Mud mutapu twamanang mu dilejan diasutang ed, kidiap marelijon mawonsu makata kumusangaresh Nzamb. Pakwez tukutwish kumwifukwil Sakatang wetu mu mutapu umusangareshina. ‘Difukwil [ap, relijon]’ ik umusangareshina? (Jakobu 1:27) Shinshikin yom yifundishinay Bibil.

1. Difukwil dietu difanyidin kwimen pa chom ik?

Difukwil dietu difanyidin kwimen pa Bibil. Yesu wamuleja Nzamb anch: “Dizu diey diawiy uyakin.” (Yohan 17:17) Marelijon mamwing makat kudiul uyakin udia mu Dizu diapepilau dia Nzamb, Bibil. Akat kuswinkesh uyakin winou nich mafundish ni yishankur ya antu. Pakwez Yehova kakatap kuyisanger antu akata “kudjibul yijil ya Nzamb.” (Tang Marko 7:9.) Ku mutambu ukwau, tukat kusangaresh muchim wend anch twalamat ku Bibil ni anch twasadin yiyul yend.

2. Mutapu ik tufanyidina kumwifukwil Yehova?

Mulong ud Sakatang wetu, Yehova utwitin anch tulamata kud ndiy. (Kujingunik 4:11) Charumburik anch tufanyidin kumukat ni kumwifukwil ching ndiy, pakad kusadin atupwany, yifatul, ap yirumbidij mulong wa kumwifukwil.—Tang Isay 42:8.

Difukwil dietu difanyidin kwikal ‘ditumbila ni ditiyinau’ kud Yehova. (Rom 12:1) Chinech chirumburikin anch tufanyidin kushakam kukwatijan ni mbil jend ja piur. Chilakej, antu amukatina Yehova akatin ni akat kuziyin mbil jend piur pa uruw. Ni akat kwipuk kand yisal yiyimp mud kuna ruwand, kuleu maar, ni kusadin nayimp yom yilewishena (madrog). a

3. Mulong wak tufanyindin kumwifukwil Yehova pamwing nau ambay netu in Kristu?

Yikumangan yetu tukata kusal rubing ni rubing yikat kutwinkish mutapu wa ‘kumushiman Yehova . . . mu chikumangen.’ (Kuseng 111:1, 2) Mutapu umwing tukata kusal mwamu ud kusutil kumuwangil Nzamb miminy ya kumushiman nich. (Tang Kuseng 104:33.) Yehova utwitin kukumangan mulong utukatin ni wij anch yikumangan yikutukwash kusanger mwom chikupu. Anch twakumangan pamwing mulong wa kukasikeshijan, tukat kand kutaninamu ayinetu.

 ILEJA CHIKURIKINA

4. Tufanyidinap kusadin yifatul mulong wa kumwifukwil Nzamb

5. Kumwifukwil ching Yehova kukat kutukwol ku yitiyij ya makasu

 6. Tukat kumwifukwil Nzamb ku yikumangan

Tukat kumushiman Yehova ni kukasikeshijan umwing ni mukwau kusutil kuwang ni kwakul ku yikumangan yetu. Tang Kuseng 22:23, kupwa isambinany yipul ey:

• Ov, ukat kusanger kutesh yakul ku yikumangan?

• Ov, niyey ukatin kwirijek mulong wa kwakul?

7. Yehova ukat kusangar anch twayilej antu akwau yom twilejina

Kud mitapu yivud tukutwisha kuyilej antu akwau uyakin twilejina mu Bibil. Tang Kuseng 9:2 ni 34:2, kupwa isambinany chipul ech:

• Chom ik wilejina mu Bibil ukatina kumulej muntu kanang?

 YOM TWILEJA KAL

Tukat kumusangaresh Sakatang wetu anch twamwifukwil ching ndiy, twamushiman ku yikumangan, ni anch twayilej antu akwau yom twilejina.

Ov, uvurikin?

• Kwisu kutulejinay Nzamb mutapu wa kumwifukwil mu mutapu witiyinay?

• Mulong wak tufanyidin kumwifukwil ching Yehova?

• Mulong wak tufanyidin kumwifukwil Nzamb pamwing ni antu akwau akatina niyau kumusangaresh?