Kapamp ka kusambish mu rusangu, mwi Ngond wa 7 ni wa 8 muvu wa 2020, Atuman a Yehova awonsu akutal program wa chitentam cha rejon mu chisu chimwing. Mulong wa kuwanyish yom yiney, yitang kukwat mavideo ma program mwawonsu ni kumakarumun mu mazu 500 ni kusut. Machuku mawonsu am, mudimu witining muvu umwing ni kusut mulong wa kutenchik ni kupwish program mud winou. Pakwez mulong wa mayej ma corona, in kukarumun Chitentam cha Rejon cha muvu wa 2020 “Sangarany Machuku Mawonsu”! ad akwet kwau angond anying mulong wa kusal mudimu winou.

 Departema ukata kuyikwashang in kukarumun pamwing ni Departema wa Kuland yom madia ku Biro Mujim wa pa Mangand Mawonsu wa Atuman a Yehova mapanang ukwash ujim chakwel mudimu winou usadika. Departema ukata kuyikwashang in kukarumun wamanang anch yisak yivud ya in kukarumun yading yikwet kuswir kwa yom yivud mud mamikro mawamp, chakwel ashikena kusal mudimu nawamp. Departema wa Kuland yom walandang mamikro 1 000 ni kumatum ku jindond 200.

 Mulong wa kukepish madepens, alandang mamikro ku uvud, amatwal kwi ndond yimwing mulong wa kumalongij, kupwa chad amatum ku jindond jawonsu kwadia kukwetau nich kuswir. Kusutil ku kuland mamikro minam ku uvud, yid mud alandang mikro umwing ku usey wa adolar 170, kuwejaku ni usey wa kumutum nich. Chinech chakwashang kuchidij adolar 34 pa mikro umwing.

 Departema wa Kuland yom wasalang yom yawonsu yiney mwi Ngond wa 4 ni wa 5 muvu wa 2020, mu chirung chinacha ma entreprise mavud madiap kand masadina mudimu nawamp mulong wa mayej. Pakwez chikalap nchik mwamu, kwinsudiel kwa Ngond wa 5, mabiro mavud ma kukarumun ni ma Betel matambula yom yiney ya kusal nich mudimu.

 Mukadivar Jay Swinney, udia ntakel wa Departema wa Kuland yom, ulondin anch: “Kwading kwovijan kuwamp pakach pa madepartema ma ku Betel ni antu adia atulandishina yom pol. Ap anch twasdin usu mulong wa kusal mudimu winou, spiritu wa Yehova ndiy wakwashina kusal mudimu winiou mu chisu chikemp ni nfalang jikemp.”

 Mukadivar Nicholas Ahladis, usadina ku Departema ukata kuyikwashang in kukarumun ulondin anch: “In kukarumun adia ku yikumbu yau mulong wa mayej ma corona, ayikasikesha kutambul yom yiney ya mudimu. Ap anch ading kulemp ni in kukarumun akwau, asalang usu wa kusal pamwing mulong wa kukarumun ni kukwat madiskur, madram ni miminy mu mazu 500 ni kusut .”

 Mudimu winou ni yikwau yivud kand yakwashin kupalangesh kud akadivar a pa mangand mawonsu program wa Chitentam cha Rejon cha muvu wa 2020 “Sangarany Machuku Mawonsu”! Chawiy, anch twaladang yom yiney ya kusal nich mudimu, chid mulong wa yipan yen yiukata kupanangany nich muchim wawonsu pa donate.pr418.com ni kusutil mitapu yikwau.