1, 2. Chipul ik ufanyidina kwiyipul, ni mulong wak chidi cha usey?

KUSUTIL dilejan diey dia Bibil, wileja anch antu avud alondina anch akat kumwifukwil Nzamb, akat kufundish ni kusal yom yikisinay Nzamb. (2 Korint 6:17) Chawiy Yehova utwitin tubudika mu relijon wa makasu, “Babilon Mujim.” (Kujingunik 18:2, 4) Chom ik ukusala? Muntu ni muntu pakach petu ufanyidin kukwat mupak, ni tufanyidin kwiyipul anch, ‘Ov, nikatin kumwifukwil Nzamb mu mutapu ukatinay anch nimwifukwila, anch nikatin kumwifukwil mu mutapu nikata amwinam?’

² Anch wadiokil kal mu relijon wa makasu, chidi chiwamp nakash. Pakwez kukutwish kwikal yisal kanang ni yishankur ya relijon wa makasu uchidia kusanger. Twisambinany piur pa yisal yimwing ni yishankur yiney ni tushinshikinany mulong wak chidi cha usey tuyimana mutapu uyimenay Yehova.

3. (a) Mulong wak antu amwing amen anch chikasiken kulik kusadil atupwany mu difukwil diau? (b) Chom ik chilondinay Bibil piur pa kusadil atupwany mulong wa kumwifukwil Nzamb?

³ Antu amwing asadina mu mivu yivud atupwany ap kuyitek ndond kanang mu yikumbu yau mulong wa kumwifukwil Nzamb. Anch niyey mwawiy usadina, ukuman anch chikukasikedin ap chidi chiyimp kumwifukwil Nzamb pakad atupwany. Pakwez vurik anch, Yehova utufundishin mutapu wa kumwifukwil. Ni Bibil utulejin patok anch Yehova kakatinap tusadina atupwany mu difukwil dietu.—Tang Kubudik 20:4, 5; Kuseng 115:4-8; Isay 42:8; 1 Yohan 5:21.

4. (a) Mulong wak tufanyidinap kuyifukwil angak? (b) Mulong wak Yehova uyilejin antu end anch kangal apakish kwambamb nau afu?

 ⁴ Antu amwing akutwish kusutish chisu chilemp ni usu mulong wa kukimb kuyisangaresh angakau afa kal. Akutwish ap kuyifukwil. Pakwez twilejin anch antu afila kal kakutwishap kutukwash ap kutusal nayimp. Kwikil ndond kanang yishichau. Chakin, chidi cha ubaj kukimb kwambamb nau, mulong rusangu rin rawonsu rimekena anch ridiokil kudi afu rikat kudiokalang kudi ayilembil. Chawiy lel Yehova wayileja in Isarel anch kangal apakish kwambamb ni afu, ap kwiyandjik mu yom yin yawonsu ya ayilembil.— Kuvurik Yijil 18:10-12; tal Mazu ma kwinsudiel 26 ni 31.

5. Chom ik chikutwisha kukukwash kulik kusadil atupwany mulong wa kumwifukwil Nzamb ni kulik kuyifukwil angakey afa kal?

⁵ Chom ik chikutwisha kukukwash kulik kusadin atupwany mulong wa kumwifukwil Nzamb ap kulik kuyifukwil angakey? Ufanyidin kutang Bibil ni kutongin nakash piur pa mutapu umenay Yehova yom yiney. Uyimen anch yidi yom ‘yitakanena,’ ap yiyimp nakash. (Kuvurik Yijil 27:15) Mulembila Yehova dichuku diawonsu chakwel akukwasha kuman yom mutapu uyimenay ni chakwel umwifukwila mu mutapu ukatinay. (Isay 55:9) Ukutwish kwikal nich kashinsh anch Yehova ukukwinkish usu ukweta nich kuswir chakwel udiosha mu mwom wey yom yawonsu yikwatijadina ni difukwil dia makasu.

6. Mulong wak atonda dichuku dia 25 ngond wa Dikum ni yaad kwikal dichuku dia musambu wa kuvadik kwa Yesu?

⁶ Pa mangand mawonsu, Nowel udi pakach pa misambu yijikena nakash, ni antu avud atongining anch udi musambu wa kuvadik kwa Yesu. Pakwez Nowel ukwatijadin chakin kamu ni difukwil dia makasu. Encyclopedi  umwing urumburil anch apagan a mu Rom asalang musambu winou wa kubudik kwa muten dichuku dia 25 ngond wa Dikum ni yaad. Antakel a yikumbu ya Nzamb akimba anch apagan avud ikala in Kristu, chawiy, ap anch Yesu kavadikap dichuku dia 25 ngond wa Dikum ni yaad, atonda kusal musambu wa kuvadik kwa Yesu pa dichuku dia ngond dined. (Luka 2:8-12) In kwilej a Yesu kasalap musambu wa Nowel. Buku Sacred Origins of Profound Things ulondil anch kusut kwa mivu 200 kupwa kwa kuvadik kwa Yesu, “kwikil muntu ap umwing wading wija, ni kwading antu akemp kusu ading ni kukimb kwijik chakin chisu chavadikay.” Musambu wa Nowel wasambisha kwinyim kwa yitot ya mivu kupwa kwa Yesu kudiokal pa divu.

