1. Ov, mulong wak tukutwish kumutazuk Yehova anch Mwin Kulejan wakusambish ni mujim nakash?

MWIN KULEJAN udi muntu ulejena rusangu ruwamp. Mwin Kulejan wakusambish ni mujim nakash udi Yehova Nzamb. Kapamp kamwing kupwa kwa kubwambwil kwa anvaj etu a kusambish, Yehova walejana rusangu ruwamp anch nnak—ap, Satan Djabul—akez kumushesh. (Dis. 3:15) Mu kusut kwa yitot ya mivu, Yehova wayipepila antu ashinshamena chakwel afunda kachom pa kachom piur pa mutapu ukezau kutokish dijin diend diasalau, pa mutapu ukezay kudiosh uyimp waletay Satan, ni pa mutapu akezau antu kuchirikin mu mashakamin mashadishau kudi Adam nenday Ev.

2. (a) Ov, angel akwet mudimu ik kulondulijan nich mudimu wa kulejan? (b) Ov, chany ik chatekay Yesu mulong wa kulejan?

² Angel niyawiy ading in kulejan. Akat ayinau kulejan rusangu ruwamp, ni akat kuyikwash antu akwau mu kupalangesh kwa rusangu ruwamp. (Luka 1:19; 2:10; Mid. 8:26, 27, 35; Kuj. 14:6) Ov, chidi nchik piur pa mwangel mujim Mikayel? Padingay Yesu pa divu, ndiy wateka yany mulong antu adinga ni kulejan. Mulong, Yesu watunga mwom wend wawonsu pa mudimu wa kulejan rusangu ruwamp!—Luka 4:16-21.

3. (a) Ov, rusangu ruwamp ik tukata kupalangesh? (b) Ov, yipul ik yitusangareshina etu mudi in kulejan?

³ Yesu wayileja in kwilej end anch ikala in kulejan. (Mat. 28:19, 20; Mid. 1:8) Kambuy Paul wamuleja mbay nend wa mudimu Timote anch: “Sala mudimu wa kupalangesh dizu, wanyish mudimu wey.” (2 Tim. 4:5, TMK) Ov, rusangu ik ruwamp tukata kupalangesh pitudia in kumulondul Yesu? Mu rusangu riner mudi uyakin ukasikeshina ulejen anch Yehova, Tatukwetu wa mwiur utukatin. (Yohan 3:16; 1 Pita 5:7) Mutapu ujim umekeshinay Yehova rukat rend udi kusutil ku Want wend. Chawiy lel, tukwet musangar wa kuyilej antu akwau anch awonsu aziyidila ku yany ya Want, amuziyidila Nzamb, ni asadila yom yitentamina akutwish kwikal mu urund wa piswimp ni ndiy mudi arund nend. (Kus. 15:1, 2) Chawiy lel, rutong ra Yehova ridi ra kudiosh mar mawonsu.  Ndiy ukez kudiosh kand runeng ridiokila ku kuvurik kwa mar ma pasak. Ridi rusangu ruwamp mud ik! (Isay 65:17) Mulong tudi in kulejan, shinshikinany amboku yakul ku yipul yiney yaad ya usey: Ov, mulong wak chidi cha usey anch antu atesha rusangu ruwamp nlel unou? Ni mutapu ik tukutwisha kuwanyish mudimu wetu wa kulejan?

