Cameron: Jon, nikatining nakash yom tukata kwisambang ney piur pa Bibil. * Kapamp kansudien twisambina ney, wipula chipul piur pa Want wa Nzamb. Wipula anch mulong wak Atuman a Yehova itiyijining anch Want wa Nzamb wasambisha kuyikel mu muvu wa 1914.

Jon: mwawiy, natangin mukand wen umwing, ni wad ulondin anch Want wa Nzamb wasambisha kuyikel mu muvu wa 1914. Yanshimokishin nakash mulong ey wanleja anch yitiyij yen yawonsu yimedining pa Bibil.

Cameron: Mwawiy kamu.

Jon: Natangin Bibil wakabuj. Pakwez namenap verse wisambidina muvu wa 1914. Chawiy nakimbijodin “1914” mu Bibil wa pa internet. Pakwez anlejin anch mwamwamu.

Cameron: Jon wij? Nikujikitishin mulong wa yom yaad. Chakusambish, mulong watangin Bibil wakabuj. Chinech chimekeshin anch ukatin Dizu dia Nzamb.

Jon: Inge. Kwikil buku mukwau uwapina mud Bibil.

Cameron: Mwawiy kamu. Cha kaad, nikujikitishin mulong anch ukwet yipul ukat kukimb yakul mu Bibil. Yom wasalang yawiy kamu yitukasikeshinay Bibil kusal, palondinay anch: “Dandamen kukimb” mulong wa kwov kurumburik. * Wajikit nakash mulong wa usu wasalang.

Jon: Wajikit. Nikatin kudandamen kwilej. Nadandamenangaku kukimbijol, ni natanangaku jinsangu jimwing piur pa 1914 mu buku twilejining ney. Isambidin yom yalatay mwant—wamana mutond ujim nakash wakatulau kupwa wasapurik kand, yom ya mutapu mwamu.

Cameron: Ah, mwawiy. Ud uprofet udia mu Daniel shapitre wa 4. Wisambidin yom yamanay Mwant Nebukadinesar mu chilat.

Jon: Inge, ndiy winau. Natangang uprofet winiwa tupamp tuvud nakash. Pakwez mu win yakin, nimenap mutapu ukwatijadina ni Want wa Nzamb ap ni muvu wa 1914.

Cameron: Kwikil mulong Jon, ap muprofet Daniel kateshap kamu nawamp kurumburik kwa yom yafunday kusutil spiritu wa Nzamb!

Jon: Mwamu komb?

Cameron: Mwaning. Tal yom yilondinay mu Daniel 12:8: “Natesha mwalonday, pakwez kinovap kurumburik.”

Jon: Komb nidiap amwinam. Mwamu nikwiyakamishap.

Cameron: Uyakin ud anch, ang Daniel kauteshap kurumburik chid mulong chisu chatekay Nzamb cha antu kutesh uprofet udia mu buku wa Daniel chading kand kal chiwanyin. Pakwez nlel, mu chirung chetu, tukutwish kuutesh nawamp.

Jon: Mulong wak?

Cameron: Chiwamp, tal yom yilejenau mu verse ulondwilaku. Daniel 12:9 ulondin anch: “Mazu minam mawonsu madi ma ujindj djat ni pakwezila disudiel.” Chawiy uprofet winou afanyina kuwov kurumburik ching mu kusut kwa chisu, “pakwezila disudiel.” Ni mud mutukumana piswimp ap mu dilejan dietu dia Bibil, uman umekeshin anch tushich mu chirung chinech. *

Jon: Chad, ov, ukutwish kwinrumburil uprofet udia mu Daniel?

Cameron: Nikwikasikesh kukurumburil.

Cameron: Cha kusambish, el bil nikurumburil mu wiswimp yom yalatay Mwant Nebukadinesar. Kupwa tukuman chad kurumburik kwa chilat chinech.

Jon: Chiwamp.

Cameron: Mu chilat chinech, Nebukadinesar wamana mutond ujim nakash wading ushikina djat ni ku diur. Kupwa watesha muruu wa Nzamb walejana anch aukatul. Pakwez Nzamb walejana anch asha chishij ni mij yach mu divu. Kupwa kwa chirung cha “mivu sambwad,” mutond ukusapuk kand. * Uprofet winou wading chakumbish umutadin Mwant Nebukadinesar amwinend. Ap anch wading mwant mujim nakash—mud mutond ushikina djat ni ku diur—amutambula want mu “mivu sambwad.” Ov, uvurikin yom yashikena?

Jon: Bwat, nivurikinap.

Cameron: Kwikil mulong. Bibil ulejen anch Nebukadinesar wanyingumuka mutu, mu mivu sambwad. Mu chirung chinicha kadingap kakweta mutapu wa kuyikel kand mud mwant. Pakwez kupwa kwa mivu sambwad, Nebukadinesar wayerika ni wasambisha kand kuyikel. *

Jon: Chiwamp, nikuteshin. Pakwez mutapu ik yikwatijadina yiney yawonsu ni Want wa Nzamb ap ni muvu wa 1914?

