1. Rumburil kushalijan kudia pakach pa mutapu umenau antu avud uswik nich yikasikeshinau mu Rom 12:11.

USWIK wa win Kristu ushalijadin nakash ni yitonginingau antu avud piur pa uswik. Mu manangu mau, kwikal muswik kurumburikin kwikal ayikedilau ni chisum, ameshinau mar, ni asadidinau yom yakad kufanyin. Pakwez Dizu dia Nzamb diapepilau dilejen piur pa uswik witina mudimu wa kwisotil kudi Mwant mwin rukat. Chawiy lel, payilejay kambuy Paul in Kristu a mu chitot cha kusambish cha mivu anch ‘musadilany Nzamb mudi aswik,’ wading ukasikeshidin piur pa mudimu utumbila ubachikinau kudi rukat ra Nzamb. (Rom 12:11) Ov, chom ik chitina uswik winou? Ov, mutapu ik tukutwisha kwipuk kwikal aswik a Satan ni a mangand mend? Difut ik didiokila ku mudimu ushinshamena mudi muswik wa Yehova?

2. (a) Chom ik chela kumubachik mwin Isarel muswik chakwel alika kwikal ni want ipend? (b) Chom ik chading chirumburikina kumubuz muswik wa kwisotil ditu?

² Mu Yijil ya Nzamb yamwinkau Isarel, twilejin piur pa mutapu wa uswik utwitinay Yehova. Muswik mwin Hebereu afanyina kumwinkish want ipau kupwa kwa mivu sambwad ya mudimu wend. (Kub. 21:2) Pakwez, kudi muswik wadinga umukatina chakin kamu mwant wend ni wading usotina kushal mu mudimu wend, Yehova watenchika yom mu mutapu umwing wa pakampwil. Mwant wafanyina kumutwal muswik wend ku chis ap ku chibamb cha ku chis ni kumubuz ditu diend nich mubur. (Kub. 21:5, 6) Mutapu winou wa kubuz ditu wading ni kurumburik kanang. Mu dizu dia Hebreu, chitongijok cha kusambish cha kuziyil achilejen kusutil ku dizu dikwatijadina nich kutesh ni kwov. Muswik wa kwisotil wading ufanyidin kudandamen kumuziyil mwant wend mu mudimu wend. Chinech chitukwashin kusanger yitinau mu kwipan kwetu kudi Yehova​—kuziyil kwa kwisotil kubachikinau kudi rukat ra Nzamb.

3. Chom ik chidia mufulandal wa kwipan kwetu kudi Nzamb?

 ³ Pitwipana mulong wa kutambul dibatish dia win Kristu, twading twakwatin kal mupak wa kumusadil Yehova, chakwel twikala aswik end. Kwipan kwetu kwadiokala ku rusot retu ra kumuziyil Yehova ni kusal rusot rend. Kwikil muntu watushindila chakwel tusala mwamu. Chikwau kand, ap ansand atambwiling dibatish ching kusu kupwa kwa kwipan ayinau kudi Yehova, chidiap mulong wa kuyisangaresh anvajau. Mufulandal wa kwipan kwa win Kristu udi rukat kudi Mwant wetu wa mwiur, Yehova. Kambuy Yohan wafunda anch “Anch chakin, tumukatil Nzamb, tuziyidil kand ku yijil yend.”​—1 Yoh. 5:3.

4. Chom ik chidia cha usey mulong wa kwikal “aswik in kusal yom yitentamina.”?

⁴ Tumujikitishin Yehova mud ik mulong wa kututwishish twikala aswik end! Ritiy retu mu yakupesh ya difut ya Kristu ritutwishishin kudiokal ku uswik wa chitil. Ap anch tudi akad kuwanyin, twiteka kwa kwisotil mu umutakel wa Yehova ni Yesu. Paul warumburila chinech patok mu umwing wa mikand yend yapepilau anch: “Ichingejany anch, kwovijan kwen ni yitil kwafil kal. Pakwez katat udiany aom, ushichany nend Nzamb pamwing ni Kristu Yesu.” Chikwau kand wayibabesha anch: “Wijany chakin, anch wipanany kumuziyil muntu, en wikalany kal aswik a muntu winiwa. Udiany aswik a yitil yikata kukutwalany ku rufu, ap udiany aswik a Nzamb ukata kukutwalany ku kutentam. Pakwez chifanyidin kumujikitish Nzamb! Mulong chisu chimwing en wadingany aswik a yitil, chad kwinyim waziyilany nich michim yen yawonsu ku malejan ma uyakin miwatambulanya. Akukwolanya kal ku yitil, chad wikalanya kal aswik in kusal yom yitentamina.” (Rom 6:11, 16-18) Umen anch kambuy wisambidin piur pa ‘kumuziyil nich muchim.’ Chikwau kand, kwipan kwetu kudi Yehova kwawiy kutusadina “aswik in kusal yom yitentamina.”

