1, 2. Mulong wak Bibil udi chipan chisangareshina chidiokila kudi Nzamb?

WIYOVILING nchik anch murund ney wakukashimwish nich chipan? Ukulabap ni kuchisuburil, ni ukusangar anch murund ney ukat kukuvurik. Ukumujikitish mulong wa chipan chend.

² Bibil chidi chipan chidiokila kudi Nzamb. Utulejin jinsangu jitwakad kutwish kutan ndond yikwau. Chilakej, utulejin anch Nzamb watanga maur, divu, ikundj ni mband wakusambish. Utwinkishin yiyul yikutwisha kutukwash pitukweta milong. Mu Bibil, twilejin mutapu ukezay Nzamb kuwanyish chitongijok chend cha kusal divu dikala ndond yipandakena kuwap. Bibil chidi chipan chimwing chisangareshina mud ik!

3. Yom ik ukujingunina piwilejina Bibil?

³ Piwilejina Bibil, ukujingunin anch Nzamb ukatin anch ey wikala murund nend. Anch wilej nakash piur pend, ukwikal nend mu urund wa piswimp.

4. Chom ik chikushimokishina piur pa Bibil?

⁴ Bibil amukarumwin mu mazu piswimp 2600, ni amubudishin kal uvud wa ma miliyar. Antu 90 ni kusut pa chitot pa mangand akutwish kumutang Bibil mu dizu diau. Rubing ni rubing, antu miliyon umwing ni kusut atambwiling Bibil! Mwaning, kwikil buku mukwau udia mudi Bibil.

5. Mulong wak tukutwish kulond anch Bibil amufunda ku usu wa ‘spiritu wa Nzamb’?

⁵ Bibil amufunda ku usu wa ‘spiritu wa Nzamb.’  (Tang 2 Timote 3:16, NWT.) Pakwez antu amwing akutwish kutong anch: ‘Mulong Bibil amufunda kudi antu, chad mutapu ik ukutwishay kand kudiokal kudi Nzamb?’ Bibil wakwil anch: “Aruu a Nzamb alondanga mazu madiokalanga kudi Nzamb payitakelangau kudi [spiritu] utumbila.” (2 Pita 1:21) Chinech chidi chilik chimwing ni mukurump wa mudimu umulejina sekreter chakwel amukwasha kufund mukand. Mukand winou udi wa nany? Udi wa mukurump wa mudimu, pakwez udiap wa sekreter. Chilik chimwing, Bibil udiokil kudi Nzamb, kadiap wa antu asadinay chakwel amufunda. Nzamb ndiy wayitakela mulong afunda yitongijok yend. Chakin kamu Bibil didi “dizu dia Nzamb.”—1 Tesalonik 2:13; tal Mazu ma kwinsudiel 2.

6, 7. Mulong wak tukutwisha kulond anch yikunku ya Bibil yovijadin?

⁶ Bibil amufunda mu chirung cha mivu 1600 ni kusut. In kumufund ashakama mu yirungu kushalijan. Amwing ading antu ilejina nakash ni akwau bwat. Chilakej, umwing wa pakach pau wading dokter. Akwau ading in kudim, in kuta ansh, atufung, aprofet, anzuj ni ant. Ap anch in kufund ading ashalijadin, yikunku yawonsu ya Bibil yovijadin. Kwikil shapitre ap umwing utadikijadina ni mukwau. *

⁷ Ma shapitre ma kusambish ma Bibil malejen mutapu wasambisha mar pa mangand, ni ma shapitre ma nsudiel malejen mutapu ukezay Nzamb kupwish milong yiney pa kusal anch divu dikala paradis. Bibil wisambidin piur pa tunan twa mivu twa rusangu ra antu ni umekeshin anch chitongijok cha Nzamb chikat kuwanyin yisu yawosu.