7. Mulong wak in Kristu akin kakusalangap musambu wa Nowel?

⁷ Antu avud ij anch Nowel ni yishankur ya kupanijan yipan yasambisha ni apagan. Chilakej, mu Angleterre ni mu jindond jimwing ya Amerik, ajidika musambu wa Nowel chisu chimwing mulong wasambisha ni apagan. Muntu mwawonsu wadinga ni kusal musambu winou adinga kumupup. Pakwez antu asambishirila kand kusal musambu wa Nowel. Mulong wak in Kristu akin kakusalangap musambu wa Nowel? Mulong akimbin kumusangaresh Nzamb mu yom yawonsu yisadinau.

8, 9. Mulong wak in Kristu akusambish kasalangap musambu wa machuku ma kuvadik?

⁸ Musambu ukwau wijikena nakash kudi antu avud udi musambu wa machuku mau mavadikau. In Kristu afanyidin kusal musambu wa machuku mau mavadikau? Misambu ya machuku ma kuvadik yijimbwilau kusu mu Bibil ayisala kudi antu akad kumwifukwil Yehova. (Disambishil 40:20; Marko 6:21) Misamb ya machuku ma kuvadik ayisadina mulong wa kuyitumbish anzamb a makasu.  Chawiy lel The World Book Encyclopedia ulondin anch, in Kristu akusambish “ading amen musambu wa kuvadik kwa muntu mwin mwawonsu mudi chaku cha apagan.”

⁹ In Rom ni in Grek a pasak itiyijang anch spiritu wadingaku pa dichuku dia kuvadik dia muntu ni muntu ni anch spiritu winou umukingining muntu mu mwom wend. Buku Coutumes et usages des anniversaires (angl.) urumburil anch: “spiritu winou wading mu urund ni nzamb wavadika pa dichuku diavadikay muntu winou.”

10. Mulong wak in Kristu a nlel kafanyidinap kusal misambu ya machuku ma kuvadik?

¹⁰ Utongin anch Yehova witiyining misambu yikwatijadina ni relijon wa makasu? (Isay 65:11, 12) Bwat, kakutwishap. Chawiy tukusalangap misambu ya machuku ma kuvadik ap ya machuku matumbila yikwatijadina ni relijon wa makasu.

11. Mulong wak antu amwing akat kusal misambu ya machuku matumbila? Chom ik chifanyidina kwikal cha usey kudi ey?

¹¹ Antu amwing ij anch Nowel ni machuku makwau matumbila masambisha ni apagan, pakwez adandamedin ni katat kusal misambu yiney. Atongining anch machuku matumbila yidi kwau yisu yiwamp ya kusutish chisu pamwing ni majuku mau. Wawiy mutapu utongina? Chiyipinap kusutish chisu ni dijuku diey. Yehova watanga dijuku, ni ukatin anch twikala mu urund uwamp ni dijuku dietu. (Efes 3:14, 15) Pakwez, tufanyidin kutek manangu piur pa urund wetu ni Yehova pa ndond pa kuyisangaresh anamakwetu kusutil ku kusal misambu ya machuku matumbila ya marelijon ma makasu. Chawiy kambuy Paul walonda anch: “Ikasikeshany kushinshik yom yikata kumusangarish Nsalejetu.”—Efes 5:10.

12. Yom ik yimekeshina anch Yehova kitiyiningap machuku matumbila?

¹² Antu avud atongining anch disambishin dia machuku  matumbila dikwetap kwau mulong, pakwez kimwauyap mutonginay Yehova. Kitiyiningap misambu ya machuku matumbila yidiokila ku difukwil dia makasu ni yikata kuyitumbish antu ap yijingidij ya ngand. Chilakej, in Idjibit asalang misambu ya anzamb au a makasu. Kupwa kwa in Isarel kubudik mu Idjibit, imburija musambu umwing wa apagan ni awutazuka anch “musambu wa kumulimish nich [Yehova].” Pakwez Yehova wayipupa mulong wa chom chinech chasalau. (Kubudik 32:2-10) Muprofet Isay walonda anch, tufanyidinap “kupukun ku chom chitakanena!”—Tang Isay 52:11.

13. Yipul ik ukwikala nich anch wakwat mupak wa kulik kusal musambu wa machuku matumbila?

¹³ Anch wakwat mupak wa kulik kusal misambu ya machuku matumbila, ukutwish kwikal ni yipul yivud. Chilakej: Nikusal nchik anch arund nam angipul anch mulong wak nisadinap nau musambu wa Nowel? Nikusal nchik anch muntu wanginkish chipan cha Nowel? Nikusal nchik anch musambu wam wa uruw wataliken pa musambu wa machuku matumbila? Mutapu ik nikutwisha kuyikwash anam alika kov ushon mulong kasadinap musambu wa machuku matumbila ni machuku mau makuvadik?

