DILEJAN DIA 13
Mutapu Marelijon ma Makasu Mamusaadikishina Nzamb
Anch Nzamb ud rukat, chad mulong wak marelijon mafila mu kan anch makat kufundish ni kusal yom mu dijin diend masadin yom yiyimp mwamu? Mu wiswimp, marelijon minam mad ma makasu; mamusaadikishin Nzamb. Mutapu ik mamusaadikishina Nzamb? Mutapu ik ukatay kwiyov Nzamb piur pa marelijon minam? Ni mutapu ik ukumasalau marelijon minam kud Nzamb?
1. Mutapu ik marelijon ma makasu mamusaadikishina Nzamb kusutin mafundish mau?
Marelijon ma makasu makat “kuswimpish uyakin wa Nzamb ku makasu.” (Rom 1:25) Chilakej, marelijon mavud makatap kuyifundish antu dijin dia Nzamb. Pakwez, Bibil ulejen anch antu afanyidin kusadin dijin dia Nzamb. (Rom 10:13, 14) Anch kwashiken yom yiyimp, antakel amwing a marelijon akat kuyilej antu anch rid rusot ra Nzamb. Pakwez minam mad makasu. Nzamb kendiyap ukata kulet yom yiyimp. (Tang Jakobu 1:13.) Cha ushon, makasu ma chirelijon makat kuyitwal antu kulemp ni Nzamb.
2. Mutapu ik marelijon ma makasu mamusaadikishina Nzamb kusutin yisal yau?
Marelijon ma makasu makatap kuyisadin antu mud mutapu ukatau kuyisadin kud Yehova. Bibil ulondin anch “yitil yend [relijon wa makasu] yaruzwamin kal miril djat ni mwiur.” (Kujingunik 18:5) Kudiokal pakur, marelijon makat kwiyandjik mu yom ya politik, kukwash jinjit, ni mayijipeshin kal antu avud nakash. Antakel amwing a chirelijon akatin nakash kupit, chawiy akat kuyit antu nfalang mulong wa kupit nich. Yisal yiney yimekeshin patok anch kamwijap Nzamb ap pakemp ni kafanyidinap kulond anch amusadidin ndiy.—Tang 1 Yohan 4:8.
3. Mutapu ik wiyovilay Nzamb piur pa marelijon ma makasu?
Anch yom yisadinau kud marelijon ma makasu yikujimeshin, chad utongin anch mutapu ik wiyovilay Yehova? Uyikatin antu, pakwez uyijimedin antakel a marelijon amusaadikishina ni ayimeshina antu au mar. Ushidinamu anch ukushesh marelijon ma makasu ni “[makez] kamekanap kand.” (Kujingunik 18:21) Piswimp ap, Nzamb ukushesh marelijon ma makasu mawonsu.—Kujingunik 18:8.
ILEJA CHIKURIKINA
Tal mutapu wiyovilay Nzamb piur pa marelijon ma makasu. Shinshikin yom yasadinau kal kud marelijon ma makasu, pakwez ileja kand mulong wak yom yiney yifanyidinap kukukangesh kwilej kumwijik Yehova.
4. Nzamb kitiyinap marelijon mawonsu
Antu avud akat kulond anch marelijon mad mud jinjil kushalijan jitwadina jawonsu kud Nzamb. Pakwez ov, chid chakin? Tang Mateu 7:13, 14, kupwa isambinany chipul ech:
-
Mutapu ik urumburilay Bibil njil yitwadina ku mwom?
Talany VIDEO, kupwa isambinany chipul chidia kwinshin oku.
-
Ov, Bibil ulondin anch kud marelijon mavud mamusangareshina Nzamb?
5. Marelijon ma makasu mamekeshinap rukat ra Nzamb
Marelijon mamusaadikishin kal Nzamb mu mitapu yivud. Mutapu umwing wa ushon nakash ud wa kwiyandjik mwi njit. Mulong wa kuman chilakej chimwing, talany VIDEO. Kupwa isambinany yipul yidia kwinshin oku.