5. Ov, njit ik turishina nich mu mujimbu wetu, ni mulong wak?

⁵ Pakwez, kudi yikangesh tufanyidina kupandakan chakwel tushakama kukwatijan ni kwipan kwetu. Turishin njit jaad. Chakusambish, yidi njit yarishay Paul. Wafunda anch “Mu muchim wam nikat kusangar mulong wa yijil ya Nzamb. Pakwez mu mujimbu wam mudi yom yikwau yikata kurish nich yom yinikatila nich manangu mam. Ukash wa yom yiney ya yitil yidia mu mujimbu wam yikat kwinkas mudi muntu wa rukan.” (Rom 7:22, 23) Kuburen kuwanyin kutwaswana kudandamedin kwikal mudi etu. Chawiy lel, tudandamedin kurish ni yibachikin ya mujimbu wetu. Kambuy Pita watukasikesha anch: “Ikalany nich mwom wa mutapu wa antu akwodilau kal, chawiy kangal wasadilany want ipen wen kwikal chom cha kujindjik nich kuyip kwen, pakwez ipanany kamu kwikal atushalapol a Nzamb.”​—1 Pita 2:16.

6, 7. Mutapu ik usadinay Satan anch mangand minam mikala masangareshina?

⁶ Tukwet njit ja kaad jitufanyidina kurish nich, njit jetu pantaliken ni mangand minam madia mu chibachikin cha ayilembil. Satan, mwin kuyikel mangand, utwasin njit chakwel ayipisha kushinshaman kwetu kudiay Yehova ni Yesu. Usotin kututek mu uswik kusutil ku yoziu ya chibachikin chend chiyimp. (Tang Efes 6:11, 12.) Mutapu umwing usadidinay Satan mwamu udi kusutil ku kusal anch mangand mend mikala masangareshina, ni mapwitina manangu. Kambuy Yohan wababeshana ang “Anch muntu wakat mangand, rukat ra Tatuku kirishichap mu muchim wend. Mulong yom yawonsu yidia mu mangand​—charumburik anch, maku mayimp ma akayitil, ni ris ra yom yikat kumanau nich mes mau, ni kwibaz kwa yom yikwetau ni kwa yom yisadilau—​yom yiney yawonsu kiyidiokilap kudi Tatuku, pakwez yidiokil ku mangand.”​—1 Yoh. 2:15, 16.

⁷ Rusot ra kwikal ni yom yivud ya kumujimbu ripalangen pa mangand. Satan ukasikeshin chitongijok chakwel anch nfalang jawiy  jiletina musangar. Ma magazin majim mavulijadin. Ma piblicite makasikeshin mulad wa mwom wimedina pa kwikal ni yom yivud ni kwisangaresh. Ma biro matadina milong ya weny, malejen anch muntu ukutwish kuya kwindond ya wingendj pamwing ni antu ija mangand mawonsu. Mwaning, yawonsu yitunyingumokina yimekeshin anch yidi mulong wa “uwamp” wetu​—pakwez yikwatijadin chisu chivud nich yijil ya mangand.

8, 9. Ov, ubaj ik wakin udiaku, ni mulong wak?

⁸ Pisambidinay piur pa antu adinga mu chikumangen cha win Kristu cha mu chitot cha kusambish cha mivu adinga nich chitongijok cha mangand, Pita wababesha anch: “Akat kwisangarish nich maku mayimp ma mujimbu, makat kusadilau patok mukach mwa muten. Awiy adi in kukwatishan usany ni dises pakat kusalau yom yiney pa chisu chiukata kudiany nau yakudia ya misambu. Awiy akat kulond yom yamwamu ya kwibaz. Akat kuta mupit nich maku mayimp ma mujimbu mulong wa kuyikwat antu asambisha kal kwiyiyep in kushakam mu kurumbuk. Awiy akat kushilamu kuyinkish antu want ipau, pakwez ayinau adi aswik a yaku yikeza kuyishesh. Mulong muntu ni muntu udi muswik wa chom chamuyikela kal.”​—2 Pita 2:13, 18, 19.

⁹ Kuwanyish “ris ra yom yikat kumanau nich mes mau” kukatap kumushil muntu want ipend. Pakwez, ukat kwikal muswik wa mwant wakad kumekan wa mangand minam, Satan Djabul. (1 Yoh. 5:19) Kudi ubaj wakin wa kwikal muswik wa yom ya kumujimbu—udi uswik umwing ukasikena kuuchin.

