Atuman a Yehova akat kudandamen kusal mudimu wau wa relijon ni wa kukwash antu mu jingand 200 ni kusut. Pakwez ching kwau jingand 35 jawiy jitwishina kuwanyish maswir mau kusutil yipan yau ayinau. Chad mutapu ik ukatau kusadin nfalang mu jingand jiburedina?

 Chisak Chitakedila cha Atuman a Yehova chikat kushinshikin maswir ma mu spiritu ni midimu ya anamakwau Atuman adia mu jingand jawonsu. Nfalang akat kujichind ni kujisadin nawamp. Anch biro wa mutiy watambul nfalang jivud kusutamu jikwetau nich kuswir, ja pa mutu akat kujipan ku mabiro makwau madia mu maswir. Mutapu wa kusal winou ukwatijadin ni chilakej cha in Kristu a kusambish, akwashijanang amwing ni akwau kusutil “kupan mu chilik chimwing.” (2 Korint 8:14) Asadina nfalang jau jisutinap mulong wa kuyikwash anamakwau in Kristu ading mu maswir.

 Mutapu ik wiyovau akadivar atambula ukwash kudiokal ku mabiro makwau ma mitiy? Chilakej, mwi ngand ya Tanzani, chikunku chimwing ni kusut cha antu a mwi ngand ya kabuj akat kusadin adolar aad pa dichuku, asadina nfalang jinej mulong wa kurijek nich Chot cha Want cha chikumangen cha Mafinga. Chikumangen chafunda anch: “Kudiosh kamu parijekinau Chot chetu, uvud wa in kukumangan wavula nakash! Tujikitishin nakash dirijek dia Yehova ni tuyijikitishin akadivar nau anambaz netu a pa mangand mawonsu mulong wa muchim wau wa kupan, watukwashina kusanger ndond yiwamp mud yiney ya difukwil.”

 Akadivar nau anambaz netu amwing a mwi ngand ya Sri Lanka amen mar ma kuburen yakudia mulong wa mayej ma Covid-19. Pakach pa anamakwetu inay pad nambaz Imara Fernando ni mwanend ikundj, Enosh. Pakwez kusutin yipan yidiokila mu jingand jikwau, atambula ukwash wading uswirikedinau. Pa kart umwing wafundau ku makas, afunda anch: “Tuyijikitishin nakash akadivar ni anambaz netu atumekeshidina rukat mu yisu yiney yikash. Tukwet musangar nakash wa kwikal mu dijuku dined ni tukat kudandamen kumulembil Yehova chakwel ayikwasha anamakwetu awonsu in Kristu mu machuku minam ma nsudiel.”

 Chikalap nchik ndond yidiau akadivar nau anambaz netu, akat kusal usu wa kwangan yom yikwetau. Chilakej, Enosh wasala kamushet kend ka kutekin nfalang chakwel niyend akwasha majuku madia mu maswir. Guadalupe Álvarez niyend wasala mwamu. Ushich mu musumb umwing wa Mexik mutambwilau antu akemp ukwash wa guvernema ni akwau avud kakutambulangap kwau ap pakemp. Pakwez niyend wapana yom yadingay nich. Wafunda anch: “Nimujikitishin Yehova mulong wa uwamp wend ni rukat rend rishinshamena. Nij anch chipan cham akuchiwej ku yipan ya antu akwau ni chikuyikwash akadivar ni anambaz nam adia mu maswir.”

 Mabiro ma mitiy makata kupan nfalang ku jindond kudia maswir makat kusanger kusal mwamu. Anthony Carvalho, usadina mud Chid cha Komite wa Mutiy wa Brezil ulondin anch: “Kudiosh kamu pakur, mudimu wa mwi ngand yetu wading witin kamu ukwash wa nfalang ja ngand jikwau. Kusutil ukwash winou, twamen kamu yibudikin yiwamp. Katat, tukwetaku kamu mutapu ni tukwet chad chisend cha kuyikwash antu akwau. Akadivar netu akat kuman mutapu uyila kurutu mudimu wetu wa kulejan pa mangand mawonsu ni kutongin chisend chikwetau katat mud in kwilej akata kwipan nakash a Yesu.”

 Mutapu ik uwamp ukutwishau Atuman a Yehova kuyikwash akadivar ni anambaz nau adia mu maswir? Kadiap mu kutum kapamp kamwing yipan ku mabiro ma mitiy ma ngand yindj, pakwez kusutil kupan nfalang mulong wa mudimu wa pa mangand mawonsu. Tukutwish kupan yipan yiney mu mishet ya kutekin yipan mu chikumangen pafundinau anch “Mudimu wa pa Mangand Mawonsu” ap pa donate.pr418.com. Yipan yawonsu yid ya usey nakash.