8. Let chilakej chimekeshina anch Bibil udi wakin mu milong ya siyans.

⁸ Bibil kamufundap mulong wa kufundish nich siyans ap kwikal buku wa shikol, pakwez yom yisambidinay piur pa siyans yisu yawonsu yiding yakin. Chawiy chom tuchingejidina anch buku winou udiokil kudi Nzamb. Chilakej, mukand wa In Levi ukwet malejan ma Nzamb piur pa mutapu wafanyinau in Isarel kukangesh kupalangan kwa misong. Yom yiney ayifunda kurutu nakash mulong antu ijika mutapu ukatau atupwapu kuletish misong. Chikwau kand Bibil ufundishin chakin anch divu didi pa rinzwizu. (Job 26:7) Padingau antu  avud ni kwitiyij anch divu didi dialalela, Bibil walonda anch didi dia chinkatang.— Isay 40:22.

9. Win kashinsh wa in kufund Bibil utukwashin kwijik ik?

⁹ Bibil ulondin yisu yawonsu uyakin pisambidinay piur pa rusangu ra pakur. Pakwez ma buku mavud ma jinsangu ja pakur makatap kwisambin uyakin, mulong in kumafund kadingap in kashinsh. Chilakej, kakufundangap chisu ni chisu piur pa kukangany kuwin njit kwa ngand yau. Pakwez, in kufund Bibil afunda uyakin ap pa chisu chakanganyau in Isarel kuwin njit. Afunda kand piur pa kurumbuk kwau. Chilakej, mu mukand wa Kuchind Michid, Moses utulejin anch warumbuka nakash ni Nzamb wamupupa mulong wa kurumbuk kwend. (Kuchind Michid 20:2-12) Win kashinsh wa in kufund Bibil umekeshin anch Bibil udiokil kudi Nzamb. Chinech chikutukwash tuchingejina Bibil.

10. Mulong wak yiyul ya mu Bibil yitukwashin nlel unou?

¹⁰ Bibil amufunda ku usu wa ‘spiritu wa Nzamb ni udi wa ukwash mulong wa kulejan, mulong wa kupup, mulong wa kutenchik yom.’ (2 Timote 3:16) Mwaning, yiyul ya mu Bibil yitukwashin nlel unou. Yehova wij mutapu watutangay, chawiy lel wij kand mutapu tukata kutong ni kwiyov. Utwij nawamp nakash kusutamu ayinetu, ni ukatin anch twikala ni musangar. Wij yom yidia yiwamp ni yiyimp piur petwetu.

11, 12. (a) Chiyul ik chiwamp chapanay Yesu mu Mateu shapitre wa 5 djat ni wa 7? (b) Yom ik yikwau tukutwisha kwilej mu Bibil?

¹¹ Mu Mateu shapitre wa 5 djat ni wa 7, tutangin chiyul chiwamp nakash chapanay Yesu piur pa mutapu wa kwikal ni musangar, mutapu wa kushakam nau antu akwau, mutapu wa kulembil ni mutapu wa kusadil nfalang. Ap anch wapana chiyul chinech pasutin kal  mivu 2000, chikwet usu ni chidi cha ukwash djat ni nlel unou.

¹² Yehova utufundishin kand mu Bibil yom yitukwashina kwikal nich mwom uwamp wa dijuku, kwikal in mudimu awamp, ni kushakam mu chisambu ni antu akwau. Yiyul yidia mu Bibil yikutwish yisu yawonsu kutukwash, twikalap nchik anany, yikalap nchik ndond tushicha, ap milong tukweta.—Tang Isay 48:17; tal Mazu ma kwinsudiel 3.

13. Yom ik yalonday Isay yafanyina kushiken musumb wa Babilon?

¹³ Uprofet uvud udia mu Bibil wawanyina. Chilakej, Isay wasambela kulond anch Babilon akez kumushesh. (Isay 13:19) Warumburila nawamp mutapu ukezau kushesh musumb. Musumb wading mu diking kusutil ku yis yijim nakash ni wit. Pakwez Isay wasambela kulond anch wit winou akez kumuumish, ni yis akuyisha ya wash. Akankuny akukwat musumb pakad kurish njit. Isay watakela kand kulejan anch Sirus ndiy muntu ukeza kushesh Babilon.—Tang Isay 44:27–45:2; tal Mazu ma kwinsudiel 4.

14, 15. Mutapu ik wawanyina uprofet wa Isay?