Cameron: Mu wiswimp, uprofet winou uwanyidin mu yikunku yaad. Chikunku chakusambish chawanyina pimana want wa Mwant Nebukadinesar. Chikunku cha kaad chitadin kwimik winyikel wa Nzamb. Chawiy, kuwanyin kwa chikunku chinech cha kaad kwawiy kukwatijadina ni Want wa Nzamb.

Jon: Yom ik yimekeshina anch uprofet winou wafanyina kand kuwanyin kapamp ka kaad piur pa Want wa Nzamb?

Cameron: Chakusambish, tutanin uman mu uprofet win awinau. Kukwatijan ni Daniel 4:17, uprofet winou aupana chakwel “antu awonsu kwijik anch, Nzamb Upandakena Piur pa yawonsu ukwet ukash piur pa mant ma antu. Ukutwish kupan want kudi muntu mwawonsu utondilay.” Ov, umen mazu malondina anch “mant ma antu”?

Jon: Mwaning, malondin anch “Upandakena Piur pa yawonsu ukwet ukash piur pa mant ma antu.”

Cameron: Mwawiy. Utongin anch “Upandakena Piur pa yawonsu” winou ud nany?

Jon: Natong Nzamb.

Cameron: Yakin. Chawiy yiney yimekeshin anch uprofet winou umutadinap kwau ching Nebukadinesar. Utadin kand “mant ma antu”—charumburik anch winyikel wa Nzamb pad antu. Ni anch twashinshikin maverse madia kwinshik ni kwiur kwa uprofet winou ukuman anch chinech choviken.

Jon: Kwakulond anch nchik?

Cameron: Buku wa Daniel wisambidin tupamp tuvud chitongijok chend chijim. Udandamedin kulejan piur pa kuyikel kwa Want wa Nzamb ukutakelau kud Mwanend Yesu. Chilakej, tal Daniel 2:44, anch wachirik mu mashapitre maad kwinyim.

Jon: Chiwamp. Ulondin anch: “Pa chisu cha in kutakel inay, Nzamb wa mwiur ukez kakasikesh want ukwau wakad kez kikal nich disudiel chikupu. Kakez kaukwatap want winou, pakwez ukez kashesh mant makwau mawonsu, chad wawiy ukez kashakam chikupu.”

Cameron: Wajikit. Ov, utongin anch verse winou woviken mud wisambidin piur pa Want wa Nzamb?

Jon: Hmm. novilap nawamp.

Cameron: Chiwamp, umen anch verse ulondin anch Want “ukez kashakam chikupu.” Ching kusu Want wa Nzamb wawiy ukutwisha kusal mwamu, pakwez tukutwishap kulond mwamu piur pa maguvernema ma an a antu, ov, kimwawiyap?

Jon: Mwawiy kamu.

Cameron: Kud kand uprofet ukwau udia mu buku wa Daniel wisambidina piur pa Want wa Nzamb. Uprofet winou ud mu Daniel 7:13, 14. Uprofet ulondin piur pa muntu ukwikala mwant anch: “Amwinkisha usu wa kuyikel, ni uyaj, ni usu wa want, chakwel antu a michid yawonsu, ni a mitapu yawonsu, ni a jindim jawonsu amusadil ndiy. Kuyikel kwend kikukez kapwap, ni want wend ukez kikal wa mivu ni minang.” Ov, mu uprofet winou wamanamu kal chom twadia twisambinang kal kand?

Jon: Wisambidin piur pa want.

Cameron: Mwawiy kamu. Pakwez want ik? Tal, ulondin anch Want ukuyikel “antu a michid yawonsu, ni a mitapu yawonsu, ni a jindim jawonsu.” Charumburik anch, Want winou ukuyikel pa mangand mawonsu.

Jon: Am nateshangap mwamu, pakwez uyingin kwey nich. Mwamu mulondinau.

Cameron: Tal kand yom yikwau yilondina uprofet winou, ulondin anch: “Kuyikel kwend kikukez kapwap, ni want wend ukez kikal wa mivu ni minang.” Yom yiney yid kamu mud yatwatangang mu Daniel 2:44, kimwawiyap?

Jon: Mwawiy kamu.

Cameron: El tuvurik yom twisambina kal kushik ni pinap. Uprofet udia mu Daniel shapitre wa 4 aulejana chakwel antu ijik anch “Upandakena Piur pa yawonsu ukwet ukash piur pa mant ma antu.” Mazu minam kusu kwau mamekeshin anch uprofet winou ufanyidin kuwanyin mu chilik chijim nakash, kadiap ching kusu kwau pad Nebukadinesar. Ni mu buku mwawonsu wa Daniel tutaninamu mauprofet piur pa kuyikel kwa Want wa Nzamb kusutil Mwanend. Chad katat ov, utongin anch choviken kwitiyij anch uprofet winou udia mu Daniel shapitre wa 4 utadin kand Want wa Nzamb?

