Pinadinga mwan mukemp nakash, dijuku diam diading dishich piswimp ni Leipzig, Kwingangel kwa Alemany, ku mwimbu ni ngand ya Tchèque ni Polony. Pinawanyisha mivu musamban, twahamina mu jingand jindj mulong wa mudimu wa tatuku​—chakusambish mu Brezil kupwa mu Ekwater.

Pinawanyisha mivu 14, anvajam antwala ku enterna mu Alemany. Mulong ading kulemp, ku Amerik wa Kurul, nafanyina kwipawilap amwinam. Nasambisha kwichingejin nakash. Nabanginangap kwam mutapu ukutwishau antu akwau kwiyov mulong wa yisal yam.

Pinawanyisha mivu 17, anvajam achirika mu Alemany. Kwinsambishin nashakama nau pamwing. Pakwez natwishap kwam kwijidin mashakamin ma dijuku mulong nading nijidin kal kwishakamin amwinam. Pinikala ni mivu 18, nadiokala ku chikumbu.

Nasambisha kuzazat nakash, ni nadingap kwam ni musangar mu mwom. Kupwa kwa kupakish mashakamin kushalijan ni kwadam mu yisak kushalijan, nikala nich kashinsh anch chom chiwamp nifanyidina kusal mu mwom wam kud kuusadin mulong wa kujingunin mangand mawamp kurutu antu amashesha.

Nadiokala mu Alemany, nalanda moto, ni naya mu Afrik. Pakwez kupwa kwa chisu chikemp, nachirika mu Erop mulong wa kurijekish moto wam. Kupwa kwa dichuku dimwing, nading nikat kwend ku chikum cha kawit mu Portigal. Nakwata mupak wa kusha moto ni kusambish kwendin chad mu bato.

Nibomba ni chisak cha ansand ading irijekina kwauk Karung wa Atlantik. Pakach pau pading changadim weza kwikal mukajam, Laurie. Chakusambish twaya pa matung ma Caraïbes. Kupwa kwa kusal machuku makemp mu Porto Rico, twachirika ku Erop. Am ni Laurie twading tuchingejin kukimb wat tukutwisha kukarumun kwikal bato wa kushakamamu. Pakwez kupwa kwa kukimb mu angond asatu, yom yaswimpa. Antazuka kwandam mu usalay wa ngand ya Alemany.

Nasala angond 15 mud isalay wa pa mem. Pa chisu chinicha, twatijana ni Laurie, ni twading tukat kwirijek mulong wa kusambish kwendangan kand. Chisu chikemp kurutu kwa kwandam mu usalay, twalanda ulal wa bato. Pinading nisadina mu usalay, twaukarumuna pakemp pakemp ulal winou kwikal bato mukemp. Twading tutongin kushakamamu mulong wa kudandamen kujingunin mangand. Pawiy kamu pa chisu chinicha—kupwa kwa kupwish mudimu wam wa usalay ni kurutu kwa kupwish kurijek bato—pezau kututal kud Atuman a Yehova ni kusambish kwilej nau Bibil.

Kwinsambishin, namanap kwam usey wa kuswimp kamu mwom wam. Nading natijadin kal ni mband nading nishicha nend ni nading nalikinap kal kuna ruwand. (Efes 5:5) Kupwa natongang anch mupak wetu wa kwendangan pa mangand wading uwamp nakash, mulong twafanyina kusutish chisu mu kutal yom yiwamp nakash yatangay Nzamb.

Pakwez mu win yakin, nading nifanyidin kuswimp​—nakash wuntu wam. Mulong nading mwin chibud nakash ni mwin kwichingejin, nashinshikinang nakash pa ukaliweny wam ni pa yom nasalang. Nitonginang kwam ching amwinam.

Dichuku dimwing, natanga Mafundish ma pa Mukandu mijikena nakash ma Yesu. (Mateu, shapitre wa 5-7) Kwinsambishin, novap kurumburik kwa musangar wisambinay Yesu. Chilakej, walonda anch antu akweta nzal ni impu akwet musangar. (Mateu 5:6) Niyipula anch mutapu ik ukutwishay muntu udia mu maswir kwikal ni musangar. Pinadandamena kwilej, nashikena kujingunin anch etu awonsu tukwet maswir ma mu spiritu, ni mulong wa kumawanyish, tufanyidin kwitiyin nich kwikepish anch tukwet maswir minam. Chawiy Yesu walonda anch: “Ayuk kwau antu ija anch: ‘Tukwet kuswir kwa yom ya Nzamb.”​—Mateu 5:3.

Kupwa kwa kusambish kwilej Bibil, am ni Laurie twashemunikina mu Frans, kupwa mu Itali. Kwawonsu twayangang, twatanang Atuman a Yehova. Nasangera nakash mutapu wading ukatijadinau ni uumwing wau. Namana anch Atuman asadin kamu dijuku dia pa mangand mawonsu. (Yohan 13:34, 35) Kupwa kwa chisu chikemp, am ni Laurie atubatisha mud Atuman a Yehova.

Kupwa kwa kwimbatish, nadandamena kuswimp wuntu wam. Am ni Laurie twakwata mupak wa kusutin kuns kwa Afrik ni twauka Karung wa Atlantik mulong wa kuya mu États-Unis. Pitwading pa karung​—ayinetu aad mu ka bato, pakach ni pakach pa mem mavud nakash—​pawiy najingunina kamu anch nid mukemp nakash ku mes ma Sakatang wetu mujim. Mulong nading ni chisu chivud nakash (kwikiling kwau yom yivud ya kusal mukach mwa karung), nipana nakash mu kutang Bibil. Jinsangu ja mwom wa Yesu panap pansh jampukuna nakash. Wading muntu uwanyidina, ukweta ukaliweny kusutamu muntu win mwawonsu nikutwisha kutongin, pakwez kibazap. Kitonginangap amwinend, pakwez wamutonginang nakash Tatukwend wa mwiur.

Pinatongijokina pa chilakej cha Yesu, namana anch nifanyidin kutek Want wa Nzamb pa ndond yakusambish mu mwom wam kusutamu yom kushalijan nading nisotina kusal. (Mateu 6:33) Pitwashika mu États-Unis, am ni Laurie twakwata mupak wa kushakam kwinikwa ni kushinshikin pa Want.

Pa chisu nading nichingejidina amwinam, nidjidjekang nakash piur pa mipak nakwatang. Pakwez katat nikwet musul wakin wa manangu mulong wa kwintakel. (Isay 48:17, 18) Najingunina kand mutapu wa kwikal ni musangar wakin mu mwom​—kumwifukwil Yehova ni kuyikwash antu akwau kwilej piur pend.

Kusutin kusadin mbil ja Bibil, am ni Laurie twakasikesha uruw wetu. Chikwau kand, tukwet changadim muwamp nakash, umwija ni umukatina Yehova.

Kidiap anch mwom wetu uburedin yakamish. Pakwez nich ukwash wa Yehova, tukwatin mupak wa kuya kurutu ni kudandamen kumuchingejin.​—Jinswir 3:5, 6.