MUTU WA MULONG WA PA CHIBUR | ATUMAN A YEHOVA ADI ANANY?
Mulong Wak Tukat Kulejanang?
Kwikil chom chikata kutwijikish nakash mudi mudimu wetu wa kulejan—ku chikumbu ni chikumbu, mwi ndond yidiau antu avud, ni kwawonsu tukutwisha kutan antu. Mulong wak tukat kulejanang?
Atuman a Yehova akat kulejan mulong wa kumutumbish Nzamb ni kwijikish dijin diend kudi antu. (Hebereu 13:15) Tusotin kand kumuziyil Yesu Kristu, walonda anch: “Yangany kudi antu a michid yawonsu, yikarumunany kwikal in kwilejam, . . . yilejany kuziyil ku yom yawonsu yinakulejanya.”—Mateu 28:19, 20.
Tusadin kand mwamu mulong tuyikatin akwetu. (Mateu 22:39) Pakwez, twij anch antu avud akwet ma relijon mau ni twij kand anch kadiap muntu mwawonsu ukata kwitiyij malejan metu. Chikwau kand, twij anch malejan ma Bibil makat kuyipandish antu. Chawiy lel tudandamedin “kulejan ni kurumburil Rusangu Ruwamp ra Yesu Kristu,” mudi mwasalau in Kristu a mu mivu chitot ya kusambish.—Midimu 5:41, 42.
Antonio Cova Maduro mwin kwilej piur pa mashakamin ma antu (sociologue) wafunda anch “usu ni yom yikata kuyishiken Atuman a Yehova, yikutwish kuyiziyish . . . , pakwez mikand yau yikat kushik djat ni kwinsudiel kwa mangand.”—Jurnal El Universal, Vénézuéla
Antu avud akata kutang mikand yetu kadiap kwau Atuman a Yehova. Ma miliyon ni ma miliyon ma antu akata kwilej netu Bibil adi a mu marelijon makwau. Akat kumekesh musangar anch Atuman a Yehova ez kuyital.
Pakwez, ukutwish kwikal ni yipul yikwau piur pa Atuman a Yehova. Chakwel utana yakul, tukwitin amboku:
-
Kumwipul Kaman wa Yehova.
-
Kuya pa kapend ketu ka web, www.pr418.com.
-
Kukumangan ku yikumangan yetu, ni kwinoku kakwitangap nfalang mulong wa kwandam ni yidi mulong wa antu awonsu.