14, 15. Chom ik ufanyidina kusal ang muntu wakwel anch musambu uwamp ap wakwinkish chipan?

¹⁴ Chidi cha usey kusadin manangu piukwatina mupak wa yom ya kulond ni yom ukusala anch yom yiney yakushiken. Chilakej, anch muntu wakulej anch musambu uwamp wa Nowel, ufanyidinap kumuninet. Ukutwish kumwakul anch, “Wajikit.” Pakwez anch muntu wakimb kwijik yom yivud, ufanyidin kukimb mutapu wa kumurumburil mulong wak ukusalangap musambu wa dichuku ditumbila. Chawiy, ikal chisu chawonsu mwin rukat, mwin nkeu, ni mwin kwitudish. Bibil ulondin anch: “Lik  kulond kwen kwikala ni ranaken machuku mawonsu, kutadila mudi mungu, chakwel wijikany mwa kwakwil nawamp kudi muntu ni mukwau.” (Kolosay 4:6) Pamwing ap ukutwish kurumburil anch ukatining kusutish chisu ni antu akwau ni ukat kupanijanany yipan pakwez ukatiningap kusal mwamu mu machuku mudi minam.

¹⁵ Chom ik chiufanyidina kusal anch muntu wakwinkish chipan? Bibil katulejinap yawonsu tufanyidina kusal, pakwez tufanyidin kudandamen kulam kom kawamp. (1 Timote 1:18, 19) Pamwing ap muntu ukimbina kukwinkish chipan kijap anch ukusalangap kwey musambu winou. Ap ukutwish walond anch, “nij anch ukusalangap musambu wa dichuku ditumbila, pakwez nakimbang kwam kukwinkish chipan chinech.” Mu yisu yimwing, ukutwish kukwat mupak wa kutambul chipan ap bwat. Pakwez wikalap nchik mupak ukukwata, ikal ni kashinsh anch ulamin kom key nawamp. Tufanyidinap kusal chom ap chimwing chikutwisha kuyipish urund wetu ni Yehova.

¹⁶ Chom ik ufanyidina kusal anch dijuku diey diakimb kusal musambu wa dichuku ditumbila? Kangal kutadikijan nau. Vurik anch akwet mbil ya kukwat mupak wa yom yikatinau kusal. Ikal ni rukat ni limish mipak yau mudi mulimishinau mipak yey. (Tang Mateu 7:12.) Pakwez anch dijuku diey diakimb anch usala nau musambu wa machuku matumbila, ukusal nchik? Kurutu kwa kukwat mupak wa chom chiukusala, mulembila Yehova mulong akukwasha ukwata mupak uwamp. Tongin pa mulong winou, ni kimb ya kulond ap ya kusal. Vurik anch, ufanyidin kumusangaresh Yehova chisu chawonsu.

17. Chom ik ukutwisha kusal mulong wa kuyikwash aney alika kwiyov anch aburedin chom kanang pamenau antu akwau akat kusal musambu wa machuku matumbila?

 ¹⁷ Chom ik ukutwisha kusal mulong wa kuyikwash aney anch aman antu akwau akat kusal musambu wa machuku matumbila? Yisu yivud, ukutwish kutenchik yisu ya pakampwil mulong wa kusangar nau. Ukutwish kand wayikashimwish ni yipan. Ni chimwing cha yipan yiwamp ukutwisha kuyinkish aney chidi chisu ni rukat rey.

18. Mulong wak tufanyidin kukumangan ku yikumangan ya in Kristu?

¹⁸ Chakwel tumusangaresha Yehova, tufanyidin kudiokal mu relijon wa makasu pamwing ni kulik yaku ni machuku matumbila makwatijadina ni relijon wa makasu. Pakwez tufanyidin kand kusadin relijon wakin. Mutapu ik? Mutapu umwing wa kusal mwamu udi kusutil ku kukumangan pakad kujing ku yikumangan ya in Kristu. (Tang Hebereu 10:24, 25.) Yikumangan yidi ya usey nakash mu difukwil diakin. (Kuseng 22:22; 122:1) Tukat kukasikeshijan umwing ni mukwau pitukata kukumangan.—Rom 1:12.

19. Mulong wak chidi cha usey kuyilej antu akwau piur pa uyakin wa Bibil wileja?

¹⁹ Chom chikwau chisadina tutonda difukwil diakin kudi kuyilej antu akwau piur pa yom wilejina mu Bibil. Antu avud akamin piur pa yom yiyimp yisadikina pa divu. Pamwing ap wij muntu kanang wiyovila mutapu winou. Muleja piur pa ruchingej rey riwapina nakash ra machuku ma kurutu. Anch wakumangan ku yikumangan ya in Kristu ni kuyilej antu akwau piur pa uyakin wa Bibil, ukujingunin anch ukwikalap kand ni kuswir kwa kwikal mu relijon wa makasu ni yaku yend. Ukutwish kwikal nich kashinsh anch ukwikal ni musangar ni Yehova ukuyukish nakash usu wey usadina mulong wa kutond kumwifukwil mu mutapu uwamp.—Malakiy 3:10.