4. Ov, jinsangu ik ja makasu jalejanau yisu yimwing kudi antu piur pa Nzamb?

⁴ Tongin bil anch akulej anch tatukwey wakulika pamwing ni dijuku diey. Tong bil anch antu alondina anch amwij nawamp asambish kulond anch ndiy wading wakad kuyisanger akwau, mwin kujindjik chaku chend, ni mwin chisum. Antu amwing akutwish kukulej anch kwikil mutapu wa kumanijan kand ni tatukwey mulong wafil kal. Antu avud alejana jinsangu ja mutapu winou piur pa Nzamb. Awiy alejana anch Nzamb udi ujindj ukash, chitwishikinap kumwijik, ap udi mwin chisum. Chilakej, anyikel avud a chirelijon alondin anch Nzamb ukez kuyimesh antu ayimp mar mwin ndond ya mar ap mu karung ka misiny. Antu akwau alondin anch Nzamb ndiy uletina mar ma yitangil. Ap anch yinship yiney yikat kuyijip antu awamp ni ayimp, awiy akat kulejan anch mar minam madi dipup didiokila kudi Nzamb.

5, 6. Ov, malejan ma dikarumuk ni ma makasu mikala nich usu wa mutapu ik kudi antu?

⁵ Antu akwau alejen anch Nzamb kadiakwap. Pa mulong winou, shinshikin piur pa dilejan dia dikarumuk. Antu avud akasikeshina jinsangu jinej alondining anch mwom wikalaku pakad umutakel ap umwing wa manangu. Alondin anch kwikil Sakatang. Amwing ashikena ap kulond anch muntu udiokil kwi nnam mukwau, chawiy lel chikezap kushimok anch antu akwau akat kusal yom mudi annam. Antu atekina ritiy rau mu dikarumuk kakwetap ruchingej. Alondin anch chisum chikash chayikel antu akad usu, yidi kwau yijil ya chitangil. Chawiy lel chishimokishinap anch antu avud akat kwitiyij anch kuburen kutentam kukez kudandamen kwikalaku pakach petu. Chikwau kand, antu atekina ritiy mu dikarumun aburedin ruchingej rakin.

⁶ Pakad kwidjidjek, malejan ma dikarumuk ni malejan ma makasu makwashin ku mar mamenau antu mu machuku ma nsudiel. (Rom 1:28-31; 2 Tim. 3:1-5) Malejan minam ma antu maletinap rusangu ruwamp rakin ap ra chikupu. Pa ndond pa chinech, mudi mufundinay kambuy Paul, ayishil antu ‘mu manangu ma mididim, ni iyauril ku mwom udiokila kud Nzamb.’ (Efes 4:17-19) Chikwau kand mafundish ma dikarumun ni mafundish ma makasu mayikangeshin antu kwitiy rusangu ruwamp ridiokila kudi Nzamb.—Tang Efes 2:11-13.

7, 8. Ov, mutapu ik umwing ukutwishau antu kutesh nawamp rusangu ruwamp?

⁷ Mulong wa kwikal mu urund ni Nzamb, antu afanyidin kwitiyij cha kusambish anch Yehova udiaku ni kudi mayingish mawamp masadila anch tumushejina piswimp. Tukutwish kuyikwash chakwel atambula ronganyin kusutil ku kuyikasikesh chakwel ashinshikina pa yitang. Pilejinau antu piur pa yitang ni kushinshikin nawamp, akat kwilej manangu ni dikand dia Nzamb. (Rom 1:19, 20) Kusal usu wa kuyikwash antu chakwel akudisha chitongijok cha kalimish pakatau kutongin piur pa yom yasalay Sakatang wetu Mujim, tukutwish kusadil mabroshir maad La vie a-t-elle été créée ? ni ulondina anch Cing questions à se poser sur l’origine de la vie. Ap mwamu, antu ilejina ching kusu kusutil piur pa yitang kakezap kutan yakul ku yipul yimwing yikash piur pa mwom, mudi yiney: Ov, mulong wak ulikidilay Nzamb mar? Ov, risu rutong ra Nzamb piur pa divu? Ov, Nzamb winbangidin?

