CHIKUNKU CHA 4

Kupandakan kwa Want​—Kulond Mulong wa Rusangu Ruwamp ku Dirumburish

 PIUKATA kulejanany ku chikumbu ni chikumbu, wateshanyap kal rupwambu ridjimina kulemp? Kudjim kwinoku kushejin piswimp. Piusambishina kwambamb ni muntu nikwau, mwin kulejan udia nend watal kwinyim ni waman mwotak wa ampurish wezina piswimp ni ndond udianya. Mpurish umwing uchirikin mu mwotak ni usejin piswimp ni wipwil anch: “Ov, en aad udianya pakach pa antu ayila ku chis ni chis mu kulejan piur pa Bibil? Antu inanin!” Wasambishany kwakul nich kalimish anch udiany chakin kamu Atuman a Yehova. Ov, chom ik chikeza kukushikenany?

Chinech chimedin pa mutapu ukeza kwikal mulong winou. Mu mivu yasutina, ov, mutapu ik wayisalau Atuman a Yehova kudi anyikel a mangand udia? Ov, kudi chijil cha want ipau wa relijon? Anch chidi mwamu, chidi mulong wa usu wasalau kudi akadivar ni anambaz ney a muspiritu mu makum ma mivu yasutina mulong wa “kulond mulong wa Rusangu Ruwamp ni kurukasikesh.” (Fil. 1:7) Chikalap nchik kwawonsu ushicha, kushinshikin pa kuwin kwa Atuman a Yehova ku dirumburish kukutwish kukasikesh ritiy rey. Mu chikunku chinech, tukez kushinshikin piur pa jinsangu jimwing jasadika patok. Kuwin kwetu kumekeshin uman wa kwel anch Want udiaku chakin kamu, mulong tukutwishap dichuku ap dimwing kusal yom yijim mwamu ku usu wetu ayinetu!