Adam, muntu wa kusambish, washakama pa divu mu yitot ya mivu. Kupwa, wananapa ni wafa. Kudiosh pinipa, antu apakisha milad yivud ya kwipuk kunanap. Pakwez, kwikil muntu ap umwing wikala ni mwom wa chikupu. Mulong wak? Adam wananapa ni wafa mulong wasala chitil cha kumubwabwil Nzamb. Tunanapin niyetu mulong twaswana chitil cha Adam ni rufu mudi dipup.​—Tang Disambishil 5:5; Rom 5:12.

Chakwel twikala ni mwom wa chikupu, twading tuswiridin anch muntu umwing afuta difut mulong wetwetu. (Job 33:24, 25) Difut udi usey ufutinau mulong wa kumukol muntu, ni kumutambu wetu twading tuswiridin kutukwol kudiokal ku rufu. (Kubudik 21:29, 30) Yesu wafuta usey winou pafay mulong wetwetu.​—Tang Yohan 3:16.

Kwikil muntu ap umwing ukutwisha kutukol ku mayej ni ku kunanap. Chawiy lel, antu akata kumubwambwil Nzamb mudi mwasalay Adam, akez kushadish chiyukish cha kwikal ni mwom. Ching kusu antu alikishinau yitil yau awiy akeza kwikal ni mwom wa chikupu.​—Tang Isay 33:24; 35:3-6.

Chakwel atulikishina, kudi yom tufanyidina kusal. Tufanyidin kumwijik Nzamb kusutil ku kwilej Dizu diend, Bibil. Utulejen mutapu wa kwikal ni mwom uwamp ni mutapu wa kwikal ni chiyukish cha Nzamb ni mwom wa chikupu.​—Tang Yohan 17:3; Midimu 3:19.