CHISHANY KU MES!
Mayingishin ma Kuchingejin muvu wa 2023—Bibil Ulondinap Ik?
Kwisambishin kwa muvu wa 2023, tukwet ruchingej anch kud yom yiwamp yikutushikena etu pamwing ni majuku metu. Mulong wak tufanyidina kwikal ni yitongijok yiwamp piur pa machuku ma kurutu?
Bibil utwinkishin ruchingej
Bibil ukwet rusangu ruwamp rilejena anch milong turishina nich katat yid ya kachisu kakemp ni yikupwa piswimp ap. Chakin kamu, Bibil ‘amufunda mulong wa kutulej etu, chakwel. . . rongoj ridiokila mu Mukand wa Nzamb rikutwish kutukwash kwikal ni ruchingej.’—Rom 15:4.
Mulong wa kwilej yom yivud piur pa yom yikaninay Bibil, tang mutu wa mulong “Une espérance réelle pour des jours meilleurs.”
Ruchingej rikutwish kukukwash nlel unou
Ruchingej ritwinkishinay Bibil rid mud ‘nkal mulong wa mupim.’ (Hebereu 6:19) Ruchingej riner rikat kutukwash. Rikutwish kutukwash kand kujijamen milong turishina nich katat, kwikal ni chitongijok chiwamp ni kutukwash twikala ni musangar wa chikupu. Chilakej:
Mulong wa kwijik mutapu ruchingej ripaninay Bibil ramukwasha ikundj umwing wasala usu wa kulikap chaku chading chamwikadisha kal muswik. Tal video ulondina anch Mashakamin Mam Manziyisha.
Mulong wa kujingunin mutapu ruchingej ripaninay Bibil rikutwisha kutukwash anch twafish mukatish netu. Tal video ulondin anch Kuyongoj Antu Adidina.
Kasikesh ruchingej rey
Antu avud achingejidining yom yiwamp yikutwisha kushiken mu machuku ma kurutu, pakwez kakwetingap kwau ruchingej anch yom yiney yikuwanyin kamu. Pakwez, kushilamu kwa Bibil kushalijadin kamu kulep. Mulong wak? Mulong kushilamu kwa Bibil kwinoku kudiokil kud Yehova Nzamb aamwinend, “wakad makasu.” (Titus 1:2) Mulong Yehova amwinend ndiy ukweta usu wa kuwanyish kushilamu kwend; ni ukutwish “kusal yawonsu yikatilay.”—Kuseng 135:5, 6.
Tukukasikeshin nich musangar chakwel utaninamu mu ruchingej rakin ripaninay Bibil. Ukutwish kukasikesh ruchingej rey kusutil ku ‘kukushinshikin Mifund.’ (Midimu 17:11) Mulong wa kusal mwamu, ukutwish kwit dilejan dia Bibil pakad kufut nfalang. Sambish muvu wa 2023 nich yitongijok yiwamp piur pa machuku ma kurutu!
a Yehova diawiy dijin dia Nzamb—Kuseng 83:18.