10, 11. Ov, anany apompatinau pakampwil nlel unou kudiay Satan, ni mutapu ik ukutwisha shikol ya mangand kuyiletin yikokujol?

¹⁰ Mudi mutapu wasalay mu chir cha Eden, Satan uyipompatin kand nlel antu akad kwijik yom yivud. Ansand ayirishishin mu mutapu umwing wa pakampwil. Satan kakatap kusangar anch wamuman nsand, ap muntu mukwau, wipan amwinend chakwel amusadila Yehova mudi muswik. Mukankuny winou wa Nzamb usotin anch awonsu apanina mwom wau kudi Yehova akanganya mu kwipan ni mu kushinshaman kwau.

¹¹ Chirikinany amboku ku chilakej cha muswik witiya abuza ditu diend. Muswik winou wafanyina kwov kusansam chisu chikemp; pakwez mu kusut kwa machuku, chikala chijingidij cha rawonsu cha uswik wend. Kudi nsand, kutond mwikadil wa mwom ushalijadina ni wa arund nend kukutwish kwikal kukasikena, ap kwa mar. Satan ukasikeshin chitongijok cha kwel anch mudimu uwamp mu mangand ukez kumusangaresh muntu, pakwez in Kristu afanyidin kushinshikin  pa usey wa kuwanyish maswir mau ma muspiritu. Yesu wafundisha anch “Ayuk kwau antu ija anch, tukwet kuswir kwa yom ya Nzamb.” (Mat. 5:3) In Kristu ipanina kal ashich mulong wa kusal rusot ra Nzamb, pikil ra Satan. Musangar wau udi mu chijil cha Yehova, akat kuchitongijokin muten ni uchuku. (Tang Kuseng 1:1-3.) Pakwez, mashikol mavud ma lel makat kumushil kashalapol wa Yehova chisu chikemp nakash cha kutongijokin ni kuwanyish maswir mend ma muspiritu.

12. Ov, kutond ik kurishinau nich ansand avud nlel unou?

¹² Mwant wa mangand ukutwish kusal anch mwom ukasikana kudi muswik mwin Kristu. Mu mukand wend wa kusambish kudi in Korint, Paul wipula anch: “Ov, ey wading muswik pakutazukau kudi Nzamb?” Wayileja kand anch: “Kangal wiyakamish kwey. Pakwez anch waman mutapu wa kwikwol kwikal mwant ipey, sal kwey mwamu.” (1 Kor. 7:21) Ading akatin kukolik mu uswik. Lel unou, mwi ngand jivud, itin kwilej kushik ni mu chimbu cha mivu kanang. Kupwa ansand a shikol akutwish kutond. Kudandamen shikol mulong wa kwikal nich mudimu uwamp mu mangand minam kukutwish kumukangesh muntu kwikal ni want ipend wa kusal mudimu wa chisu chawonsu.​—Tang 1 Korint 7:23.

13. Ov, mulad ik wa shikol ukeza kwikal wa ukwash nakash kudi atushalapol a Yehova?

¹³ Paul wayibabesha in Kristu in Kolosay anch: “Chawiy babalany, chakwel kangal muntu wakukwatany mu mupit wa manangu ma antu ma kudimban makad usey. Yom yiney yikat kudiokal ku malejan makat kutambulau antu mu majuku ma angakau, ni ku miku yiyimp yikata kuyikel pa mangand, pakwez kiyikat kudiokalap kudi Kristu.” (Kol. 2:8) “Malejan makat kutambulau antu mu majuku ma angakau” madi nlel unou mu yitongijok ya mangand yikasikeshinau kudi antu avud ilejina shikol. Shikol ya piur, yimedina pa malejan ma iniversite, yikat kulet madiplom ma gradiwa kudi antu akweta ukaliweny ukemp ap bwat, ni kuyisha akad kwirijek chakwel arisha nich mikadil ya mu mwom. Chinyim ni chinech, atushalapol a Yehova atondin shikol yiyikwashina kukudish ukaliweny ufanyidina chakwel ikala nich mwom uswapela mulong wa kumusadil Nzamb. Alamin mu muchim chiyul cha Paul chapanay kudi Timote anch: “Chakin, mwom wa kumulondul Nzamb ukat kulet mapit mavud kudi muntu ukata kusangar nich yom yikwetay. Chawiy chifanyidin etu kusangar anch tukwet yakudia ni yidjal.” (1 Tim. 6:6, 8) Pa ndond pa kwilej shikol ya piur ni kutambul mitu ya milong mu majin mau, in Kristu akin akat kushinshikin  pa kutambul ‘mikand ya kuyijikish nich’ kusutil ku kwipan nakash pichitwishikina mu mudimu wa chingand.​—Tang 2 Korint 3:1-3.

