1-3. (a) Ov, mutapu ik wasadinay Salomon manangu mamwing mashimokishena mulong wa kupwish kupwitijan kwa amband aad? (b) Ov, chom ik chashilayimu Yehova kutwinkish, ni yipul ik tukutwisha kwiyipul?

KWADING mulong umwing ukash—amband aad ading akat kupwitijan mulong wa mwan. Amband inay ading mu chikumbu chimwing, ni awonsu aad avala mu machuku minima an amakundj. Mwan umwing wafa, ni katat muntu ni muntu wasambisha kulond anch mwan udia mwom ndiya mwanend kamu. * Kwadingap muntu ap umwing wamana mutapu yom yiney yashikena. Aya pamwing ap ku dirumburish dikemp diakanganya kupwish mulong winou. Kupwa atwala mulong winou kudi Salomon, mwant wa in Isarel. Ov, ndiy wela kutwish kujingunin uyakin?

² Kupwa kwa kutesh mutapu wadingau amband inay ni kutadikijan, Salomon wita chakwel amuletina mpak ya musamun. Wayileja anch amukatula mwan udia mwom pakach chakwel apana kudi muntu ni muntu chikunku chend. Kapamp kamwing makwend a mwan wamuleja mwant anch apana mwan winou—mwanend mukatish—kudi mband mukwau. Pakwez mband mukwau wadandamena kulond anch amukatula mwan winou pakach. Salomon washikena ku kwijik uyakin. Wading wij mutapu ukwetingay maku riy pantaliken ni mwan udiokila mu divumu diend, ni wasadila ronganyin riner mulong wa kupwish kupwitijan kwinoku. Tong bil pa mutapu wovay mband winou pamuchirishinau mwanend  kudi mwant Salomon ni kulond anch: “Mband ou ndiy kamu makwend.”—1 Ant 3:16-27.

³ Ov, chadingap chisal cha manangu? Pateshau antu mutapu wapwishay Salomon mulong winou, awonsu asambisha kumulimish nakash, “mulong amana anch, manangu ma Nzamb mading mwi ndiy.” Mwaning, manangu ma Salomon mading chakin kamu chipan cha Nzamb. Yehova wamwinkisha “manangu ni ronganyin.” (1 Ant 3:12, 28) Pakwez, chidi nchik kud etu? Ov, tukutwish niyetu kutambul manangu ma Nzamb? Mwaning, ku umutakel wa Nzamb, Salomon wafunda anch: “[Yehova] ndiy ukata kupan manangu.” (Jinswir 2:6) Yehova washilamu anch ukupan manangu—ukaliweny wa kusadil ronganyin nawamp—kudi antu ayikimbina nich kashinsh. Ov, mutapu ik tukutwisha kutambul manangu ma mwiur? Ni mutapu ik tukutwisha kumasadil mu mwom wetu?

4-7. Ov, yom ik yinying yikutwisha kutukwash chakwel tutambula manangu?

⁴ Ov, chifanyidin kwikal nich manangu ap kwilej nakash mulong wa kutambul manangu ma Nzamb? Bwat. Yehova usotining kutwinkish manangu mend chikalap nchik mashakamin ap kwilej kwetu. (1 Korint 1:26-29) Pakwez tufanyidin kwikasikesh, mulong Bibil ulondin anch “tambul manangu.” (Jinswir 4:7) Ov, mutapu ik tukutwisha kusal mwamu?

⁵ Chakusambish, tufanyidin kumwov Nzamb wom. Jinswir 9:10 jilejen anch: “Kumwov [Yehova] wom diawiy disambishil dia manangu! Wom wa Nzamb wawiy mufulandal wa manangu makin. Mulong wak? Vurikany anch manangu kudi kusadil kuwamp kwa ronganyin. Chawiy lel kumwov Nzamb wom kudiap kuzal kurutu kwend, pakwez kudi kumulimish ni kumuchingejin. Wom winou udi uwamp ni ubachikina ku yisal. Utubachikin ku kusal yom yikwatijadina nich ronganyin retu ra rusot ra Nzamb ni mitapu yend ya kusal yom. Yawiy njil ya manangu, mulong kuziyil ku yany ya Nzamb kuletining ching yiyukish kudi antu akata kuyilondul.