⁸ Mutapu umwing ukutwishau antu kutesh nawamp rusangu ruwamp piur pa Nzamb ni rutong rend udi kusutil ku kwilej Bibil. Chidi chisend chijim mud ik tukweta cha kuyikwash antu chakwel atana yakul  ku yipul yau! Mulong wa kushik ku michim ya in kututesh, tufanyidin kusal yom yivud kupandakanamu kusu kuyilej mutapu yidia yom; tufanyidin kuyitiyijish. (2 Tim. 3:14) Tukutwish kusal anch itiyija kusutil ku kulondul chilakej cha Yesu. Ov, mutapu ik watwishay? Diyingish dimwing didi anch ndiy wasadila nawamp yipul. Mutapu ik tukutwisha kumwimburij?

9. Ov, chom ik tufanyidina kusal anch tusotin kuyikwash antu muspiritu?

⁹ Ov, mutapu ik tukutwisha kusadil yipul mudi Yesu, mu mudimu wa kulejan? Chiwamp, shinshikin chilakej ech: Mwingang wey ukulejin anch ndiy ukwet rusangu ruwamp ra kukulej. Ndiy ukutwish kwok mayej mey anch wabaril mujimbu wey. Ukutwish kumwitiyij. Pakwez chikwikal nchik anch wakulej mwamu kurutu kwa kukwipul yipul yimwing piur pa ukash wey? Chinech chimeken patok anch ukez kumuchingejin chakin kamu. Ap anch wij nchik mudimu wend, mwingang ufanyidin kwipul ni kutesh chom ik uyedina kurutu kwa kukukwash mu mutapu win wawonsu. Chilik chimwing, anch tufanyidin kuyikwash antu chakwel itiyija rusangu ruwamp ra Want, tufanyidin kwikal nich ukaliweny wa kwipul yipul ya kin. Ching kusu twaman patok mwikadil wau wa muspiritu chawiy lel tukutwisha kuyikwash.

10, 11. Ov, chom ik tukutwisha kusal anch twimburij mutapu wa kulejan wa Yesu?

¹⁰ Yesu wading wij anch kutond yipul yiwamp kukatap kusu kumukwash mulej ileja piur pa mwin kwilej pakwez kand kukat kusal anch in kutesh iyandjika niyawiy mu mambamb. Chilakej, pasotay Yesu kuyilej in kwilej end dilejan dia kwikepish, wasambisha bil mu kuyipul chakwel akula. (Marko 9:33) Mulong wa kumulej Pita piur pa kutongijokin pa yany, Yesu wamwipula yipul yivud. (Mat. 17:24-26) Pa chisu chikwau, pasotay Yesu kujingunin chadinga mu muchim wa in kwilej end, ndiy wayipula yipul yivud yimekeshina yitongijok kushalijan. (Tang Mateu 16:13-17.) Mu kusadil yipul ni kurumburil, Yesu wasal yom yivud kupandakanamu kulejan mutapu yidia yom. Ndiy wayishika ku michim, wayikasikesha antu chakwel asala kwambatan nich rusangu ruwamp.

¹¹ Anch twamwimburij Yesu mu kusadil nawamp yipul, tusadil yom yisatu. Tujingunin mutapu tukutwisha kuyikwash antu nawamp, tukuyipandakan antu akata kwimik mambamb, ni kutwish kuyilej antu ikepishina mutapu ukutwishau kutaninamu ayinau. Shinshikin yilakej yisatu yimekeshina mutapu tukutwisha kusadil yipul nich yibudikin yiwamp.

12-14. Mutapu ik ukutwisha kumukwash mwan chakwel ikala nich ruchingej nakash piur pa kulejan rusangu ruwamp? Let chilakej.

¹² Chilakej cha 1: Piudia nvaj, ov, chom ik ukusala anch mwaney mukemp walond anch wovil wom wa kuchidij yitiyij yend anch Nzamb watanga pisambinay ni ambay nend a shikol? Chimeken anch ukusot kumukwash chakwel ikala nich ruchingej piur pa kulejan rusangu ruwamp. Chawiy lel, pa ndond pa kumufish nich ap kumuyul kapamp kamwing, mulong wak ukutwishap kwimburij chilakej cha Yesu ni kumwipul yipul yimwing chakwel aleta yitongijok yend? Ov, mutapu ik ukutwisha kusal mwamu?