-
Ma egliz mavud masala yom ik pa chisu cha Njit ja Kaad ja pa Mangand Mawonsu?
-
Mutapu ik utongina piur pa yom yasalau?
Tang Yohan 13:34, 35 ni 17:16. Kupwa isambinany yipul ey:
-
Mutapu ik ukatay Yehova kwiyov anch marelijon miyandjik mwi njit?
-
Relijon wa makasu wasadin kal yom yivud yiyimp nakash. Mu mitapu ik yimwing wamena kal anch relijon wa makasu wakangeny kal kwimburij rukat ra Nzamb?
Marelijon ma makasu mimburijinap rukat ra Nzamb
6. Nzamb ukatin kuyikwash antu kudiokal mu relijon wa makasu
Tang Kujingunik 18:4, a kupwa isambinany chipul ech:
-
Mutapu ik wiyovila pa kwijik anch Nzamb ukatin kuyipandish antu adimbinau kal kud marelijon ma makasu?
7. Dandamen kwilej piur pa Nzamb wakin
Ov, yom yiyimp yilondinau ni yisadinau kud marelijon ma makasu yifanyidin kukukangesh kwilej kumwijik Nzamb? Tong bil anch mwan umwing ikundj ukat kulik kwend kutesh umutakel wa manangu umwinkishinau kud tatukwend. Kupwa wadiokal ku chikumbu ni wasambish kusal yom yiyimp. Tatuku kasangaredinap yom yisadinay mwanend. Ov, mulong wak chikwikalap chitentamina kumufish nich tatuku mulong wa wintombwij wa mwanend?
-
Ov, chikwikal chitentamina kumufish nich Yehova ni kulik kwilej piur pend mulong wa yisal ya marelijon ma makasu?
ANCH MUNTU WAKWEL ANCH: “Nisangarediningap kwam yom ya relijon, mulong antu adia mu marelijon mawonsu akwet kwau rubabek.”
-
Ov, niyey mwawiy utongina?
-
Mulong wak yisal ya marelijon ma makasu yifanyidinap kukukangesh kwilej piur pa Yehova?
YOM TWILEJA KAL
Marelijon ma makasu mamusaadikishin kal Nzamb kusutil mafundish mau ma makasu ni yisal yau yiyimp. Nzamb ukushesh marelijon ma makasu.
Ov, uvurikin?
-
Mutapu ik wiyovila piur pa yom yikatau kufundish ni kusal kud marelijon ma makasu?
-
Mutapu ik wiyovilay Yehova piur pa marelijon ma makasu?
-
Marelijon ma makasu akumasal nchik kud Nzamb?
JINGUNIN KAND
Jingunin yom yaad yikatau kusal mu marelijon mavud yikata kumujimesh Nzamb.
Mulong wak Yehova ukatin anch tumwifukwila pamwing nau antu akwau?
“Ov, Chid Kamu cha Usey Kwikal mu Relijon Kanang?” (Mutu wa mulong udia pa jw.org)
Mwimpel umwing amunenganesha nakash kud relijon wend. Pakwez chinech chamukangeshap kwilej uyakin piur pa Nzamb.
“Mulong Wak Mwimpel Umwing Wadiokala mu Egliz Wend” (Lankany!, wa Ngond wa 2, 2015)
Kudiosh kamu pakur, marelijon makat kufundish makasu mayibachikina antu kutong anch Nzamb katubangidiningap ni ud mwin chisum. Tal uyakin piur pa makasu mamwing masatu.
“Makasu Mamumekeshina Nzamb Mudi Wakad Rukat” (Chinong cha Kalam cha 1 Ngond wa 11, 2013)
a Mulong wa kujingunin mulong wak buku wa Kujingunik umatazukin marelijon ma makasu anch Babilon Mujim, tal Mazu ma Kwinsudiel 1.
Jingunin Kand
YIPUL YIPWILINGAU NAKASH
Dilejan dia Bibil Chom ik?
Tan yakul ku yipul piur pa program wetu wa kwilej Bibil pakad kufut nfalang.
