Mu musumb wa Asiri wa Ninive mwading antu ayimp nakash. Yehova wamuleja muprofet wend Yona kuya ku Ninive mulong wa kuyibabesh antu chakwel aswimpa mashakamin mau. Pakwez, Yona kitiyap kuya. Waya ni waat ujim utazukinau anch bato wading uyila ku Tarisis ni ku ditung.

Pading payilau pa karung, rinkind mukash watuta ni in kwendish waat ova wom nakash. Asambisha kulembil kudi anzamb au anch: ‘Mulong wak yom yiney yatushiken kal?’ Kupwa, Yona wayileja anch: ‘Yama nikweta mulong. Nichinin kusal yom yanlejay Yehova kusal. Ndjibwilany kwam mu karung chakwel rinkind aduta.’ In kwendish waat kakatap kumudjibul Yona mu karung, pakwez amwinend wadandamena kuyilej anch amudjibula. Pamudjibulau mu karung, pakad kulab rinkind waduta.

Yona watonga anch ukufa. Padingay ni kushikumuk kwinshin kwa karung, wamulembila Yehova. Kupwa Yehova watuma insh mujim nakash. Wamuminya Yona pakwez, kamujipap. Padingay mwivum mwa insh winou Yona walembila anch: ‘Nashilamu kal anch nikudandamen kukuziyil yisu yawonsu.’ Yehova wamulama Yona mwivum mwa insh mu machuku masatu kupwa insh winou wamurika Yona ku chikum cha karung.

 Pamupandishau Yona kudi Yehova, ov, Yona wafanyina kand kulik kuya ku Ninive? Bwat. Yehova wamuleja kand Yona kuya ku Ninive. Pa chisu chinicha Yona waziyina. Waya ni wayileja antu ayimp anch: ‘Mu machuku 40, Ninive ukusheshik.’ Pakwez, kwading chom chimwing chisangareshina—In Ninive atesha ni akarumuka. Mwant wa mu Ninive wayileja antu anch: ‘Mwitany Nzamb ni likany yitil yen. Pamwing ap kakutusheshap.’ Pamanay Yehova anch antu a mu Ninive akarumuk kal, kayisheshap.

Yona wajimana nakash mulong musumb winou kausheshap. Tong bil: Yehova washimpisha muchim ni wamwovila Yona riy pakwez, Yona kayovilap antu a ku Ninive riy. Kupwa waya pol pa musumb ni washakama mwinshin mwa chifukis mulong wa kwot urel. Palipa chifukis chinech Yona wajimana nakash. Chawiy Yehova wamuleja anch: ‘Ey ukatin nakash chifukis chinech kusutamu in Ninive. Nayovidin riy ni nikatin apanda.’ Chom ik chading cha usey? Antu a mu Ninive ading akwet usey kusutamu chifukis chin chawonsu.