 ⁶ Cha kaad, tufanyidin kwikepish. Chitwishikinap kwikal nich manangu ma Nzamb pakad kwikepish. (Jinswir 11:2) Ov, mulong wak? Anch tudi in kwikepish, tukwikal kwitiy anch tukwetap yakul ku yipul yawonsu, yitongijok yetu yidiap chisu chawonsu yakin, ni tuswiridin kwijik yisotinay Yehova pa milong kampand. Yehova “ukat kuyipompat in kwibaz,” pakwez usotining kupan manangu mend kudi in kwikepish.—Jakobu 4:6.

⁷ Chom cha kasatu cha usey chidi kwilej Dizu dia Nzamb diafundau. Manangu ma Yehova amamekesha mu Dizu diend. Chakwel twikala ni manangu minam, tufanyidin kusal usu wa kumakimbijol. (Jinswir 2:1-5) Chom chikwau cha kanying chidi malembil. Anch twadandamen kwit manangu ma Nzamb mu malembil nich muchim umwing, ukez kutwinkish chakin kamu. (Jakobu 1:5) Ukez kwakul kand ku malembil metu pitukata kumwit spiritu wend. Ni spiritu wend ukez kusal anch tutwisha kutan yitongijok ya usey mu Dizu diend chakwel tupwisha milong, twipuka ubaj, ni tukwata mipak ya manangu.—Luka 11:13.

8. Ov, mutapu ik chikutwisha kumekan patok anch twatambwil chakin kamu manangu ma Nzamb?

⁸ Mudi mutwamena mu Shapitre wa 17, manangu ma Yehova mudi ma kusadil. Anch twamatambula chakin kamu, mafanyidin kumekan mu yisal yetu. Kambuy Jakobu wisambina piur pa mabuj ma mekeshina manangu ma Nzamb pafunday anch: “Manangu madiokila mwiur madi zwang, makwet chisambu, ni kwitudish, ni kwovijan, mizwil nich riy ni yisalijok yiwamp, wakad kasolikany ap rubabek.” (Jakobu 3:17) Pitukeza kwisambin pa milad yiney ya manangu ma Nzamb, tukutwish kwiyipul ayinetu anch, ‘Ov, manangu ma mwiur mamekening mu mwom wam?’

9. Ov, chom ik chirumburikina kwikal zwang, ni mulong wak kwikal zwang kufanyidin kwikal mwikadil wa kusambish pakach pa mikadil ya manangu?

⁹ “Madi zwang.” Kwikal zwang kurumburikin kwikal wakad kwijond mukach ap pol. Ap anch Bibil ujimbwiling manangu  pamwing ni muchim, pakwez manangu ma mwiur makutwishap kwandam mu muchim ukweta yitongijok, maku, ni yibachikin yijondila. (Jinswir 2:10; Mateu 15:19, 20) Pakwez, anch muchim wetu udi zwang—ap anch tudi antu akad kuwanyin—tukutwish ‘kudiokal ku kuyip, ni kusal uwamp.’ (Kuseng 37:27; Jinswir 3:7) Chawiy chasala anch Jakobu ateka kwikal zwang pa ndond ya kusambish mudi mwikadil wa manangu. Chawiy lel, anch tudiap zwang mu manangu ni muspiritu, ov, mutapu ik tukutwisha kumekesh chakin kamu mikadil yikwau ya manangu ma mwiur?

10, 11. (a) Ov, mulong wak chidi cha usey kwikal in chisambu? (b) Anch waman anch wamurumbukinang mbay ney mukaritiy, ov, mutapu ik ukutwisha kumekesh anch udi mwin chisambu? (Tal kand mazu ma kwishin.)