¹³ Kupwa kwa kutang ni mwaney chikunku cha broshir Cing questions à se poser sur l’origine de la vie, ukutwish kumwipul anch yitongijok ik yimenay anch yimusangareshin nakash. Mukasikesha chakwel ajingunina mayingish mend ni mulong wak witiyijin mudiay Sakatang ni mulong wak usotin  kusal rusot ra Nzamb. (Rom 12:2) Muleja mwaney anch mayingish makwetay mashalijadin ni meyey.

¹⁴ Muleja mwaney anch pakatay kwisamb ni ambay nend a shikol, mwaney ukutwish kulondul chilakej wamwinkishina. Chawiy lel, ukutwish kuchirikin yom yimwing ni kwipul chakwel amurumburila yom yikwau. Chilakej, ukutwish kumulej mbay nend wa shikol anch atanga mushet udia pa paj wa 21 wa broshir Cinq questions à se poser sur l’origine de la vie. Mwaney ukutwish kand kumwipul anch: “Ov chidi chakin kamu anch ADN ukweting usu wa kulam jinsangu kupandakanamu yom yin yawonsu pa chirung chinech cha ordinater?” Mbay nend wa shikol ukutwish pamwing ap kwakul anch mwaning. Kupwa mwaney ukutwish kumwipul anch, “Anch antu asadila ma ordinater katwishinap kushiken ku yibudikin yiney, mutapu ik chikutwishina kudi chom chakad manangu kuwanyish yom yiney?” Chakwel umukwasha mwaney ipuka kwov wom pakatay kwisamb ni antu akwau piur pa ritiy rend, ukutwish kusambish kuchirikinamu chisu ni chisu malejan minam ni ndiy. Anch wamwijidish kusadil nawamp yipul, ukez kumukwash chakwel awanyisha mudimu wend wa kulejan.

15. Ov, mutapu ik tukutwisha kusadil yipul mulong wa kumukwash muntu wakad kwitiyij kwikalaku kwa Nzamb?

¹⁵ Chilakej cha 2: Mu mudimu wetu wa kupan uman, tukat kutan antu akata kwidjidjek anch Nzamb udiaku. Chilakej, muntu ukutwish kutulej anch kakatap kwitiyij anch Nzamb udiaku. Pa ndond pa mazu minam kukatul mambamb, tukutwish kumwipul nich kalimish anch kudiosh chisu ik chikalay wakad kwitiyij anch Nzamb udiaku ni chom ik chasala anch ikala ni chitongijok chinech. Kupwa kwa kutesh yakul yend ni kumujikitish mulong wa kutongin nakash pa mulong winou, tukutwish kumwipul anch ukutwish kwitiy chakwel atanga mukand ulejena uman umekeshina anch mwom autanga. Anch mwin chikumbu wasanger,  ndiy ukutwish kulond anch kakutwishap kulik kutang uman winou. Tukutwish katat kumwinkish broshir La vie a-t-elle été créée ? ap broshir ukweta mutu wa mulong Cinq questions à se poser sur l’origine de la vie. Kusadil yipul nich nkeu ni kwipul nawamp, kukusal mudi nfungul jikata kufungul muchim wa muntu chakwel atesha rusangu ruwamp.

