Bibil utulejin anch disudiel dikurumburik kujiy: “Mulong mar ma machuku minima makez kwikal mayimp, kupandakan mar mamanau antu kudiokal ku disambishil dia mangand kushik ni katat . . . Pakwez Nzamb watonda kal kukepish kuvul kwa machuku minam. Anch ndiy kasalap mwamu, ing kwikil muntu wela kupand.” (Mateu 24:21, 22) Pakwez Nzamb washilamu anch antu avud akupand: “Mangand mayil ni kujiy pamwing . . . , pakwez muntu mwawonsu ukata kusal rusot ra Nzamb ukez kupand chikupu.”​—1 Yohan 2:17.

Anch usotil kupand chisu chikujiya mangand minam ni ‘kushakam chikupu,’ ov, chom ik ufanyidina kusal? Ukusambish kukumangej yom yikutwisha kukukwash anch ukusal kand yitenchik yikwau ya ku mujimbu? Bwat. Bibil utubabeshin anch twikal nich yitongijok yishalijadina ni yiney. Tutangin mu Bibil anch: “Mulong yom yiney yawonsu yikez kusheshik mutapu winou, ov, ukwikalany antu a mutapu ik? Chifanyidin en kwikalany nich mwom utumbila, wikalany kand in kudandamen kudi Nzamb, piuchingedilany Dichuku dikurumburishay Nzamb.” (2 Pita 3:10-12) Mazu “yom yiney yawonsu” marumburikin ant a mangand minam mayimp ni awonsu atondina kal umutakel winou kulik wa Nzamb. Chakin, ap anch twalam mapit mawamp ma kumujimbu, makutwishap matupandish ku kujiy kwinoku.

Chakin kamu, mulong wetwetu kupand, tufanyidin kwipan nakash kudiay Yehova Nzamb ni kwilej mutapu wa kwikal ni mikadil yiwamp ni kusal yimusangareshina. (Sofoniy 2:3) Pa ndond pa kulondul mikadil ya antu avud nlel ni kuvuramen yijingidij yimekeshina patok anch tudi chirungu chiyimp, tufanyidin ‘kulam mu manang dichuku dia dirumburish dia Yehova.’ Atuman a Yehova akutwish akulej mu Bibil. mutapu ukutwisha kupand pa dichuku dined diezina