Lejan yom utongina. Yileja anvajey chakwel ijika ushon ukweta ni mutapu ukurumbangeshina yom yiney mu manangu. Pamwing ap akutwish kukurumburil yom yashikedina ni chinech chikutwish kukukwash kukepish runeng rey.

 Anch anvajey kakwinkishinap ukwash uswirikedina, ukutwish kwambamb ni murund ney uswila.—Jinswir 17:17.

 Cha usey nakash, Tatukwey udia mwiur ukutwish kuta matu ku yom ukumuleja, mulong ndiy udi mwin “Kutesh malembil.” (Kuseng 65:2) Muleja yom yawonsu ukweta ku muchim ‘mulong ukat kukubangin.’—1 Pita 5:7.

 Kangal wayilamin rukuny. Daniel, ukweta anvaj alikijana chisu chadingay ni mivu sambwad ulondin anch: “Anvajam ading in kwibangin ayinau. Katutonginap kamu kwau ni katonginap piur pa yom yikutushikena mulong wa mupak wau.”

 Yom ik yiyimp yikutwisha kumushiken Daniel anch wadandamen kulam ujim ni rukuny?—Chakul: Tang Jinswir 29:22.

 Mulong wak chiwapin kudi Daniel kusal usu wa kuyilikishin anvajend mulong wa yom yiyimp yamusalau?—Chakul: Tang Efes 4:31, 32.

 Ipuk kusal yom yikutwisha kukumesh amwiney mar. Denny ulondin anch: “Kupwa kwa anvajam kulikijan, nadingap kand ni musangar ni naziya nakash. Nasambisha kwikal ni milong ku shikol ni nakanganya kwilej shikol muvu umwing. Kupwa kwa yom yiney . . . Nasambisha kulet masok nakash mu shikol ni kutendol.”

 Utongin nchik? Kusutil yaku yend, Denny wading ukimbin yom ik?

 Mutapu ik ukutwisha mbil yidia mu Galatia 6:7 kuyikwash ansand adia mudi Denny kwipuk yisal ya kwimesh ayinau mar?

 Chitin chisu mulong wa kukepish pakemp pakemp ushon ni runeng. Pakwez, mu kusut kwa chisu payila kuwap mashakamin mey pakemp pakemp, ukwiyov kand kwey nawamp.