DILEJAN DIA 05
Bibil Ud Uruu Udiokila Kud Nzamb
Yehova watwinkisha Bibil. Chipan chinech chiwamp nakash chikwet mabuku makemp makemp 66. Pakwez, ukutwish kwiyipul anch: ‘Bibil wadiokala kwisu? Nany udia musul wakin wa Bibil?’ Mulong wa kwakul ku yipul yiney, el twisambina mutapu twashikena kwikal ni Bibil.
1. Anch antu awiy afunda Bibil, chad mutapu ik udiokilay kud Nzamb?
Bibil amufunda kud amakundj piswimp 40, mu mivu piswimp 1600, kusambish mu 1513 K.C.C. kushik piswimp mu 98 C.C. Ni amufunda kud antu kushalijan. Pakwez, yikunku yawonsu ya Bibil yovijadin. Mutapu ik chitwishikina? Mulong Nzamb ndiy udia Musul wakin wa Bibil. (Tang 1 Tesalonik 2:13.) In kumufund kafundap yitongijok yau. Pakwez, “alondanga mazu madiokalanga kudi Nzamb payitakelangau kudi [spiritu] utumbila.” a (2 Pita 1:21) Nzamb wasadina spiritu wend utumbila mulong wa kuyipepil ap kuyibachik amakundj inay kufund yitongijok yend.—2 Timote 3:16.
2. Nany ukutwisha kutaninamu mu yom yilondinay Bibil?
“Antu a mangand mawonsu, ni a michid yawonsu, ni a jindim jawonsu” akutwish kutaninamu mu rusangu ruwamp ridia mu Bibil. (Tang Kujingunik 14:6.) Nzamb watenchika chakwel Bibil amukarumun mu mazu mavud nakash kusutamu mabuku makwau mawonsu. Piswimp antu a pa mangand mawonsu akutwish kutang Bibil.
3. Mutapu ik wachidijay Yehova Bibil?
Bibil amufundina pa yom yikata kuyip swa, mud pa yikit ya annam ni pa mishij. Pakwez amakundj ading akatina Bibil akopirilang uruu wend ku makas mulong wa kuufund ndond yikwau. Ap anch amakundj akweta usu asala usu wa kujiyish Bibil, pakwez kwading akwau ateka mwom yau mu ubaj mulong wa kumuchidij. Yehova kitiyap anch chom kampand ap muntu kanang atukangesha kwambamb nend. Bibil ulondin anch: “Dizu dia [Nzamb] dishich chikupu!”—Isay 40:8.
ILEJA CHIKURIKINA
Ileja yom yivud piur pa mutapu wayitakelau antu kud Nzamb mulong wa kufund Bibil, mutapu wamuchidijay, ni mutapu wasalay chakwel antu amwikal nich.
4. Bibil ulejen nany udia Musul wend wakin
Talany VIDEO. Ni tang 2 Timote 3:16, kupwa isambinany yipul ey:
-
Anch antu awiy afunda Bibil, mulong wak akat kumutazuk anch Dizu dia Nzamb?
-
Ov, utongin anch choviken kwitiyij anch Nzamb wayinkisha antu yitongijok yend mulong wa kuyifund?
Sekreter ukutwish kufund mukand, pakwez uruu ufundinay ud wa muntu umulejina ya kufund. Chilik chimwing, antu afunda Bibil, pakwez uruu udiamu udiokil kud Nzamb
5. Bibil wapanda ap anch amurishikisha
Mulong Bibil udiokil kud Nzamb, amwinend wafanyina kumuchidij. Mu rusangu ra an a antu, amakundj akweta usu asala usu wa kumujiyish Bibil. Antakel a relijon asala usu wa kumujindjik chakwel kangal antu amutang. Pakwez antu avud ateka mwom yau mu ubaj mulong wa kuchidij Bibil, chikalap nchik rupompat ni kukimb kuyijip. Mulong wa kwilej piur pa ikundj umwing pakach pa amakundj inay, talany VIDEO, kupwa isambinany yipul ey:
-
Ov, kwijik anch asala usu nakash mulong wa kumuchidij Bibil kukubachikin kumutang? Mulong wak?
Tang Kuseng 119:97, kupwa isambinany chipul ech:
-
Yom ik yayibachika antu avud kutek mwom yau mu ubaj mulong wa kukarumun ni kupalangesh Bibil?
6. Buku wa antu awonsu
Bibil ndiy buku wakarumwinau kal ni kupalangesh nakash kusutamu mabuku makwau min mawonsu. Tang Midimu 10:34, 35, kupwa isambinany yipul ey:
-
Mulong wak Nzamb ukatin anch Dizu diend adikarumun nakash mwamu ni kudipalangesh pa mangand mawonsu?
-
Yom ik yikusangareshina piur pa Bibil?
Piswimp antu
awonsu
pa mangand
akwet Bibil mu dizu diau dikatau kutesh nawamp
Udiaku mu mazu
3 000
ni kusut
wakabuj ap wa chikunku
Bibil amubudishin kal makopi piswimp
5 000 000 000
Kwikil buku mukwau wabudishinawap kal mwamu
ANCH MUNTU WAKWEL ANCH: “Bibil ud buku mukur nakash wafundau kwend kud an a antu.”
-
Ey utongin nchik?
-
Uman ik umekeshina kamu anch Bibil did Dizu dia Nzamb?
YOM TWILEJA KAL
Bibil did Dizu dia Nzamb, ni wasala usu chakwel antu in awonsu amwikala nich.
Ov, uvurikin?
-
Chirumburikin ik kulond anch antu ayipepila kud Nzamb mulong wa kufund Bibil
-
Yom ik yikushimokishina piur pa mutapu wapanday Bibil, mutapu umukarumwinau, ni mutapu umupalangeshinau?
-
Mutapu ik wiyovila pa kwijik anch Nzamb wasala usu winou wawonsu mulong wa kwambamb niyey?
JINGUNIN KAND
Tang rusangu rilejena mutapu umukarumwinau Bibil nlel kusutil mamaniskri makusambish.
“Mutapu Twashikena Kwikal ni Bibil” (Lankany!, wa Ngond wa 11, 2007)
Ileja mutapu wapanday Bibil ku mitapu yijim yisatu yakimbau kumushesh.
“Rusangu Rilejena Mutapu Wakimbau—Kujiyish Bibil” (Chinong cha Kalam cha Ngond wa 7, 2016)
Tal mutapu watekau antu amwing mwom yau mu ubaj mulong wa kukarumun Bibil.
Bibil amukopiril kal ni kumukarumun tupamp tuvud. Mutapu ik ukutwisha kwikal nich kashinsh anch uruu wend kauswimpap?
“Ov, Uruu wa Bibil Auswimpin Kal ap Kuuyipish?” (Mutu wa mulong udia pa jw.org)
a Mud mutukumana mu Dilejan dia 07, spiritu utumbila ud usu ukatay Nzamb kusadin mulong wa kuwanyish rusot rend.
Jingunin Kand
YIPUL YIPWILINGAU NAKASH
Dilejan dia Bibil Chom ik?
Tan yakul ku yipul piur pa program wetu wa kwilej Bibil pakad kufut nfalang.
