Pamanch pa fe pa dichuku dia 24 Ngond wa 2, 2022, amasalay a mu Risi asambisha kurishikish ngand ya Ikren, chikalap nchik usu wa amakurump a ngand mulong wa kukangesh njit jinej. Kurishikish kwinoku kukwet yibudikin ik pa mangand? António Guterres udia sekreter mujim wa Nations unies, walondin pasut kal machuku makemp anch: “Mutapu ukutwisha njit jinej kuvudish mar, kushesh yom, ni kuyipish diking mu jingand ja mu Erop ni pa mangand mawonsu ud wa piur nakash, chawiy tusotinap anch yom yiney yisadik.”

•   Yesu Kristu wasambela kulejan anch chirung chimwing: “Muchid ukez kurish ni muchid ukwau.” (Mateu 24:7) Tang mutu wa mulong ulondina anch: “Chisu Chijingidij cha ‘Machuku ma Kwisudiel,’ ap anch ‘Chisu cha Kwisudiel’?” mulong wa kuman mutapu Bibil umekeshinay anch njit tumena nlel jiwanyishin uprofet wa Yesu.

•   Buku wa Kujingunik ufanakeshin njit nich muntu ushicha pa “kabar . . . musuz nakash” ni wezina mulong wa “kudiosh chisambu pa mangand.” (Kujingunik 6:4) Tang mutu wa mulong ulondina anch: “Amakundj Ashicha pa Atubar Anying—Ad Anany?” mulong wa kwijik mutapu uprofet winou utadina njit jisadikina mu chirung chetu.

•   Buku wa Daniel wasambela kulejan kupwitamijan pakach pa ‘mwant wa kwiyand’ ni ‘mwant wa kurul.’ (Daniel 11:25-45) Tal video ulondina anch: Kuwanyin kwa Uprofet Udia mu​—Daniel Shapitre 11 mulong wa kwijik mulong wak tukutwisha kulond anch Risi ni jingand jimunungina chikas ad mwant wa kwiyand. a

•   Buku wa Kujingunik niyend wisambidin “njit pa Dichuku dijim dikurumburishay Nzamb Mwin Dikand Diawonsu.” (Kujingunik 16:14, 16) Pakwez, njit jinej jikwikalap pakach pa michid mud mutapu tumena nlel. Tang mutu wa mulong ulondina anch: “Njit ja Harmagedon Chom ik?” mulong wa kujingunin yom yivud piur pa yinship ya kurutu.

•   Bibil ulondin anch Nzamb ‘ukukatwish njit pa mangand mawonsu.’ (Kuseng 46:9) Tang mutu wa mulong ulondina anch: “Ruchingej Rakin ra Mwom Uwamp mu Machuku ma Kurutu” mulong wa kwilej yom yivud piur pa yom yikaninay Nzamb kusal mu machuku ma kurutu.

•   Yesu wayifundisha in kwilejend kulembil chakwel Want wa Nzamb weza. (Mateu 6:9, 10) Want winou ud guvernema wa mwiur ukuwanyisha rusot ra Nzamb pa divu, ni kulet kand mangand ma chisambu. Mulong wa kujingunin mutapu ukutwisha kutaninamu mu Want winou, tal video ulondina anch: Want wa Nzamb Chom Ik?

 Mu Ikren mud Atuman a Yehova 129 000 ni kusut. In Kristu inay amwimburijin Yesu kusutin kulik kwiyandjik mu yom ya politik ni mwi njit, mud musadiningau kand Atuman a Yehova adia pa mangand mawonsu. (Yohan 18:36) Atuman a Yehova a pa mangand mawonsu adandamedin kulejan “rusangu ruwamp ra Want” ukupwisha milong yin yawonsu yirishinau nich an a antu, kuwejaku ni njit. (Mateu 24:14) Tukwitin amboku kutukimb chakwel wileja yom yivud piur pa uruu wa ruchingej udia mu Bibil.