Bwat, Bibil kafundishinap anch divu didi dialalela. a Bibil kadiap buku wa siyans. Pakwez kalondinap yom yishalijadina ni yitiyinay siyans. Yom yawonsu yilondiningay Bibil ‘yishich chikupu ni chikupu.’​—Kuseng 111:8.

•  Mutapu ik tukutwisha kutesh mazu ma Bibil malondina anch ‘makonk manying ma divu’?

•  Yom ik twilejidina ku rusangu rilondina anch Yesu amwoza kudiay Djabul?

 Mazu ‘makonk manying ma divu’ ni ‘kwisudiel kwa divu’ tutanina mu Bibil madiap ma kutesh mudi mumalondinau, mudi kulond anch divu didi dia kare ni dikwet mitambu. (Isay 11:12; Job 37:3) Kudi kwau kulond kumekeshina divu diawonsu diakabuj. Bibil wisambidin yitongijok yawiy yimwing palondinay piur pa makonk manying ma divu pa chisu chawiy chimwing.

 Dizu dia Hebereu dikarumwinau anch “makonk” ap “kwinsudiel” madi mudi madiokil ku dizu “mapur.” Kukwatijan ni buku (The International Standard Bible Encyclopedia), “mudi kajil usadidina mapur mend mulong wa kubwik twanend, [kulond kwinoku kwa hebereu] asambisha kukusadin pakemp pakemp mulong wa kumekesh kwinsudiel kwa chom.” Buku ndiy winou umwing uwejidin kand anch mu Job 37:3 ni Isay 11:12, “dizu diawiy dimwing dirumburikin mitambu, mimbu ap kand kwinsudiel kwa kujimb kwa divu.” b

 Mulong wa kumwoz Yesu, “[Djabul] wamutwala Yesu piur pa mukandu ulemp, wamulej mant mawonsu ma pa mangand ni uyaj wau.” (Mateu 4:8) Antu amwing itiyining anch rusangu riner ra Bibil rifundishin anch divu diawonsu dialalel mulong dikutwish kumeken pa ndond kanang. Pakwez, “piur pa mukandu ulemp” palondinau mu rusangu riner yidi kwau ndond ya chifanikesh, yidiap ndond yidiaku. Shinshikin mulong wak choviken kulond mwamu.

•   Kwikil mukandu ap umwing udiaku pa divu udia ulemp nakash ukutwishau antu kumenaku mant mawonsu ma pa mangand.

•   Djabul wamuleja Yesu kadiap ching mant mawonsu pakwez ni “uyaj wau.” Chikasiken kumen uyaj wa want kanang pa ndond yilemp nakash, chimeken anch Djabul wamuleja Yesu yom yiney yawonsu kusutil chishimu. Chidi chilik chimwing mudi mukutwishay muntu kusadin projekter ni ekran mulong wa kumulej muntu kanang yipich ya jindond kushalijan ya pa divu.

•   Mu rusangu rawiy rimwing rilejenau kand mu Luka 4:5 rilondin anch Djabul wamuleja Yesu “kapamp kamwing kamu . . . mant mawonsu ma pa mangand,” chading chikasiken kudi Yesu kuman kapamp kamwing yom yawonsu yiney nich mes metu. Chimeken komb anch Djabul wamwoza Yesu kusutil kusadin mitapu yikwau yisutinamu kuman kwa antu.