¹⁰ “Makwet chisambu.” Manangu ma mwiur makat kutubachik ku kwikal ni chisambu, chidia dibuj dia Nzamb dia mu spiritu. (Galatia 5:22) Tukwikasikesh chakwel twipuka kuyipish ‘chisambu chitukasina’ chiyitekina antu a Yehova pamwing. (Efes 4:3) Tusadining kand usu wetu wawonsu mulong wa kuchirish chisambu chinech anch chakangany kwikalaku. Mulong wak chidi cha usey? Mulong Bibil ulejen anch: “Shakamany mu chisambu. Chad Nzamb wa rukat ukata kupan chisambu chend ukwikal ni yenen.” (2 Korint 13:11) Anch twadandamen kushakam mu chisambu, Nzamb wa chisambu ukez kwikal niyetwetu. Mutapu tushakamina ni ambay netu in kwifukwil ukwet usu nakash piur pa urund wetu ni Yehova. Ov, mutapu ik tukutwisha kumekesh anch tukatin chisambu? Shinshikin chilakej chinech.

¹¹ Ov, chom ik ufanyidina kusal anch umen anch wamurumbukinang mbay ney mukaritiy? Yesu walonda anch: “Anch usotil kupan yakupesh yey kudi Nzamb pa chintamb, kwinikwa anch wavurik anch: ‘Mwanamakwam mu ritiy ukwet mulong ni yamam,’ shang yakupesh yey pa chintamb. Yang swa, ukachakulany nend mwanamakwey wa mu ritiy, chad uchirik lel ni kupan yakupesh yey kudi Nzamb.” (Mateu 5:23, 24) Ukutwish kusadin chiyul chinech mu kuya bil kumutal mukadivar  ney. Mulong wak? Mulong wa ‘kuchakul’ nend. * Chawiy lel, ufanyidin kwitiyij anch wamurumbukinang kangal watadik. Anch wamusejin mulong wa kutek chisambu pakach pen ni walam mwikadil winou, ukutwish pamwing ap kupwish milong, kwit dilikishin, ni kumulikishin. Mu kukimb chisambu ukumekesh anch akutakedil kudi manangu ma Nzamb.

12, 13. (a) Ov, chom ik chirumburikina dizu “kwitudish” diasadinau mu Jakobu 3:17? (b) Ov, mutapu ik tukutwisha kumekesh anch tudi in kuyibangin antu akwau?

¹² “Kubangin.” Ov, chirumburikin ik kubangin? Kukwatijan ni in kwilej Bibil amwing, dizu dia Grek diakarumunau anch  ‘kubangin’ mu Jakobu 3:17 dikasiken kudikarumun. In kukarumun amwing asadina mazu mudi “uwamp,” “ushimpishina muchim,” ni “mwin kuyibangin akwau.” Mazu mamwing ma kwishin ma Traduction du monde nouveau mamekeshin anch dizu dined dirumburikin anch “kubangin.” Ov, mutapu ik tukutwisha kumekesh anch mulad winou wa manangu ma mwiur usadil mu mwom wetu?

¹³ Filip 4:5 ulejen anch: “Mekeshany muchim wa kwitudish [kubangin] kudi antu awonsu.” Bibil mukwau ulejen anch: ‘Ikalany in kubangin.’ Chirumburikinap anch tufanyidin kuman yom mudi mutuyimena ayinetu; chidi mutapu utumenau kudi antu akwau, mutapu utwijau. Muntu uyibangidina antu akwau kadiap muntu ukata kulondul chisu chawonsu kachijil ni kachijil ap kusot ching anch akwau asala yom mu mutapu usotinay. Pakwez, uding tayad mulong wa kuyitesh akwau ni anch chitwishikin, kusal yom yisotinau. Udi kand muwamp, ushicha nawamp ni antu akwau. Anch mwikadil winou udi wa usey kudi in Kristu awonsu, udi kand wa usey pakampwil kudi amakurump. Kuyibangin antu akwau kusadining anch chiswapala kuyisejin amakurump. (1 Tesalonik 2:7, 8) Tufanyidin kwiyipul ayinetu anch: ‘Ov, nijikening mudi muntu mwin kuyimbangin antu akwau, ni muwamp?’

14. Ov, mutapu ik tukutwisha kumekesh anch tukat ‘kuziyil’?

¹⁴ ‘Kuziyil.’ Dizu dia Grek diakarumunau anch ‘kuziyil’ didiap ndond yikwau mu Mikand ya Grek ya win Kristu. Kukwatijan nich mwin kwilej Bibil umwing, dizu dined “akat kudisadilang mulong wa kukand kwa amasalay.” Dikwet chitongijok cha “kwikal uswapela kutesh’ ni “kwikal muntu uziyidila.” Muntu utakedilau kudi manangu ma mwiur udi tayad ku kuziyil ku yom yilejenay Bibil. Kadiap muntu wijikena mudi muntu wimedina kusu pa mipak yend ni ulikina kutesh yiyul yakad kukwatijan ni yitongijok yend. Pakwez, ukat kukarumuk anch amulej kusutil ku Mukand wa Nzamb anch warumbukang ap widimbang. Ov, mwawiy mukwijau kudi antu akwau?

