CHAKWEL kutukwash kumujingunin Mesia, Yehova Nzamb wayipepila aprofet avud alejenau mu Bibil chakwel aleta jinsangu piur pa kuvadik, pa mujikit, ni piur pa rufu ra Mupandish winou washilaumu. Uprofet winou wawonsu wa Bibil wawanyina padiay  Yesu Kristu. Uprofet winou wisambidin tuyom tukemp-tukemp ni ukwet uyakin ushimokishina. Chakwel kovikesh chinech, el tushinshikin uprofet kanang wisambina yinship yambatena nich kuvadik ni wanikanch wa Mesia.

Muprofet Isay wasambela kulond anch Mesia ukez kwikal wa mu dijuku dia Mwant David. (Isay 9:7) Chakin kamu Yesu wavadikina mu dijuku dia David.—Mateu 1:1, 6-17.

 Mike, muprofet mukwau wa Nzamb, wabwaka anch mwan winou ukez kamu kwikal nyikel ni anch ukez kuvadikin ku “Betlehem Eferata.” (Mike 5:2, NW) Pa muten wavadikay Yesu, kwadinga mal maad mu Isarel madinga mapidilau anch Betlehem. Umwing wadinga piswimp ni Nazaret mu teritwar wa kwindum kwa ngand, ni mukwau, piswimp ni Yerusalem mu Yudea. Betlehem wadinga piswimp ni Yerusalem amutazukang pa kusambish anch Eferata. Yesu wavadikina mu ul winou, mud kamu mwasambela kulond uprofet!—Mateu 2:1.

Uprofet ukwau wa Bibil wasambela kulond anch Mwan a Nzamb akez kumutazuk “kudiokal mu Idjibit.” Padingay Yesu uchidi mwanikanch, amutwala mu Idjibit. Amuchirisha kupwa kwa Herod kufa, chawiy lel chawanyina uprofet.—Ozey 11:1; Mateu 2:15.

Mu tablo udia pa paj wa 200, dipang dia maverse madia mwishin mwa kamutu ka mulong: “Uprofet” makwet jinsangu jikemp-jikemp piur pa Mesia. Ilikej amboku maverse minam nich madia mwishin mwa kamutu ka mulong: “Kuwanyin.” Kusal mwamu kukez kukasikesh kand ritiy rey mu uyakin wa Dizu dia Nzamb.

Piushinshikidina maverse minam, lam mu manangu anch maverse ma uprofet amafunda yitot ya mivu kurutu Yesu kandikal avadik. Yesu walonda anch: “Yom yawonsu yafundau mulong wamam mu yijil ya Moses ni mikand ya aruu a Nzamb, ni mu Kuseng chifanyidin kuwanyin.” (Luka 24:44, MM) Mud muukutwisha kushinshikin mu Bibil wey amwiney, chakin kamu uprofet wawanyina—pa kachom ni kachom!