Ngond ni ngond, tuchingedining nich impu maprogam ma muspiritu ni mavideo makatau kubudish pa JW Télédiffusion. Pakwez akadivar netu avud a mu Afrik kakwetap mutapu wa kuman ma program minam pa Internet. Mulong wak?

 Ku jindond jivud ja mu Afrik kakwetap rezo wa Internet. Ni ku jindond kudia rezo, yisu yivud ulimining ni chitin nfalang jivud. Chilakej, dichuku dimwing mu Madagaskar, kalam wa munyingumuku waya kwi ndond kwading rezo wifi mulong wa kupwit program wa JW Télédiffusion. Amwita adolar 16, ni nfalang jinej jivudin kusutamu jiyifutiningau antu amwing kupwa kwa kusal mudimu rubing ra kabuj! *

 Chikalap nchik yikokujol yiney, mamiliyon ma antu mu Afrik akutwish katat kusanger kutal JW Télédiffusion pakad kusadin Internet. Mutapu ik?

 Kudiokal mu muvu wa 2017, JW Télédiffusion akutwish chad kumutal kud antu ashicha mu Afrik wa mutambu wa Sahara kusutin satellite umekeshina chaîne wa televizion. Chaîne winou amukwatining chamwamu dichuku diawonsu uchuku ni muten, ni mu mazu 16.

 Mulong wa kusal mwamu, Atuman a Yehova akat kufut nfalang kud ansalamudimu akata kutek nsangu pa satellite. Satellite winou amusadidin mu jingand piswimp 35 ja mu Afrik jidia mutambu wa Sahara. Uvud wa nfalang jifutiningau ngond ni ngond ud wa adolar 12 000 ni kusut. Chisu ni chisu akat kufut kand nfalang jikwau ja piur mulong wa kulejan yinship yisadikina pa chaîne mukwau. Chinech chikat kukwash tunan twa antu kulondul yitentam ya rejon ap maprogram ma pakampwil chisu chikatau kwendin ma biro ma mitiy.

 Antu avud, Atuman ni akad kwikal Atuman, akat kulondul ku televizion chaîne wa JW ku yikumbu yau. Ap mwamu, akadivar netu avud kakwetap nfalang ja kuland yamu ya kutal nich chaîne winou. Mulong wa kuyikwash, atekin mu Yot ya Want 3 670 yamu ya kutal nich chaîne winou chakwel akadivar ni anambaz akutwish kutadin JW Télédiffusion kwinikwa. Kuland yamu yiney ni kuyitum, kwitin adolar 70 anch Chot cha Want chikwet kal televizion ap projecteur. Pakwez yamu yin yawonsu yikutwish kwit adolar 530.

 Akadivar ni anambaz netu akat kujikitish nakash mulong wa chaîne winou. Mukurump umwing wa chikumangen mu Kamerun ulondin anch: “Chaîne winou ud mud mana udia mukach mwa kabeng mulong wa dijuku dietu.” Mukadivar Odebode wa mu Nigeria, ulondin anch: “Tukat kutal chaîne winou mu dijuku tupamp tusatu pa rubing. Yisu yawonsu anam akat kuchingel yirung yiney nich impu nakash. Ni kudioshaku machuku tukata kutalang, akat kwingit kand chakwel atala chaîne winou yisu yikwau.” Nambaz Rose udia niyend mu Nigeria, ulondin anch: “Pa ndond pa kulondul nsangu jisu yisu yawonsu, nikat kutalang kwam chad chaîne wa JW. Anch nalondul nsangu jisu, chinswapedining kujiman kusutin yom nimena, ni tension ukat kwinkaninik. Pakwez JW Télédiffusion ukasikeshening nakash ni kwongojan! Ud chaîne nikatining nakash. Chid kamu chiyukish chijim nakash chidiokila kud Yehova.”

 Kalam wa munyingumuku mu Mozambik upanin rapor anch mu munyingumuku wend, Yot ya Want ayitekin kal yamu mulong wa kukwat chaîne winou pa satellite. Akadivar akata kukumangen mu Yot yiney akat kushik kurutu kwa saa umwing ap saa umwing ni kusut mulong wa kutal JW Télédiffusion.

 Mu muvu wa 2019, pa chisu cha chitentam cha pa mangand mawonsu mu musumb wa Johannesburg (mu Afrik wa Kurul), asadina chaîne winou mulong wa kulejan ku jindond jikwau chidivu ma diskur majim, pamwing ni madiskur masalau kud yid ya Chisak Chitakedila. Mukadivar Sphumelele usadina mu Departema wa Télédiffusion ku mutiy wa mu Afrik wa Kurul ulondin anch: “Kwinsambishin, chatwitang kumekesh madiskur kusutin Internet. Pakwez chinech chitang rezo Internet muwamp ni nfalang jivud ja mega tukusadina. Chaîne wa JW kusutin satellite kitinap nfalang jivud ni ud muwamp nakash.”

 Mulong wa yipan yen ya kwikatin yikwashina mudimu usadikina pa mangand mawonsu, akadivar nau anambaz netu avud mu Afrik atwishin kutal JW Télédiffusion kusutin satellite. Tujikitishin nakash mulong wa yipan yen upaninana mu milad kushalijan yilejenau pa donate.pr418.com..