14. Kukwatijan nich Filip 3:8, ov, mutapu ik wamanay Paul chisend cha kusal mudi muswik wa Nzamb ni wa Kristu?

¹⁴ Shinshikin yamushikena kambuy Paul. Ndiy wileja kudiay Gamaliel mulej umwing wa Chijil cha in Yuda. Malejan matambulay Paul chitwishikin kumilikej nlel unou ni shikol ya universite. Pakwez mutapu ik wamanay Paul malejan minam mu kwilikej nich chisend chend cha kusal mudi muswik wa Nzamb ni Kristu? Wafunda anch: “Am nimen anch, yom yawonsu yidi yamwamu kamu, mulong wa usey ujim upandakena wa kumwijik Kristu Yesu Nsalejam.” Chawiy lel wawejinaku anch: “Mulong wa kumwambat ndiy am nashadishin kal yom yawonsu, niyimen anch yidi kwau dishit divundila, mulong nisotil kwikal wayen wa Kristu.” (Fil. 3:8) Chitongijok chinech chiyikwashin ansand in Kristu ni anvajau amwovila Nzamb wom chakwel atonda nich manangu piur pa shikol. (Tal chipich.)

15, 16. Shikol ik yilejinau ku dirijek dia Yehova, ni yimedin pa chom ik?

¹⁵ Ov, mashakamin ik madia mu mashikol minam ma piur ma mangand? Ov, yidiap ndond yisadinau yisu yivud politik ni mudia kupwitijan pakach pa antu? (Efes 2:2) Chinyim ni chinech, dirijek dia Yehova diletin mulad wa malejan ma piur nakash mu mashakamin ma chisambu ma chikumangen cha win Kristu. Muntu ni muntu pakach petu ukwet chisend cha kutan yiyukish yidiokila ku Shikol ya Mudimu wa Uteokras ya rubing ni rubing. Chawiy lel kudi malejan mapakampwil mulong wa akadivar ayibol ajich (Shikol ya Bibil ya Akadivar Ajich) ni ambay ayibol atena (Shikol ya Bibil ya Ambay in Kristu Atena). Mashikol minam ma uteokras matukwashin kumuziyil Yehova, Mwant wetu wa mwiur.

¹⁶ Tukutwish kutambul mapit mavud ma muspiritu mu Index des publications Watch Tower, ni Watchtower Library pa CD-ROM. Shikol yiney yikasikeshidin pa difukwil dia Yehova. Yitulejen mutapu tukutwisha kuyikwash antu akwau chakwel ashikena ku kuchakwish ni Nzamb. (2 Kor. 5:20) Kupwa, chinech chikez kuyikwash chakwel ayifundisha niyau antu akwau.​—2 Tim. 2:2.

17. Ov, yiyukish ik yidiokila ku kutond shikol ya piur nakash?

¹⁷ Mu chishimu cha talent cha Yesu, atushalapol aad ashinshamena atesha chiyul ni asangara pamwing ni mwant wau mu kuyitek piur pa yom yivud. (Tang Mateu 25:21, 23.) Nlel unou, kutond shikol ya piur nakash kukutwish kulet musangar ni yiyukish. Shinshikin pa chilakej cha Mikayel. Mulong wileja nawamp, amutazuka ku chikumangan chimwing kudi alej end a shikol chakwel isamba nend anch ukutwish kuya ku universite. Akashimuka, patonday Mikayel kwilej mudimu wa makas chakwel atwisha kwipan mu mudimu wa uchibol wa rawonsu. Ov, ndiy wiyova anch washadisha chom chimwing? Urumburil anch: “Malejan ma uteokras minatambula mudi chibol​—ni katat mudi mukurump mu chikumangen—​mading ma usey nakash, yiyukish ni yisend natambula yipandikenamu kulemp nfalang jawonsu nela kutambul. Nikwet chakin kamu musangar mulong nalika kutond kulondul shikol ya piur.”

18. Ov, chom ik chikubachikina kutond shikol ya piur nakash?

¹⁸ Shikol ya piur nakash yitufundishin rusot ra Nzamb ni yitukwashin kumusadil Yehova mudi aswik. Shikol yiney yitekin kurutu kwetu ruchingej ra “kudiokal kand . . . mu uswik wa yom yivundila” ni kwez ku “kwikol kwa uyaj wa an a Nzamb.” (Rom 8:21) Kupwa, twilejin mutapu chiwapina nakash kumekesh anch tumukatin chakin kamu Mwant wetu wa mwiur, Yehova.​—Kub. 21:5.