15. Ov, riy chom ik, ni mulong wak ajimbwil pamwing “riy” ni “yisalijok yiwamp” mu Jakobu 3:17?

¹⁵ “Mizwil nich riy ni yisalijok yiwamp.” * Riy chidi chom chimwing cha usey nakash cha manangu ma mwiur, mulong alondin anch manangu minam “mizwil nich riy.” Mu verse winou ajimbwil “riy” ni “yisalijok yiwamp” pamwing. Chidi chom chiwamp, mulong mu Bibil, riy rimekeshining yisu yivud kuyibangin antu akwau, rusot ra kumekesh yisalijok yiwamp nakash. Buku umwing urumburil riy anch “ridi rineng rikatay muntu kwov mulong wa mar ma muntu mukwau ni usu usadinay mulong wa kumukwash.” Chinech chimekeshin anch, manangu ma mwiur madiap matalela ap ma kutongin kusu mu manangu. Pakwez, madi ma chirungul, ma kashinsh ni madiokila mu muchim. Ov, mutapu ik tukutwisha kumekesh anch tukwet riy?

16, 17. (a) Kuwejaku ku rukat tukweta kudi Nzamb, ov, chom ik chitubachikina kwipan mu mudimu wa kulejan ni mulong wak? (b) Ov, mu mitapu ik tukutwisha kumekesh anch tukwet chakin kamu riy?

¹⁶ Mutapu wa usey nakash udi kusutil ku kulejan rusangu ruwamp ra Want wa Nzamb kudi antu akwau. Ov, chom ik chitubachikina kusal mudimu winou? Cha kusambish chidi rukat ritukweta kudi Nzamb. Pakwez riy ni ranaken ra kuyikwash antu akwau yitubachikin kusal mwamu. (Mateu 22:37-39) Antu avud nlel “aziyil ni ajilijil mudi amikoku akad kafung.” (Mateu 9:36) Akat kuyidiul ni kuyikadish amputames kudi atufung a marelijon ma makasu. Mudi chibudikin, kijap umutakel wa manangu udia mu Dizu dia Nzamb ap yiyukish yikezau kulet piswimp ap kudi Want pa divu. Chawiy lel, anch twashinshikin pa maswir ma muspiritu ma antu atunyingumokina, muchim wetu wa riy utubachikin kusal usu wetu wawonsu mulong wa kuyilej rutong ra rukat ra Yehova.

¹⁷ Ov, mu mitapu ik yikwau tukutwisha kumekesh anch tukwet riy? Vurikany chishimu cha Yesu cha mwin Samaria  watana muntu umwing walalang kal ku mutambu wa njil, wiyau ni kumubul. Pamumanay, mwin Samaria “wamwovila riy,” wamukasa pa yitat ni wamwoka. (Luka 10:29-37) Ov, chilakej chinech chimekeshinap anch kwikal ni riy kudi kuyikwash antu adia mu mar? Bibil utulejin anch tufanyidin “kusal nawamp kudi antu awonsu, pakwez kupandakan kudi anamakwetu in ritiy.” (Galatia 6:10) Chilakej, mbay netu ipal mukaritiy ukutwish kuiswir kwikal nich mutapu wa kuya ku yikumangan ya win Kristu. Mwadiamufu ukutwish kwikal nich kuswir kwa kumukwash kurijek chikumbu chend. (Jakobu 1:27) Mukadivar uziyina ukutwish kuswir kutesh “dizu diwamp” chakwel dimukasikesha. (Jinswir 12:25) Mu kumekesh riy mu milad yiney, tukat kupan uman anch manangu ma mwiur masadil chakin kamu mu mwom wetu.

