BUKU wa Kujingunik ukwet mazu mamwing makad kutwish kutesh mu mutapu wakashinsh. (Kujingunik 1:1) Chilikej, wisambidin mband ukweta dijin “Babilon mujim” difundilau pa mpal pend. Mband winou amulejen anch ushich pa “yisak, ni michid.” (Kujingunik 17:1, 5, 15) Mulong kwikil mband ap umwing wa ukauntu ukutwisha kusal chom chinech, komb Babilon mujim ufanyidin kwikal chijingidij. Chawiy, mband winou wa kusochik udi chijingidij cha chom ik?

Ku Kujingunik 17:18, isambidin mband ndiy umwing winou wa chifanikesh mud “musumb ujim, waswana kal piur pa ant a pansh.” Dizu “musumb” dilejen chisak cha antu  chitenchikinau. Mulong “musumb ujim” winou ukwet usu piur pa “ant a pansh,” mband upidilau anch Babilon mujim ufanyidin kwikal dirijek dia usu dia pa mangand mawonsu. Chitwishikin kumutazuk kamu anch want wa pa mangand mawonsu. Want wa mutapu ik? Want wa chirelijon. Shinshikin mutapu maverse makwau madia mu buku wa Kujingunik matushikijin ku dipwishil dined.

Want ukutwish kwikal wa chipolitik, wa winsak, wa chirelijon. Mband upidilau anch Babilon mujim udiap want wa chipolitik mulong Dizu dia Nzamb dilondil anch “ant a pansh,” ap anch yid ya chipolitik ya mangand minam, yikat “kusotan” nend. Kusochik kwend kudi manswik makatay kusuk nau anyikel a pansh ni chawiy chirumburila mulong wak umutazukiningau anch “mband wa kusotan mujim.”—Kujingunik 17:1, 2; Jakobu 4:4.

Babilon mujim ukutwishap kwikal want wa winsak mulong “in kwisak a pa mangand,” adia yid ya winsak, akez kwinan mulong wend pa chisu cha disheshik diend. Chakin, ant nau in kwisak ayisambidin kwikal amutadidin Babilon mujim “kulemp.” (Kujingunik 18:3, 9, 10, 15-17) Chawiy lel, chidi cha manangu kulond anch Babilon mujim kadiap, want wa chipolitik ap wa winsak, pakwez udi want wa chirelijon.

Dijingunish dia chirelijon dia Babilon mujim adikasikeshidin kand kusutil ku mazu malondila anch ndiy upumbwil michid yawonsu nich “yisal ya spiritu end ayimp”. (Kujingunik 18:23, NW) Mulong milad yawonsu ya ritiyin ra aspiritu ayimp yidi ya chirelijon ni yipepidilau kud ayilembil, chidiap cha kushimok anch Bibil umutazukin Babilon mujim anch “ndond ya ayilembil.” (Kujingunik 18:2; Kuvurik Yijil 18:10-12) Want winou awisambidin kand anch ukat kupompat relijon wakin, kuyizengol “aprofet” ni “antu atumbila.” (Kujingunik 18:24, NW) Chakin, Babilon mujim ukisining nakash relijon wakin mu chilik cha kuyizengol ni kuyijip “atuman a Yesu.” (Kujingunik 17:6) Chawiy, mband winou upidilau anch Babilon mujim chakin kamu udi want wa pa mangand mawonsu wa relijon wa makasu, pamwing ni marelijon mawonsu mamupompatina Yehova Nzamb.