Pa dichuku dia 24 Ngond wa 1, 2023, in siyans asambisha kushejish Saa ya Dichuku dia Disudiel dia Mangand a pa chisu cha mapep ma uchuku, chimekeshina disudiel dia mangand.

•   “Saa ya Dichuku dia Disudiel dia Mangand’ yidi chijingidij cha kwinongish antu ayinau, in siyans ayishejish kal piswimp nakash pa Diakaad pa chisu cha mapep ma uchuku mulong wa wom wa njit ja mu Ukraine, njit ja nikleyer ni wom wa kukaninik kwa chirungul.”​—AFP International Text.

•   “In siyans alonda pa Diakaad anch anch ‘Saa ya Dichuku dia Disudiel dia Mangand’ ayishemunin kal masekond 90 kurutu pa mapep ma uchuku​—kwashal kal chisu chikemp chakwel antu ayishesha kamu awonsu”​—ABC News.

•   “Chisak cha in siyans a pa mangand mawonsu chikat kubabesh anch, chimeken mud antu akez kwinongish ayinau piswimp ap kamu kupandakanamu muchadingau ni kuchingejin.”​—The Guardian.

 Ov, antu ni yom yidia mu mangand akuyishesh piswimp ap? Ov, tufanyidin kwov wom wa yom yikusadika mu machuku ma kurutu? Bibil ulondilap ik?

 Kukwatijan ni yom yilondinay Bibil, ‘mangand makushal chikupu’ ni antu akez “kashakamamu chikupu.” (Mulej 1:4; Kuseng 37:29) Chawiy komb, antu kakezap kutwish kushesh divu chakwel atungamu.

 Pakwez, Bibil wisambidin piur pa disudiel ya mangand. Chilakej, ulondin anch ‘mangand mayil mu kusut.’​—1 Yohan 2:17.

•   Chakwel ujingunina yom yilondinay Bibil piur pa nsudiel ya mangand, tang mutu wa mulong ulondina anch “La fin du monde est-elle proche ? Qu’est-ce que l’apocalypse ?”

•   Chakwel ujingunina yom yilondinay Bibil piur pa saa yitadina yinship yikusadika pa mangand mawonsu mu machuku ma kurutu, tang mutu wa mulong “Disudiel Dikwez Chisu ik?”

 Bibil ukutwish kutukwash twikal ni chitongijok chiwamp chikalap nchik milong yidiaku katat mu mangand. Ov, mutapu ik chitwishikina?

•   Bibil utwinkishin yiyul yiwamp nakash. (2 Timote 3:16, 17) Chilakej, tang mutu wa mulong ulondina anch “Comment ne pas vous laisser submerger par l’inquiétude” chakwel uman mutapu ukutwisha Bibil kukukwash wikala nich chitongijok chiwamp chikalap nchik yikokujol ya mu mwom.

•   Bibil utwinkishining ruchingej rakin mulong wa machuku ma kurutu. (Rom 15:4) Ulejen nawamp yom yitukutwisha kuchingejin katat ni ya mu machuku ma kurutu, yawiy yitukwashina kwikal nich ruchigej chikalap nchik yom yisadikina mu mangand.

 Chakwel ujingunina yom yivud ukutwisha kutan mu Bibil, ukutwish kwit dilejan dia Bibil pakad kufut kusambish kamu katat.