16. Mulong wak tufanyidin kumulik mwin kwilej Bibil adandamena kutang yakul mu buku wend wa dilejan dia Bibil?

¹⁶ Chilakej cha 3: Pitutakedila dilejan dia Bibil, tukutwish kusal anch mwin kwilej asambisha kutang ching kusu yakul yidia mu buku wa dilejan dia Bibil. Pakwez, anch twasal mwamu, tukutwish kukangesh kukul kwa muspiritu kwa mwin kwilej. Mulong wak? Mulong mwin kwilej ukata kuchirikin kusu yakul pakad kutongijokin pa yakul yiney kakutwishap kuya kurutu muspiritu. Ndiy ukutwish kushiken ku kwikal mudi mbut jiumina mu marungul ma rupompat. (Mat. 13:20, 21) Mulong wa kumukwash chakwel ikala mwamu, tufanyidin kumwipul mwin kwilej mutapu umenay yom yikatay kwilej. Pakish kujingunin anch witiyijin chakin kamu malejan minam. Cha usey nakash, mwipula mulong wak witiyijin ap mulong wak ulikin. Kupwa mukwasha chakwel atongina pa Mukand wa Nzamb chakwel ashikena amwinend ku chitongijok chakin. (Heb. 5:14) Anch twasadil yipul nawamp, antu tulejina akez kujijaman dang ni mij yau mu ritiy ni akutwish kurish ni antu akeza kuyipompat ap kuyidimb. (Kol. 2:6-8) Ov, chom ik chikwau tukutwisha kusal chakwel tuwanyisha mudimu wetu wa kulejan?

17, 18. Pitukata kuya ni muntu mukwau mu mudimu wa kulejan, ov, mutapu ik tukutwisha kusal pamwing?

¹⁷ Yesu wayituma in kwilej end aad aad chakwel aya mu kulejan. (Mar. 6:7; Luka 10:1) Kupwa, kambuy Paul wisambina piur pa ‘in kusal mudimu nend asala kal mudimu ujim pamwing ni yamam wa kupalangesh Rusangu Ruwamp.’ (Fil. 4:3) Kulondulijan ni verse winou, mu muvu wa 1953, in kulejan Want asambisha program wa kuyifumb antu akwau mu mudimu wa kulejan.

¹⁸ Piukata kuya pamwing ni mwin Kristu mukwau mu mudimu wa kulejan, ov, mutapu ik ukutwisha kusal nend pamwing? (Tang 1 Korint 3:6-9.) Kimb mu Bibil wey, maverse makatay kusadil mbay ney. Tang matu mey pisambinau mukadivar ulejena nend ni mwin chikumbu. Londul nawamp minsamb anch chifanyidin kumukwash mbay ney kwakul kuchipul kanang. (Mul. 4:12) Pakwez, chiyul chimwing chawiy ech: Ufanyidinap kumukatul pa kan mbay ney paletinay chitongijok chimwing chiwamp. Mushiku wey wakad kuyikel ukutwish kumuziyish mbay ney ni kumukangesh mwin chikumbu kutesh nawamp. Kupwa kwa kuyitesh bil, ukutwish niyey kwandam mu mambamb. Pakwez anch usotin kulond chom chimwing, let chakul chimwing ap yaad mu wiswimp. Kupwa sal anch mbay ney alonda mazu mansudiel.

19. Ov, chom ik chiwapidila kuvurik ni mulong wak?

¹⁹ Ov, mutapu ik ukutwisha ey ni mbay ney kukwashijan umwing ni mukwau mu kulejan ku chis ni chis? Mulong wak ukutwishap kusadil chisu chakwel kwambambin pa mitapu yitwishikina kuwapish mazu mey ma kusambish nich misamb? Shinshikin chakwel kangal walond yom yikutwisha kuyiziyish antu adia mu teritwar wey. Chikwau kand, ipuk kulondin ching kusu pa yilim ya mbay mwin kulejan. (Jinsw. 18:24) Chiwapidil kuvurik anch tudi mudi manung ma kam. Yehova watumekeshina uwamp wend wamushena pakutwinkish yiyukish yiney ya mudimu wa kulejan rusangu ruwamp. (Tang 2 Korint 4:1, 7.) Chawiy lel, tumekeshany amboku etwawonsu kujikitish kusutil ku kusal usu wetu wawonsu mulong wa kuwanyish mudimu wetu wa kulejan.