18. Anch atutakedil kudi manangu ma mwiur, ov, chom ik tufanyidina kudiosh mu michim yetu, ni mulong wak?

¹⁸ “Wakad kasolikany ap rubabek.” Manangu ma Nzamb makwetingap katond ka chikit ap chibud cha wan a ngand. Muntu utakedilau nich manangu minam ukat kwikasikesh kwipuk yibachikin yawonsu ya kumekesh katond. (Jakobu 2:9) Tukutwishap kumusadin muntu umwing uwamp kuyipandakamu akwau mulong wa shikol jend ja piur, mulong ukwet nfalang jivud ap mulong wa chisend chikwetay mu chikumangen; tukutwishap kuyisend pakad usey ambay netu akaritiy, ap anch kadiap ampich. Anch Yehova washiken ku kuyimekeshin rukat rend, chinech chimekeshin anch tufanyidin niyetu kuyimekeshin rukat retu.

19, 20. (a) Ov, dizu dia Grek diakarumunau anch “rubabek” diadinga dirumburikin ik? (b) Ov, mutapu ik tukutwisha kumekesh ‘kukatijan nau anamakwetu in Kristu,’ ni mulong wak chinech chidi cha usey?

¹⁹ “[Wakad] rubabek.” Dizu dia Grek diakarumunau anch “rubabek” dikutwish kwisambin piur pa “muntu usengena disengan kampand.” Pasak, in kusengan in Grek ni in Rom adjala mikish yijim padingau ni kusengan. Chawiy lel, dizu dia Grek diasadinau anch “rubabek” disambidina piur pa muntu  wading usadidila mukish mu masengan mulong wa kudimban. Mwikadil winou wa manangu ma Nzamb ufanyidin kwikal ni chibachikin pa mutapu tushicha ni ambay netu akaritiy ni mutapu twiyovila piur pau.

²⁰ Kambuy Pita walejana anch ‘kuziyil kwetu ku uyakin’ kufanyindin kwikal kwa ‘kukatijan nich rukat rakin.’ (1 Pita 1:22) Mwaning rukat retu pantaliken ni akadivar netu rifanyidinap kwikal ching kusu ra ku mes bwat. Tufanyidinap kudjal mikish ap kusengan mulong wa kuyidimb antu akwau. Rukat retu rifanyidin kwikal rakin, ni ridiokila mu muchim. Anch twasal mwamu, ambay netu akaritiy akez kutuchingejin, mulong akez kuman anch tudi mutapu tumekeninga ku mes mau. Ukashinsh winou ukat kukasikesh urund wakin pakach pa in Kristu ni ukwashin kutek mwikadil wa kuyichingejin akwau mu chikumangen.

21, 22. (a) Ov, mutapu ik wakanganyay Salomom kulam manangu? (b) Ov, mutapu ik tukutwisha kulam manangu, ni mutapu ik tukeza kutaninamu anch twasal mwamu?

²¹ Manangu ma Nzamb chidi chipan chidiokila kudi Yehova, chitufanyidina kulam. Salomon walonda anch: “Mwanam ikundj, lam manangu makin ni kashinsh.” (Jinswir 3:21) Cha ushon, mulong Salomon amwinend wakanganya kusal mwamu. Washala nich manangu palamay muchim wa kuziyil. Pakwez kwinsudiel amband end avud angendj ashikena ku kudiosh muchim wend ku difukwil dishitwila dia Yehova. (1 Ant 11:1-8) Chamushikena Salomon kwinsudiel chamekesha anch kuburen kusadin nawamp manangu kudiap kwa usey.

²² Ov, mutapu ik tukutwisha kulam manangu? Kusutil ku kutang Bibil pakad kujing ni mikand yimedina pa Bibil yiletinau kudi “kashalapol ushishamena ni kubabal” ni kwikasikesh kusadil yitukata kwilej. (Mateu 24:45) Tukwet mayingish mavud matubachikina kusadin manangu ma Nzamb. Tukwikal nich mwom uwamp nlel unou. Ni tukutwish “kutambul mwom udia wakin”—mu mangand masu ma Nzamb. (1 Timote 6:19) Cha usey nakash, kukudish manangu ma mwiur kukat kutusejish nakash piswimp ni musul wa manangu mawonsu, Yehova Nzamb.