4 NGOND WA 4, 2022
NSANGU JISU JA PA MANGAND MAWONSU
Atuman a Yehova Achirikidin Yikumangan ku Yot ya Want
Kusambish dichuku dia 1 Ngond wa 4, 2022, Atuman a Yehova achirikidin kand yikumangan ku yot ya Want. Kwiyakamish kwa akadivar nau anambaz netu kwakarumuka kapamp kamwing ni kwikal masip, mansoj ma musangar ni chirungul cha kuwang miminy ya Want.
Kud antu amwing, kading kapamp kau ka kusambish kukumanganap ku Chot cha Want.
Mukadivar Krzysztof Hoszowski wa mu Polony ulondin anch: “Kawiy kapamp kam ka kusambish kukumanganap ku Chot cha Want. Nileja uyakin kusutil videokonferans ni chisu chambatishau, antu akwau ading atadidin pa Zoom. Nading nij mutapu usadikining yikumangan ku Chot cha Want kusutil mavideo mavud natala. Nova musangar nakash mulong wa rukat ra ukadivar, musangar ni uwamp yanmekeshinau ku yikumangan.”
Kupwa kwa kupalangan corona virus pa ngand mawonsu mwi Ngond wa 3, 2020, Atuman a Yehova asambisha kukumangan kusutil videokonferans. Antu akad kwikal ni mutapu wa kukumangan ku Chot cha Want akutwish kwau kudandamen kukumangan pa videokonferans.
Mukadivar Neil Campbell wa mu Édimbourg, mu Écosse urumburil anch: “Pasambisha mizik ni panasambisha kuwang muminy wa kusambish, nova musangar nakash wa kwikal nau akadivar nam kapamp ka kusambish kupwa kwa mivu yaad.”
Tumujikitishin Yehova mulong wa kutukwash kuchirikin kand yikumangan yetu ku Chot cha Want.—Kuseng 84:10.
Angola
Armeni
Ostrali
République tchèque
Ekwater
Alemany
Grek
Guinée
Japon
Kazakistan
Malawi
Pays-Bas
Filipin
Rumani
Écosse
Corée du Sud
Espany
Sudan
Tayiland