¹⁴ Kupwa kwa mivu yitot yaad pafundau uprofet winou, amasalay ashika, irijekang kal mulong wa kukwat musumb wa Babilon. Nany wayitakela amasalay? Mudi kamu mwatakelau kulond, wadinga Sirus, mwant wa Peris. Yom yawonsu ayitenchika chakwel uprofet wawonsu uwanyina.

¹⁵ Uchuku wafanyinau kurish njit, in Babilon ading asadin musambu. Atonga anch ading mu diking dia mbumbu jilemp ni wit. Pol pa musumb, Sirus ni  amasalay end apunda mupwambu mulong wa kupumbwilamu mem ni kuumish wit. Mem mauma chakwel amasalay a in Peris auka wit ra pansh. Pakwez mutapu ik welau amasalay kumatik mbumbu ja Babilon? Mudi kamu mwalonda uprofet, yis ya musumb ayisha ya wash, chawiy lel amasalay akwata musumb pakad njit.

16. (a) Yom ik yasambelay Isay kulond piur pa yom yikushikena mu machuku ma kurutu mu musumb wa Babilon? (b) Mutapu ik twija anch uprofet wa Isay wawanyina?

 ¹⁶ Isay wasambela kulond anch kwikil muntu ukeza kushakam kand mu Babilon. Wafunda anch: “Kwikil muntu ukeza katungamu kand chikupu [ap kushakamamu].” (Isay 13:20) Uprofet winou wawanyina? Ndond yadinga musumb wa Babilon, padi akilometre piswimp 80 kurul kwa Bagdad, mu Irak, mwashala kal mankur. Kushik lel, kwikil muntu ushichamu. Yehova wamukomba Babilon “nich rukomb ra kujiyish [ap, kushesh] nich.”—Isay 14:22, 23, NWT. *

17. Mulong wak tukutwish kuchingejin kushilamu kwawonsu kwa Nzamb?

¹⁷ Mulong uprofet uvud wa Bibil wawanyina kal, chinech chirumburikin anch tukutwish kuchingejin mu  yom yilondinay Bibil piur pa machuku ma kurutu. Tukutwish kwikal nich kashinsh anch Yehova ukuwanyish kushilamu kwend kwa kusal divu dikala paradis. (Tang Kuchind Michid 23:19.) Mwaning, tukwet ruchingej ra “mwom wa chikupu watukanau kudiosh pasak kudi Nzamb wakad kudimban.”—Titus 1:2, NWT. *

18. Mutapu ik warumburilay Paul piur pa “dizu dia Nzamb”?

¹⁸ Twilejin anch kwikil buku mukwau udia mudi Bibil. Wovijadin, ni ulondin chisu chawonsu uyakin pisambidinay piur pa siyans ap pa jinsangu ja pakur. Utwinkin kand yiyul yiwamp ni ukwet uprofet uvud wawanyina kal. Pakwez Bibil ulejen yom yivud kupandakanamu yiney. Kambuy Paul wafunda anch: “Dizu dia Nzamb didi diom, ni dikwet usu.” Chinech chirumburikin ik?—Tang Hebereu 4:12, NWT.

19, 20. (a) Mutapu ik ukutwishay Bibil kukukwash kwijik chiudia? (b) Mutapu ik ukutwisha kumekesh kujikitish kwey mulong wa Bibil?

¹⁹ Bibil ukutwish kuswimp mwom wey. Ukutwish kukukwash kwijik chiudia. Ukutwish kukukwash kutesh yitongijok ni yovil yey. Chilakej, tukutwish kutong anch tumukatin Nzamb. Pakwez, chakwel tumekesha anch tumukatin, tufanyidin kusadin yilondinay Bibil.

²⁰ Bibil udi buku udiokila chakin kamu kudi Nzamb. Ukatin anch ey umutanga, wileja ni ukata Bibil. Jikitish mulong wa chipan chinech, ni dandamen kumwilej. Chawiy lel, ukwijik chitongijok cha Nzamb mulong wa antu. Mu shapitre ulondwilaku ou, tukwilej yom yivud piur pa chitongijok chinech.