DILEJAN DIA 21
Mutapu Ik Tukata Kulejan Rusangu Ruwamp?
Piswimp ap, Yehova ukupwish milong yawonsu turishina nich kusutin Want wend. Riner rid rusangu ruwamp nakash rikwetau antu awonsu kuswir kwa kwijik. Yesu wayileja in kwilejend kulejan uruu winou kud antu awonsu! (Mateu 28:19, 20) Mutapu ik ukatau Atuman a Yehova kuziyin kwi mbil yiney ya Yesu?
1. Mutapu ik uwanyidinay Mateu 24:14 nlel?
Yesu wasambela kulejan anch: “Chifanyidin rusangu ruwamp ra Want wa Nzamb ez arulejan bil ku mangand mawonsu.” (Mateu 24:14) Atuman a Yehova akat kusal nich musangar nakash mudimu winou. Tukat kulejan rusangu ruwamp pa mangand mawonsu mu mazu 1 000 ni kusut! Chitin kusal usu nakash ni kwirijek mulong wa kuwanyish mudimu winou upandikena kujimb. Tukutwishap kuusal pakad ukwash wa Yehova.
2. Usu ik tukata kusal mulong wa kulejan rusangu ruwamp?
Tukat kulejan pa ndond pin pawonsu padia antu. Mud mutapu wasalangau in Kristu a mu mivu chitot ya kusambish, tukat kulejan ‘ku chikumbu ni chikumbu.’ (Midimu 5:42) Mulad winou wa usey nakash utukwashin kulejan rusangu ruwamp kud mamiliyon mavud ma antu muvu ni muvu. Tukat kulejan kand pa ndond ya antu avud, mulong antu kadingap yisu yawonsu ku yikumbu yau. Kupwa tukat kukimb chisu chawonsu mitapu ya kuyilej antu piur pa Yehova ni piur pa yom yikaninay kutusadin.
3. Nany ukweta chisend cha kulejan rusangu ruwamp?
In Kristu akin awonsu akwet chisend cha kulejan rusangu ruwamp. Tukwatining nich usey nakash chisend chinech. Tukat kusal usu wetu win wawonsu mulong wa kulejan rusangu ruwamp, mulong twij anch uruu winou ukutwish kuyipandish antu. (Tang 1 Timote 4:16.) Kakatap kutufut mulong wa mudimu winou tukata kusal, mulong Bibil ulondin anch: “En watambulanya . . . wakad difut, niyen panany kand pakad kufutishan.” (Mateu 10:7, 8) Kadiap antu awonsu akata kwitiy uruu wetu. Pakwez tukat kudandamen kulejan, mulong twij anch kusutin kulejan rusangu ruwamp, tukat kumuziyin Yehova ni kusangaresh muchim wend.
ILEJA CHIKURIKINA
Jingunin yom yivud piur pa usu ukatau kusal Atuman a Yehova mulong wa kulejan pa mangand mawonsu, ni tal mutapu Yehova ukatay kutukwash.
Kulejan pa mangand mawonsu: (A) Costa Rika, (B) États-Unis, (C) Benin, (D) Tayiland, (E) Yap, (F) Suède
4. Tukat kusal usu wa kulejan kud antu awonsu
Atuman a Yehova akat kusal usu nakash mulong wa kulejan rusangu ruwamp kud antu a ku jindond jin jawonsu. Talany VIDEO, kupwa isambinany chipul ech:
-
Yom ik yikusangareshina piur pa usu ukatau kusal Atuman a Yehova mulong wa kulejan rusangu ruwamp?
Tang Mateu 22:39 ni Rom 10:13-15, kupwa isambinany yipul ey:
-
Mudimu tukata kusal umekeshin mutapu ik anch tuyikatin amutej netu?
-
Mutapu ik ukatay Yehova kuyiman antu akata kulejan rusangu ruwamp?—Tal verse wa 15.
5. Tud ambay a mudimu nend Nzamb
Kud yilakej yivud yimekeshina anch Yehova utakedin mudimu wetu. Chilakej, mwi ngand ya Nouvelle-Zélande, dichuku dimwing, kupwa kwa midi, mukadivar Paul wamutana mband umwing pading palejenay ku chikumbu ni chikumbu. Dichuku dinidia pamanch, mband winou wamulembila Nzamb mu kusadin dijin Yehova, ni wamwita chakwel kwezap muntu kwol kwend mulong wa kumufundish piur pa Nzamb. Paul ulondin anch: “Nashika ku chikumbu cha mband winou kupwa kwa asaa asatu.”
Tang 1 Korint 3:9, kupwa isambinany chipul ech:
-
Yom mud yasadika mu Nouvelle-Zélande, yimekeshin mutapu ik anch Yehova utakedin mudimu wa kulejan?
Tang Midimu 1:8, kupwa isambinany chipul ech:
-
Mulong wak tukwet kuswir kwa ukwash wa Yehova mulong wa kuwanyish mudimu wetu wa kulejan?
Ov, wij?
Rubing rawonsu, ku chikumangan chetu cha mukach mwa rubing, akat kutufumb mulong wa mudimu wetu wa kulejan. Anch wayilap kal ku chikumangan chinech, mutapu ik wamana kufumb kutwinkishiningau?
6. Tukat kuziyin mbil ya Nzamb ya kulejan
Mu mivu chitot ya kusambish, akankuny apakisha kuyikangesh in kwilej a Yesu kusal mudimu wa kulejan. In Kristu inay alondina mbil yadingau nich ya kulejan kusutil ‘kurijikish rusangu ruwamp . . . kud mburamatad.’ (Filip 1:7) Wawiy mutapu usadinau kand Atuman a Yehova nlel. a
Tang Midimu 5:27-42, kupwa isambinany chipul ech:
-
Mulong wak tukwimikap mudimu wa kulejan?—Tal verse wa 29, 38, ni 39.
ANCH MUNTU WAKWIPUL ANCH: “Mulong wak Atuman a Yehova akat kuyang kulejan ku chikumbu ni chikumbu?”
-
Ey ukumwakul nchik?
YOM TWILEJA KAL
Yesu wayileja in kwilejend kulejan rusangu ruwamp ku michid yawonsu. Yehova ukat kuyikwash atushalapol end kusal mudimu winou.
Ov, uvurikin?
-
Anany akata kulejan rusangu ruwamp pa mangand mawonsu?
-
Mudimu wetu wa kulejan umekeshin mutapu ik anch tuyikatin amutej netu?
-
Ov, utongin anch mudimu wa kulejan ukutwish kutuletin musangar? Mulong wak?
JINGUNIN KAND
Jingunin mutapu ukatau Atuman a Yehova kulejan mu misumb yijim.
Mutapu ik ukatau Atuman a Yehova kusal mulong wa kupan uman kud arefije?
Tesh mutapu urumburilay mband umwing mulong wak kusadin mwom wend mu mudimu wa kulejan kwamuletina musangar.
Jingunin mutapu kuwin mu milong ya dirumburish kutwadina rusangu ruwamp kurutu.
a Nzamb ndiy utwinkishina mbil ya kulejan. Chawiy Atuman a Yehova kakwetap kuswir kwa kuyinkish mbil kud antakel a mburamatad mulong wa kulejan rusangu ruwamp.
Jingunin Kand
YIPUL YIPWILINGAU NAKASH
Dilejan dia Bibil Chom ik?
Tan yakul ku yipul piur pa program wetu wa kwilej Bibil pakad kufut nfalang.
