Kuding antu a michim yiwamp mu marelijon mawonsu. Rusangu ruwamp ridi anch Nzamb uyimen antu inay ni ukat kuyibangidin. Cha ushon, yom yivud ya chisum yisadikining mu dijin dia relijon. (2 Korint 4:3, 4; 11:13-15) Kwambatan nich marapor ma katat, marelijon mamwing miyandjika mu chisum, mu kujipan, mwinjit, ni kuyipish an akemp ku usu. Ushon mud ik kudi in kumwifukwil Nzamb ashinshamena!​—Tang Mateu 24:3-5, 11, 12.

Pakwez, relijon wakin umutumbishining Nzamb, relijon wa makasu kamulimishiningap. Ufundishining yitongijok yakad kwikal mu Bibil, ufundishining kand malejan ma makasu piur pa Nzamb ni piur pa rufu. Pakwez Yehova usotin antu ijika uyakin piur pend.​—Tang Ezekiel 18:4; 1 Timote 2:3-5.

Cha musangar, Nzamb kamudimbiningap kusutil ku marelijon malondininga anch mamukatining pakwez mawiy makatin chakin kamu mangand ma Satan. (Jakobu 4:4) Dizu dia Nzamb disambidin marelijon mawonsu ma makasu mudi “Babilon Mujim.” Babilon mujim wadinga musumb ukur kwasambishina relijon wa makasu kupwa kwa Mabeb ma pa chirung cha Nowa. Piswimp ap, Nzamb ukez kulet disheshik dia kukashimuk piur pa relijon udimbena ni uyimeshina antu mar.​—Tang Kujingunik 17:1, 2, 5, 16, 17; 18:8.

Kuding jinsangu jivud. Yehova kayivuramedinap antu ashinshamena apalangena mukach mwa marelijon ma makasu madia pa mangand mawonsu. Ndiy uyitekin antu mudi inay mu uumwing kusutil ku kuyifundish uyakin.​—Tang Mike 4:2, 5.

Yehova ukat kuyibangin antu akatininga yom yakin ni yiwamp. Uyibabeshin chakwel adiokala mu relijon wa makasu  mudiau. Antu amukatininga Nzamb asotining kukarumuk mulong wa kumusangaresh.​—Tang Kujingunik 18:4.

Mu mivu chitot ya kusambish, chisu chateshau antu a kashinsh rusangu ruwamp radiokala kudiau atwimbuy, awiy aritambula nich musangar. Awiy ileja mulad usu wa mwom kudiay Yehova, mulad wa mwom usangareshina, mulad ukweta rutong ni ruchingej. Adi chilakej chiwamp kudi etu nlel unou, mulong atambula rusangu ruwamp kusutil ku kumutek Yehova pa ndond ya kusambish mu mwom yau.​—Tang 1 Tesalonik 1:8, 9; 2:13.

Yehova uyitazukin antu adiokal mu relijon wa makasu mu dijuku diend dia in kumwifukwil. Anch witiyijin diladikij dia Yehova nich chirungil, ukez kuta nend urund uwamp, kwikal ni dijuku disu ni dia rukat ra ambay in kumwifukwil Yehova, pamwing ni kutambul mwom wa chikupu.​—Tang Marko 10:29, 30; 2 Korint 6:17, 18.

Dichuku dia dirumburish dia relijon wa makasu ridi rusangu ruwamp. Dikez kupwish mar ma pa mangand mawonsu. Kwikil kand dichuku ap dimwing dikezay relijon wa makasu kuyidimb antu ni kuyauril. Muntu mwin mwawonsu ukweta mwomukez kwikal mu uumwing mu difukwil ching dia Nzamb wakin.​—Tang Kujingunik 18:20, 21; 21:3, 4.