiyukish yivud mu mwom.

²² Ov, ukwatin nich usey “Mazu mawonsu”? Nich mazu minam, ukez kutung ritiy rey anch Nzamb ukez kuwanyish rutong rend. Chiyul chend chapepilau chikuchidijin ku yibudikin yiyimp ya chitil. Ni kusutil ku kurumburil nawamp, ukutwish kuyikwash antu akwau chakwel atana njil ya mwom ni kushalamu. Tusadilany amboku nakash “Mazu mawonsu” pitukata kumusadil Yehova Nzamb wetu ukweta manangu mapandikena ni rukat.