Jon: Nimen anch mwawiy. Pakwez ni katat kand kal niman mutapu yikwatijadina ni 1914.

Cameron: Chiwamp, tuchirik ku Mwant Nebukadinesar. Mu kuwanyin kwa chikunku chakusambish cha uprofet, ndiy wading umekeshina mutond. Want wend awimika chisu chakatulau mutond ni kuusha mwamu mu mivu sambwad—charumburik anch, panyingumukay mutu mu chisu kanang. Chirung chinicha cha mivu sambwad chapwa payerikay Nebukadinesar ni kuchirik pa want wend. Mu kuwanyin kwa chikunku cha kaad cha uprofet, winyikel wa Nzamb afanyina kuwimikaku mu chisu kanang—pakwez kadiap anch mulong Nzamb wakanganya kuyikel mulong wa diyingishin kanang.

Jon: Kwakulond anch nchik?

Cameron: Pasak, ant a in Isarel ayikela mu Yerusalem ayikwata mud ashich pa “ditand diatenchikay [Yehova].” * Ading amekeshin winyikel wa Nzamb pad antu end. Chawiy winyikel wa ant inay wading umekeshin chakin kamu winyikel wa Nzamb. Pakwez mu kusut kwa chisu, Avud pakach pa ant inay amubwambwila Nzamb ni in Isarel avud imburija chilakej chau chiyimp. Mulong wa kubwambwil kwa in Isarel, Nzamb wayilika in Babilon chakwel ayipandakan mu muvu wa 607 K.C.C. Kudiosh kamu pinipa, kwadingap kand mwant wading umumekeshina Yehova mu Yerusalem. Wawiy mutapu wakatuka winyikel wa Nzamb. Nijap anch winteshin nawamp?

Jon: Mwaning, nikuteshin.

Cameron: Chawiy muvu wa 607 K.C.C. yading nsambishil ya mivu sambwad, ap chirung chafanyina kukatuk winyikel wa Nzamb. Kwinsudien kwa mivu sambwad, Nzamb wafanyina kutek mwant musu wafanyina kumumekesh—pinap chad, mwant winou wafanyina kwikal mwiur. Pawiy pafanyina chad kuwanyin mauprofet makwau twatangang mu Daniel. Chawiy chipul chijim chid cha kwijik: Mivu sambwad yapwa chisu ik? Anch twakul ku chipul chinech, tukwijik chad chisu chasambisha Want wa Nzamb kuyikel.

Jon: Naman kal. Lik bil nipakish—mivu sambwad yapwa mu 1914?

Cameron: Inge! Watesh kal nawamp.

Jon: Pakwez mutapu ik twija anch yapwa mu 1914?

Cameron: Chiwamp, padingay Yesu pa divu, wamekesha anch mivu sambwad yading kand kal yipwa. * Chawiy, chimeken anch chid chirung chilemp nakash. Mivu sambwad yasambisha yitot ya mivu kurutu kwa Yesu kwez pa divu, ni yadandamena mu chisu kanang kupwa kwa Yesu kuchirik mwiur. Vurik kand anch uprofet wa Daniel afanyina kuutesh nawamp ching mu machuku ma “disudiel.” * Chishimokishena, mu mivu ya 1 800, in kwilej Bibil in kashinsh ashinshikina nawamp uprofet winou ni makwau kand. Ajingunina anch mivu sambwad yafanyina kupwa mu 1914. Ni yom yivud yasadika kusambish mu muvu winiwa yimekeshin anch Want wa Nzamb wasambisha kuyikel mwiur mu 1914. Wawiy muvu wasambisha machuku mansudiel ma mangand minam, ap anch chirung cha disudiel. Nimen anch twisambin kal yom yivud ukutwisha kutongijokin . . .

Jon: Chiwamp. Nikuyitangiril kand mulong wa kuyitesh nawamp.

Cameron: Kangal wiyakamish. Niyam changita chisu mulong wa kutesh nawamp uprofet winou. Pakwez natong yom twisambina kal yakukwash kal kuman anch yom yitiyijinau Atuman piur pa Want yimedin pa Bibil.

Jon: Ulondin yakin. Chikat kwinshimokishang nakash pa kuman anch yitiyij yen yawonsu yimedining ching pa Bibil.

Cameron: Nimen anch niyey wikasikeshin kusal mwamu. Mud munakulejang, twaman kal yom yivud. Nij anch pamwing ap ukwet kand yipul yikwau. Chilakej, twaman kal anch mivu sambwad yitadin Want wa Nzamb ni anch yasambisha mu muvu wa 607 K.C.C. Pakwez, mutapu ik twija kamu chakin anch mivu yiney sambwad yapwa mu 1914? *

Jon: Mwaning, yawiy niyipwila.

Cameron: Bibil amwinend utukwashin kwijik kulep kwakin kwa mivu sambwad. Ov, ukusanger twez twisambin mutu wa mulong winou panikweza?

Jon: Nakash kamu.