21 NGOND WA 1, 2022
RÉPUBLIQUE DÉMOCRATIQUE DU CONGO
Kutung Betel Musu mwi Ngand ya République démocratique du Congo
Mudimu wa kutung Bethel musu ku Lubumbashi (mu République démocratique du Congo) ukwikala biro wa mutiy wendin nawamp. Atenchikin anch akadivar ni anambaz 260 a ku Betel akusambish kubuukin mu yikumbu yiney yisu kusambish mwi ngond wa 5, 2022. Pakwez akwau 131 akushal ku yikumbu yikur ya betel ku Kinshasa. a Asambishin kand kutung yikumbu yikwau yisu ya ma biro ni ya kushakam piswimp ni Betel wa Kinshasa. Atenchikin chakwel akadivar ni anambaz 48 a ku Betel abuukin mu yikumbu yiney kusambish mwi ngond wa 1, 2024. Yikumbu yiney yikukwash kuwanyish maswir ma mijikit ya uteokras yiyila kurutu mu ma Congo mawonsu maad.
Mudimu wa kutung chikumbu chakusambish pakach pa yikumbu yisatu ya mabiro uyil nawamp
Mu muvu wa mudimu wa 2021, akadivar netu mu République démocratique du Congo atakedil malejan ma Bibil 250 000 ni kusut. Ni antu miliyon umwing ni kusut akumangen ku Chivurikish cha rufu ra Kristu. Pinap, ku Betel wa Kinshasa kud akadivar ni anambaz 394.
Mulong kwadiap mutapu wa kujimbish Betel wa Kinshasa, akadivar akimbijodin jinpang mu misumb yikwau. Atanin ku Lubumbashi ndond yiwanyidina kutungin Betel musu ni yikutwisha kand kukwash kujimbish Betel mu machuku ma kurutu anch kwikal maswir.
Ku kamaku: Akadivar ni anambaz a ku Betel piswimp 300 akusambish piswimp ap kubuukin ku Lubumbashi mu yikumbu yisu. Ku katatuku: Chifatul chimekeshina mutapu ukwikala yikumbu anch yapwa kutung
Rupang ra ku Lubumbashi rid mu akilometre 2 300 ni ra ku Kinshasa. Rupang riner risu rikwet kujimb kwa ma ektar 12 ni mukwikal yikumbu ya kushakam, ya ma biro, depo mujim, chikumbu chijim chikusadinangau mu mitapu kushalijan chikweta kapalakany ka kudiil, ni jindond ja kwipuwangejin.
Mudimu winou wa kutung wasambisha mwi ngond wa 11, 2020, ni uyil kwau nawamp chikalap nchik yikokujol yadiaku mulong wa chipupu cha Covid-19.
Mukadivar Robert Elongo, wa mu Komite wa Mutiy wa Congo (Kinshasa) ulondin anch: “Mimbu ya jingand ayifunga. Ni chinech charumbangesha yom pakwel anch yom ya mudimu yishik pa chisu chiwanyidina, chawiy chalabishinaku midimu yakusambish.”
Ap mwamu, Mukadivar Elongo ulondin anch: “Mu muvu umwing kwau, midimu 40 pa chitot ya chikunku chinech cha kusambish yapwa.”
Chimeken kamu patok anch Yehova uyukishin proje winou. Tulembil chakwel yikumbu yiney yiweja kal ku ‘yom ya Kristu’ yipana uman uwamp kud antu ni kutumbish dijin dia Yehova Nzamb.—Mateu 24:47.
a Mutiy wa Congo (Kinshasa) utakedin midumu ya uteokras mu Congo-Kinshasa ni mu Congo-Brazzaville.