Mulong antu avud akat kuyibatish muvu ni muvu, chawiy chisadina anch twikala nich kuswir kwa jindond jivud mulong wa kumwifukwil Yehova. Mulong wa kuwanyish maswir minam, Departema Utadina milong ya Kutung wa pa mangand mawonsu watenchikin mulong wa kutung ap kurijek jindond ja difukwil 2 700 ni kusut mu muvu wa 2020. *

 Cha ushon, chipupu cha COVID-19 charumbangeshin yom yatenchikau. Mulong wa kuyiking akadivar ni anambaz, ni kuziyin kwi mbil ja antakel a jingand, Komite wa Kupalangesh Mikand wa Chisak Chitakedila wimika maproje mavud ma kutung pa mangand mawonsu. Pakwez, mu muvu wa mudimu 2020, atungin ni kuwapish jindond ja difukwil 1 700 ni kusut. Chikwau kand, apwishin kutung maproje  100 ni kusut mu mitiy yimwing. Tushinshikinany maproje maad ma kutung mapwishinau ni mutapu mayikwashina akadivar.

 Mutiy wa Kamerun. Mutiy ukur, udia mu musumb wa Douala, wading ukemp ni ading afanyidin kuujimbish. Komite wa Kupalanesh Mikand wakata kurijek mabiro minam, pakwez nfalang ja kurijek nich jivudin kusutamu ja kutung nich. ashinshikina kand mutapu wa kutung pa ndond, ap kuland yikumbu ya kutung kal ni kuyirijek, pakwez kwikil chom ap chimwing chasalau.

 Pa chisu chinacha, akadivar atesha anch kwiyand kwa musumb wa Douala, antakel a ngand atenchika kurijek njil yisutidina ku Chot chetu cha Yitentam. Njil yiney yafanyina kusal anch rupang riney rimekan nawamp. Mutiy wading uswirikedin yom mud yiney. Chisak Chitakedila chitiya kutung mabiro masu ma mutiy mu rupang ra Chot cha Chitentam.

 Atuman ayinau ni antu akwau atazukau kusal, awonsu asala pamwing mudimu winou ni kusal mwamu kwakwashin kusadin nfalang jikemp ni kusal mu chisu chikemp. Chawiy asadina nfalang jikemp, ni kwashala nfalang amiliyar aad ni kusut! Dijuku dia Betel diabukina mu yikumbu yiney piswimp ni chipupu cha COVID-19 kupalangan pa mangand.

 Anamakwetu adia ku Betel mu Kameron ashich katat ndond yiwamp ni akwet ndond yiwamp ya kusadin mudimu ni amen mabiro minam mud chipan chidiokila kud Yehova. Ambay a uruw amwing alonda anch: “Tukatin kusal mudimu nakash ni kumekesh anch tusangaredin nakash chipan chinech.”

 Biro wa Kukarumwing wa Tojolabal mu Mexik. Mu mivu yivud, chisak cha kukarumun cha Tojolabal chasadinang ku mutiy wa Amerique Centrale, udia piswimp ni musumb wa Mexik. Pakwez dizu dia Tojolabal adilondining nakash Altamirano ni Las Margaritas—piswimp mu akilometre 1 000! Mud chibudikin, in kukarumun ikala nich yikokujol ya kukarumun nawamp dizu dia Tojolabal. Ni biro wa mutiy wasala usu mulong wa kutan akadivar ni anamabaz awanyishina yom yitinau mulong wa kukwash kukarumun kukwat yom ya kutesh mu dizu dia Tojolabal.

 Mulong wa mayingishin minam, Komite wa Kufund wa Chisak Chitakedila wakata kushemunin chisak cha kukarumun cha Tojolabal ni kuchitwal kwi ndond kulondinau dizu dined. Mulong wakuwanyish mudimu winou, komite wa mutiy wakwata mupak wa kuland chikumbu ni kuchiwapish. Kusal mwamu kwakwasha kulam nfalang jivud.

 Mwin kukarumun umwing walonda mutapu wataninawamu anch: “Mu mivu dikum nasutishina mu mudimu wa kukarumun ku muity, namanap muntu ap umwing wading ulondina dizu diam. Pakwez nlel, mabiro metu mad katat mwi ndond mulondinau dizu dia Tojolabal. Nikat kusankan antu alondina dizu dia Tojolabal dichuku diawonsu. Chankwashin kwijik yom yikwau ni kuwapish ukaliweny wam.”

 Mu muvu wa mudimu wa 2021, atenchikin kutung mabiro ma kukarumwin 75 ni yikumbu ya kwilejin anch yaswapal. Mitiy yikudandamen kwikal ni maproje, kuwejaku proje musu wa Ramapo, mu New York, pamwing kand ni mutiy wa Argentin ni wa Itali. Chikwau kand, kud kand maswir ma Yot ya Want yisu 1 000, ni yikumbu yikwau ya difukwil 6 000 ni kusut yiswiridin kuyiswinkesh ni Yot ya Want 4 000 yitin kuyirejek.

 Kwisu kukudiokala nfalang ja kutung nich ni kuwapish yikumbu yiney? Mukavar Lázaro González, udia mu Komite wa mutiy wa Amerique Centrale, wakula chipul chinech chisu chisambinay piur pa Biro wa Kukarumwin wa Tojolabal. “mu teritwar wa mutiy tukwet nfalang jikemp nakash. Chawiu kusutil kand ukwash wa ukadivar wa pa mangand mawonsu, chiswapel kutung mabiro ma kukarumwin ma ambay netu akad mutapu. Nfalang jipaninau akadivar netu pa mangand mawonsu jikwashin kuyitwal in kukarumun piswimp ni kwi ndond kulondinau dizu dikarumwinau. Tuyijikitishin nich muchim umwing akadivar a pa mangand mawonsu mulong wa ukwash wau wa kwikatin.” Inge, anch atwishin kutung yom chid mulong wa yipan yen ku mudimu wa pa mangand mawonsu, yivud akat kuyipanin pa donate.pr418.com.