Josef wading mwan mukemp pakach pa an a Jakob. Ayayend amana anch tatukwau wading umukatin Josef nakash. Wij mutapu wiyovau mulong wa chom chinech? Amwovila Josef mukau ni amukisa. Chisu chalatay Josef yilat yadingay kandikal alatangap, wayilejamu ayayend yilat yiney. Atonga anch yilat yiney yirumburikin anch dichuku dimwing akez kamwasin manungin. Kudiokal pinipa amukisa nakash!

Dichuku dimwing anamakwend a Josef aya kulam amikoku piswimp ni musumb wa Sikem. Jakob wamutuma Josef mulong wa kuya kuyital ayayend. Padingay Josef kulemp amumana ni alonda anch: ‘Talany, sayilat wez kalee. El tumujipany!’ Amukwata ni amudjibwila mu dibuku dilemp. Pakwez yayend umwing Yuda, walonda anch: ‘Kangal kumujip! Tumulandishany mudi muswik.’ Chawiy amulandisha Josef kwi nfalang 20 ja utad wa argent kudi in kwisak a ku Madian ading ayila mu Idjibit.

Kupwa, anamakwend a Josef apana mash ma mpemb ku koch wend, ni amutwala kudi tatukwau, ni alonda anch: ‘Ov, winou kadiap koch wa mwaney Josef?’ Chawiy Jakob watonga anch Josef amujipang kal kudi nnam wa chidiany. Wova nayimp nakash. Kwikil muntu watwisha kumwongoj.

Josef amulanda mudi muswik mu Idjibit kudi mukurump wa amasalay utazukinau anch Potifar. Pakwez Yehova wading pamwing ni Joseph. Potifar wamana anch Josef wading muntu muwamp mulong wa kusal mudimu ni wamuchingejina. Kupwa amwinka Josef chisend cha kulam yom yawonsu yadingay nich Potifar.

Mband wa Potifar wamana anch Josef wading muntu muwamp ni ujikishina. Dichuku din diawonsu mband wa Potifar wamulejang  anch asal nend masandj. Mutapu ik wasalay Josef? Walika ni walond anch: ‘Bwat! Chiyipin kusal mwamu. Mukurump wam winchingejidining, ni udi mukajend. Anch nasal masandj niyeyey, nikusal chitil ku mes kwa Nzamb!’

Dichuku dimwing mband wa Potifar wamukwata Josef chakwel asala nend masandj ku usu. Wamupwitamijana mu maswin, pakwez Josef wachina mau. Pezay Potifar, mband wa Potifar walonda anch Josef wamukwatang ku usu chakwel asala nend masandj. Kalondap win yakin. Potifar wajimana nakash, ni wamuteka Josef mu rukan. Pakwez Yehova kamuvuramenap Josef.